قازاقستان رەسپۋبليكاسىنىڭ پرەزيدەنتى ن.نازارباەۆتىڭ 2018 جىلعى 10 قاڭتارداعى «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى حالىققا جولداۋىنىڭ جەتىنشى قادامىندا ادامي كاپيتالدى جاڭعىرتۋ ءۇشىن ازاماتتاردى ناتيجەلى جۇمىسقا تارتۋعا كوبىرەك مۇمكىندىك بەرىپ، ولاردىڭ جەكە كاسىبىن باستاۋىنا جاعداي جاساۋ قاجەتتىگى تۋرالى ايتىلىپ، «اتامەكەن» ۇلتتىق كاسىپكەرلىك پالاتاسىنىڭ ازاماتتارعا بيزنەستى ۇيرەتۋ جونىندەگى اتقارىپ جاتقان جۇمىستارى قولداۋعا تۇرارلىق دەلىنگەن.

سايرام اۋدانىنىڭ نەگىزگى الەۋمەتتىك-ەكونوميكالىق دامۋى تۇراقتى. اگرارلى ولكەدە جىل باسىنان بەرى 46 ملرد. تەڭگەنىڭ اۋىل شارۋاشىلىعى ءونىمى وندىرىلگەن. مال شارۋاشىلىعىندا 28 ملرد. تەڭگەنىڭ ءونىمى وندىرىلسە، جىل سوڭىنا دەيىن بۇل كورسەتكىش 6 ملرد.-قا ارتپاق. اۋداندا مال بورداقىلاۋمەن اينالىساتىن شارۋا قوجالىقتارىنىڭ قاتارى ارتۋدا.

«نۇرىمگرۋپپ» سەرىكتەستىگى بيىل ءساۋىر ايىندا مانكەنت اۋىل وكرۋگىندە 10 مىڭ باسقا ارنالعان بورداقىلاۋ  الاڭى كەشەنىنىڭ قۇرىلىسىن باستادى. قۇنى 3,5 ملرد. تەڭگەگە باعالانعان جوبانى جۇزەگە  اسىرۋعا  كاسىپكەر 2,4 ملرد. تەڭگە جەكە قاراجاتىن جۇمسادى.

كەنجالى ايتۋوۆ، مال بورداقىلاۋ كەشەنىنىڭ مەڭگەرۋشىسى: «كەشەننىڭ قۇرىلىسى اياقتالۋعا جاقىن. بۇگىندە مۇندا 6 مىڭ باستى بورداقىلاۋعا جاعداي جاسالعان. جەم جەتكىلىكتى. وڭىرىمىزدەن جانە  جامبىل وبلىسىنان جەتكىزىپ العانبىز. ەتكە  تاپسىرىس  بۇگىندە كورشى وزبەكستان، قىتاي، يراننان  كوپتەپ تۇسۋدە. قازىعۇرت اۋدانىنداعى فەرمادا 6 مىڭ باس مالىمىز بار. جالپى قارا مالدىڭ باسىن 25 مىڭعا دەيىن جەتكىزۋدى كوزدەپ وتىرمىز. ەتتى باعىتتاعى  مالدى  سولتۇستىك، شىعىس، باتىس قازاقستانداعى  شارۋا قوجالىقتارىنان ساتىپ الامىز. شارۋاشىلىعىمىزدى كورىپ، تاجىريبە الماسۋعا  فەرمەرلەر، جەكە ازاماتتار كەلىپ جاتادى. مال بورداقىلاۋدىڭ قىر-سىرىن ايتۋدان جالىقپايمىز. جۇمىس ىستەيمىن دەگەن جاستارعا ەسىگىمىز اشىق».

اۋدانداعى بار مۇمكىندىكتى پايدالانۋ ەسەبىنەن يندۋستريالاندىرۋ قارتاسى اياسىندا «وڭىرلەر كاسىپكەرلىگىن قولداۋ» كارتاسىنا جالپى قۇنى  7,6 ملرد. تەڭگەنى قۇرايتىن  12 جوبا ەنگەن.

نۇرپاپا كوپەەۆ، سايرام اۋداندىق اۋىل شارۋاشىلىعى ءبولىمىنىڭ باسشىسى: «2018 جىلدىڭ 9 ايىندا  قارا مال — 205 190 باس، جىلقى — 71 689 باس، قوي مەن ەشكى — 98809 باس، وتكەن جىلعا قاراعاندا ءوسىم تيىسىنشە قارا مال 26,1, جىلقى 13,7, قوي مەن ەشكى -0.7 پايىزدى قۇراعان. وسى مەرزىمدە ءتىرى سالماقتا 21 مىڭ توننا ەت وندىرىلگەن. جىل باسىنان 39 جانۇيالىق ءسۇت اۋلالارى اشىلعان».

ايتا كەتەتىن ءجايت، وبلىس دەڭگەيىندە اۋىل شارۋاشىلىعى ءونىمى بويىنشا سايرام اۋدانىنىڭ ۇلەسى 12,5 پايىز،  اۋدان بۇل كورسەتكىش بويىنشا  1 ورىنعا تۇراقتاعان.

شىنار ورازوۆا 

Abai.kz