اۋىلدا قازىر بوس جەر جوق ەكەن. ءبارىن قولىندا بيلىگى بار ادامدار مەن كاسىپكەرلەر ءبولىپ-ءبولىپ العان. بۇرىن اۋىلداعىلار مالىن ورىسكە شىعارىپ، وزدەرى ۇيدە ەمىن-ەركىن جۇمىسىن ىستەپ جۇرە بەرەتىن. قازىر ەندى مالدى بوس قويا بەرسە، جاڭاعى جەردىڭ يەلەرى شابىندىققا ءتۇسىپ كەتتى دەگەن سىلتاۋمەن بار مالىن قاماپ تاستايدى ەكەن. ونى شىعارىپ الۋ ءۇشىن ايىپپۇل تولەۋىڭ كەرەك تاعى. ونداي ارتىق اقشا ءوزى ارەڭ جۇرگەن اۋىلدىڭ قاراپايىم ادامىندا جوق.

جالىنىپ-جالبارىنىپ ءجۇرىپ، بالا-شاعاسىنىڭ اۋزىنان جىرىپ العان بار اقشاسىن بەرىپ بارىپ شىعارىپ الادى. بايقاپ قاراساڭ، باياعى ۇستەم تاپ پەن كەدەيلەردى قانايتىن زامان قايتىپ كەلە جاتقان سياقتى. وسى ماسەلەنى بىرجاقتى قىلىپ شەشپەسە بولمايدى.

ارگەنتينانىڭ جەرى قازاقستاننان دا ۇلكەن ەكەن. يسپان وتارلاۋشىلارى باياعىدا سول جەردىڭ ءبارىن مەنشىكتەپ الىپ، جەرگىلىكتى حالىقتى جەرسىز قالدىرىپتى. قازىر ەلدەگى بۇكىل جەردى سولاردىڭ ۇرپاقتارى ۋىسىندا ۇستاپ وتىر. سونىڭ كەسىرىنەن 40 ميلليونداي حالىقتىڭ 15 ميلليونى بۋەنوس ايرەستە، تاعى ءبىر ميلليوندايى قالانىڭ ماڭايىنداعى جەركەپەدە يتشىلەپ ءومىر ءسۇرىپ جاتىر. ويتكەنى ولاردا اۋىلدىق جەردە تۋعانداردىڭ مەنشىكتى جەرى جوق. بارىنەن قاعىلعان. سودان كەيىن ولار قالانى جاعالاپ، جان باعۋ ءۇشىن ءومىر بويى جەر يەلەنۋشىلەرگە جالشى بولىپ وتەدى ەكەن.

بىلاي قاراساڭ، ولاردىڭ تۋماي تۇرىپ بار جەرىن تارتىپ العان دا، بولاشاعىنا بالتا شاۋىپ تاستاعان. وسىنداي قاۋىپتى جاعداي ءبىزدىڭ باسىمىزعا دا ءتونىپ كەلە جاتىر.

اۋىلداعى جەر – اۋىل ادامدارىنىڭ مەنشىكتى مۇلكى. وعان ەشكىمنىڭ قول سۇعۋعا قاقى جوق! اۋىلداعى قازاق ونداعى قالاعان جەرىنە مالىن جايىپ، مال ۇستاپ، جەمىس-جيدەگىن ەگىپ، قولدان كەلگەنشە كاسىپپەن اينالىسۋى كەرەك. ونىڭ بار بايلىعى – قۇداي بەرگەن وسى تەگىن جەر عانا!

جولىمبەت ماكىشتىڭ facebook پاراقشاسىنان

Abai.kz