ەلباسى نۇرسۇلتان نازارباەۆ “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ” اتتى قازاقستان حالقىنا ارناعان جولداۋىندا حالىقتىڭ الەۋمەتتىك جاعدايىن جوعارىلاتۋ بويىنشا ناقتى تاپسىرمالار بەرگەن بولاتىن. جانە، تۇرعىندارى باسپانامەن قامتاماسىز ەتۋ ءۇشىن “نۇرلى جەر” باعدارلاماسى دا قابىلدانعان ەدى.

وسىعان وراي، تۇركىستان وبلىسىنىڭ ارىس قالاسىندا «نۇرلى جەر» باعدارلاماسى بويىنشا ءۇش كوپقاباتتى ءۇي سالىندى. بۇلار – شاھارداعى جاڭادان بوي كوتەرگەن شاعىناۋدانداعى العاشقى نىساندار.

100-دەن استام پاتەر الەۋمەتتىك جاعدايى تومەن وتباسىلارعا، كوپبالالى انالارعا جانە كەزەكتە تۇرعان مەملەكەتتىك قىزمەتكەرلەرگە بەرىلەدى. الەۋمەتتىك باسپانانى سالۋعا مەملەكەت قازىناسىنان 800 ميلليون تەڭگەگە جۋىق قاراجات بولىنگەن ەكەن. بۇدان بولەك تۋرا وسى ماڭدا تاعى 3 ءۇيدىڭ قۇرىلىسى ءجۇرىپ جاتىر. ولار كەلەسى جىلى پايدالانۋعا بەرىلمەك. مۇنان كەيىن جەرگىلىكتى اكىمدىك مۇعالىمدەر مەن دارىگەرلەرگە ارنالعان بىرنەشە 5 قاباتتى ءۇي سالۋدى كوزدەپ وتىر. ماقسات – اۋىلعا قاجەت مامانداردى باسپانامەن قامتۋ.

«تۇرعىن ءۇي كەزەگىندە تۇرعان 1388 ادام بار. سولاردىڭ 106-سى وسى ۇيلەردەن پاتەر الادى. تاعى 5 قاباتتى 5 ءۇي سالىنادى. سونىمەن، قالعانى 1-2 جىل ىشىندە تۇرعىن ۇيمەن قامتاماسىز ەتىلەدى» دەيدى ارىس قالاسىنىڭ اكىمى مۇرات قادىربەك.

Abai.kz