پارلامەنت سەناتىنىڭ توراعاسى قاسىم-جومارت توقاەۆ باستاعان قازاقستاندىق پارلامەنتشىلەر سانكت-پەتەربۋرگتە تمد پارلامەنتارالىق اسسامبلەياسىنىڭ شارالارىنا قاتىستى، دەپ حابارلايدى قازاقستان رەسپۋبليكاسى پارلامەنتى سەناتىنىڭ ءباسپاسوز قىزمەتى.

تمد پاا كەڭەسىنىڭ وتىرىسى مەن پارلامەنتارالىق اسسامبلەيانىڭ 48-ءشى وتىرىسىندا ۇيىمعا قاتىسۋشى مەملەكەتتەر پارلامەنتتەرىنىڭ باسشىلارى جيىرمادان استام ماڭىزدى ماسەلەلەردى تالقىلادى. كۇن تارتىبىنە «ورتتەن ەرىكتى قورعاۋ تۋرالى»، «دەربەس دەرەكتەر تۋرالى» سەكىلدى ماڭىزى زور ۇلگى زاڭ جوبالارى ەنگىزىلىپ، 2019 جىلدىڭ العاشقى جارتى جىلدىعىنداعى تمد ەلدەرىندەگى مەملەكەتتىك بيلىك ورگاندارىنىڭ سايلاۋلارىن بايقاۋعا ازىرلىك ماسەلەلەرى قارالدى جانە تمد پاا-نىڭ 2019 جىلعا جۇمىس جوسپارى بەكىتىلدى.

سەنات دەپۋتاتتارى سونداي-اق تمد پاا جانىنداعى قاۋىپسىزدىك جانە جاڭا قاتەرلەر مەن قاۋىپتەرگە قارسى ءىس-قيمىل جونىندەگى زاڭنامانى ۇيلەستىرۋ جونىندەگى بىرلەسكەن كوميسسيالاردىڭ، تمد پاا قورعانىس جانە قاۋىپسىزدىك; ساياسي ماسەلەلەر جانە حالىقارالىق ىنتىماقتاستىق; قۇقىقتىق ماسەلەلەر جونىندەگى تۇراقتى كوميسسيالاردىڭ وتىرىستارىنا قاتىستى.

تاۆريا سارايىندا پارلامەنتشىلەردىڭ قاتىسۋىمەن شىڭعىس ايتماتوۆتىڭ تۋعانىنا 90 جىل تولۋىنا ارناپ قويىلعان كورمە اشىلدى.

تمد پاا كەڭەسىنىڭ قورىتىندىلارى بويىنشا وتكەن ءباسپاسوز ءماسليحاتىندا سەنات باسشىسى قىتايلىق «ءبىر بەلدەۋ، ءبىر جول» جوباسىن ىسكە اسىرۋعا تمد ەلدەرىنىڭ قاتىسۋ مۇمكىندىگى تۋرالى پىكىرىمەن ءبولىستى. ونىڭ ايتۋىنشا، الەمدەگى ەكونوميكا مەن حالىقارالىق احۋالداعى شيەلەنىستەر، سانكتسيالىق تەكە-تىرەستەر، الپاۋىت ەلدەر اراسىنداعى ساۋدا قايشىلىقتارىنىڭ ارتا ءتۇسۋى اياسىندا قىتايلىق ستراتەگيانىڭ ءمان-ماڭىزى ارتا تۇسەتىن بولادى.

«تمد ەلدەرىنىڭ بۇل جوباعا بەلسەندى قاتىسۋى ەۋرازياداعى ىقپالداستىق ۇدەرىستەرىن ورىستەتۋگە، ايماقتىق ساۋدانى دامىتۋعا ىقپال ەتەدى. ودان باسقا، بۇل سانكتسيالىق سوعىستاردىڭ تەرىس زارداپتارىن جويۋعا مۇمكىندىك بەرەدى»، - دەدى ق.توقاەۆ.

سەنات باسشىسى تمد پاا-عا قاتىساتىن مەملەكەتتەر بۇل جوباعا قاتىسۋدىڭ تيىمدىلىگىن قازىرگى كەزدە سەزىنىپ وتىرعانىن اتاپ ءوتتى. وسى باستامانى ودان ءارى دامىتۋ بۇگىندە كۇن تارتىبىندە تۇر، بۇل جەردە كولىك-لوگيستيكالىق دالىزدەر مەن ءتيىستى ينفراقۇرىلىم قالىپتاستىرۋعا بايلانىستى ماسەلەلەردى شەشۋ تۋرالى ءسوز بولىپ وتىر.

«ءبىز پارلامەنتارالىق ۇنقاتىسۋدا ساۋدا مەن ەكونوميكالىق ىنتىماقتاستىقتى دامىتۋ تاقىرىپتارىنىڭ كەلەشەگى زور دەپ سانايمىز. دەپۋتاتتار تمد پاا اياسىندا زاڭنامالىق، نورماتيۆتىك بازا قالىپتاستىرۋعا ەلەۋلى ۇلەس قوسا الادى. «ءبىر بەلدەۋ، ءبىر جول» تۇجىرىمداماسىن ىلگەرىلەتۋ اۋقىمدى ەۋرازياداعى ىقپالداستىق ۇدەرىستەرىن ۇيلەستىرۋگە ىقپال ەتەتىن بولادى»، - دەپ اتاپ ءوتتى ق.توقاەۆ.

قازاقستان سەناتىنىڭ توراعاسى اسسامبلەيانىڭ بيىلعى جۇمىسىنىڭ قورىتىندىلارىنا وڭ باعا بەردى. تمد ەلدەرىنىڭ پارلامەنتشىلەرى اسسامبلەياعا مۇشە ەلدەر زاڭناما، ەكونوميكالىق، الەۋمەتتىك ماسەلەلەردە ءار ەل وزدەرىنە لايىق شەشىمدەردى تابا الاتىن قۇقىقتىق ىرگەتاس قالىپتاستىردى. ق.توقاەۆتىڭ پىكىرىنشە، دەگەنمەن، قول جەتكەن دەڭگەيدە توقتاپ قالۋعا بولمايدى، جۇمىس ۇدەرىستەرىن جەتىلدىرۋ ءۇشىن كۇش-جىگەردى بىرىكتىرۋ جانە ونى تسيفرلىق تەحنولوگيانىڭ دامۋىن ەسكەرە وتىرىپ وركەندەتۋ كەرەك.

Abai.kz