ەلباسى ن.نازارباەۆ “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ” اتتى قازاقستان حالقىنا ارناعان جولداۋىندا وڭىرلەردەگى زاۋىت-فابريكالاردىڭ جۇمىسىن جانداندىرۋ قاجەتتىگىن ايتقان بولاتىن. وسىعان سايكەس، وڭىرلەردە تۇتىنۋشىلاردىڭ سەنىمىنە يە بولىپ، ساپالى تاۋارلار شىعارىپ جاتقان كاسىپورىندار از ەمەس.

قازاقستاندىق ونىمگە ەۋرو وداق ەلدەرى سۇرانىس بىلدىرۋدە. وڭىردە جۇمىس جاساپ تۇرعان 4 زاۋىت جىلىنا 5200 توننا سۋدى مەكەندەگەن قاناتتى جاندىكتى قايتا وڭدەۋدە. جىل سوڭىنا دەيىن بەسىنشى زاۋىت ىسكە قوسىلعالى تۇر.

شارداراداعى جالعاسباەۆ جەكە سەرىكتەستىگى 2016 جىلى العاشقى ءونىمىن شىعارا باستادى. سودان بەرى 4100 توننا كوكسەركە بالىعىن شەتەلگە ەكسپورتتاعان. قازىر مۇندا كۇنىنە 5 توننا سۋاستى جاندىگىنىڭ ەتى ودەلۋدە.

تۇرار نۇرگەلديەۆ

ءوندىرىس تەحنولوگى

ءبىزدىڭ تسەحتا كوكسەركە بالىعىنان سۇبە شىعارامىز. كۇنىنە 5 توننادان شىعارعاندا ايىنا 150 تونناداي دايىن ءونىم وندىرەمىز. بىزدەن شىققان سۇبەلەر ەۋروستاندارتتارعا ساي. سوندىقتان بالىقتىڭ 80 پايىزى ەۋروپاعا ەكسپورتتالادى.

زاۋىت ءونىمىن اسىرەسە دانيا مەن گوللانديا ەلدەرى اسا ءسۇيىپ تۇتىنادى ەكەن. ءدامى ءتىل ۇيىرەتىن شاردارانىڭ بالىعىن مۇنداعى كاسىپكەرلەر الەمدىك ساپا ستاندارتىنا ساي دايىنداۋدى مەڭگەرىپ العان. وڭدەلگەن ءونىم 100 كۇنگە دەيىن ساقتاۋعا جارامدى ەكەن. وسىنداعى قىرىققا جاقىن قىزمەتكەر تۋلاعان تىرشىلىك يەسىن سۇيەگىنەن اجىراتىپ، ونى -30 گرادۋستا توڭدىرىپ بارىپ، پايدالانۋعا جىبەرەدى.

انار تۇكىباەۆا

زاۋىت جۇمىسشىسى

ماسەلەن بىزگە تازا 20 كەلى بالىق بەرىلسە ودان 10-11 كەلى ەتتى اجىراتىپ بەرەمىز. كوبىنە بالىقتىڭ سەمىز نە ارىق بولعانىنا بايلانىستى ەت شىعادى. ماسەلەن مايدا بالىقتاردان 10 كەلى بەرىلسە ودان تازا 5 كەلىدەن اسا ەت الىنادى.

قازىر شاردارا اۋدانىندا 4 بالىق وڭدەۋ زاۋىتى جۇمىس جاساپ تۇر. ولاردىڭ قۋاتتىلىعى جىلىنا 5200 توننا. دايىن تاۋاردىڭ 20 پايىزى وتاندىق نارىققا شىقسا، قالعانى شەكارا اسادى.

ومىربەك رۇستەموۆ

اۋداندىق كاسىپكەرلىك ءبولىمىنىڭ باسشىسى

جىلسايىن 4,4 ميلليارد تەڭگەنىڭ بالىعى شەتەلگە ەكسپورتتالادى. بۇل ەۋرووداق پەن رەسەي جانە تمد ەلدەرىنە جىبەرىلەدى. بىزدە قازىر ءتورت بالىق زاۋىتى بولسا، تاعى بەسىنشى زاۋىت سالىنعالى تۇر. ول دا ەكسپورت باعىتىنا ارنالعان.

ياعني شاردارا اۋدانىنداعى بەسىنشى بالىق زاۋىت ۇستىمىزدەگى جىلدىڭ جەلتوقسان ايىندا ىسكە قوسىلادى دەپ جوسپارلانۋدا. وندىرىستە 20 ادام جۇمىسپەن قامتىلاماق.