بيىل ناۋرىزدا پارلامەنت پالاتالارىنىڭ بىرلەسكەن وتىرىسىندا ەلباسى نۇرسۇلتان نازارباەۆ قازاقستان حالقىنا «پرەزيدەنتتىڭ بەس الەۋمەتتىك باستاماسى» اتتى جاڭا الەۋمەتتىك باستامالاردى تانىستىردى، ونىڭ ءبىرى - جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ، ستۋدەنت جاستاردىڭ جاتاقحاناداعى جاعدايىن جاقسارتۋ بولاتىن. قازاقستاننىڭ ءبىلىم بەرۋ جۇيەسىندەگى وڭ وزگەرىستەرگە ارنالعان ءبىلىم سالاسىنداعى ەلباسى باستاماسى ەلدەگى جاستاردىڭ ساپالى ءبىلىم الۋىنا مول مۇمكىندىك تۋعىزدى.

تۇركىستانداعى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى اۋماعىندا 500 ورىندىق جاتاقحانا سالىنادى. ونى قازاقستان جاعى جۇزەگە اسىرادى. ال تۇركيا رەسپۋبليكاسى تاراپىنان 48 پاتەرلى 6 كوتتەدج بوي تۇزەيدى.

سونداي-اق، تۇرىك ىنتىماقتاستىق جانە ۇيلەستىرۋ اگەنتتىگى 50 ورىندىق قوناق ءۇي مەن 1 وقۋ عيماراتىنىڭ قۇرىلىسىن جۇرگىزەدى. بۇل تۋرالى وسى ۋنيۆەرسيتەتتىڭ وكىلەتتى كەڭەسىنىڭ 58-ءشى ماجىلىسىندە ايتىلدى. جيىندا ۋنيۆەرسيتەتتىڭ 2019-2023 جىلدارعا ارنالعان 5 جىلدىق ستراتەگيالىق جوسپارى بەكىتىلدى. بۇدان وزگە كەڭەس قۇرامىندا وزگەرىستەر ورىن الىپ، ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ ۇكىمەت قاۋلىسىمەن جاڭا مۇشە رەتىندە قابىلداندى.

پ. بينازارقىزى

Abai.kz