ەلباسى نۇرسۇلتان نازارباەۆ جاڭادان قۇرىلعان تۇركىستان وبلىسىنا ايرىقشا كوڭىل ءبولىپ وتىرعانى بەلگىلى. وسىعان سايكەس بۇل وڭىردە ءتۇرلى سالالار بويىنشا قارقىندى جۇمىستار اتقارىلىپ جاتىر. سولاردىڭ ءبىرى، جۋىردا تۇركىستان قالاسىندا وتكەن  «كونە تۇركىستان  –جاڭا مۇمكىندىكتەر» اتتى حالىقارالىق ينۆەستيتسيالىق جəنە تۋريستىك فورۋمى.

ايتالىق، فورۋم جۇمىسىنا ارنايى كەلگەن ەۋرازيالىق ەكونوميكالىق ىنتىماقتاستىق ۇيىمىنىڭ باس حاتشىسى ۆلاديمير پيسكۋرەۆ قۋانىشتى جاڭالىعىمەن ءبولىستى.

ول تۇركىستان وبلىسىنان  ءۇش بىردەي تاريحي كەشەننىڭ دۇنيەجۇزىلىك تۋريستىك تارتىمدىلىعى ەرەكشە نىساندار قاتارىنا قوسىلعاندىعىن اتاپ ءوتىپ، ءوز قۇتتىقتاۋىن ءبىلدىردى. ياعني دۇنيەجۇزى بويىنشا 2 مىڭعا تارتا تاريحي نىساندار توپتاستىرىلعان تۋريستىك تارتىمدىلىعى ەرەكشە تاريحي كەشەندەر قاتارىنا ءبىزدىڭ وبلىسىمىزدان كونە وتىرار قالاشىعى مەن ارىستانباب جانە قوجا احمەت ياسساۋي كەسەنەلەرى كىرىپ وتىر. بارلىق ەلدەردىڭ  ەكسپەرت ماماندارى ءبىر اۋىزدان تاڭداعان اتالمىش ءۇش نىسان بويىنشا بەرىلگەن ارنايى سەرتيفيكاتتار فورۋم بارىسىندا وبلىس اكىمى جانسەيىت تۇيمەباەۆقا سالتاناتتى تۇردە تابىس ەتىلدى.

دۇنيە ءجۇزى بويىنشا تۋريستىك تارتىمدىلىعى ەرەكشە نىساندار قاتارىنا قازاقستاننان جالپى سانى 19 تاريحي كەشەن ەنگەن. ەندىگى جەردە الەمنىڭ تۇكپىر تۇكپىرىنەن ساياحاتقا شىعىپ تاريحى تەرەڭنەن سىر شەرتەتىن عيماراتتاردى ارالاپ كورگىسى كەلگەن تۋريستەر تۇركىستان وبلىسىنداعى اتالمىش نىسانداردى دا ارنايى كەلىپ تاماشالايتىن بولادى.

Abai.kz