1937 جىلى سوۆەت ۇكىمەتى اياز اتا مەن اقشاقاردى ويلاپ تاپتى. ون بەس جىل ىشىندە (سوعىس جىلدارىن الىپ تاستاسا ودان از) تۇتاس سسرو "پيات مينۋت، پيات مينۋت، ەتو منوگو يلي مالو..." دەپ اندەتىپ ءجۇردى. ءتۇرلى جورالعىلار ويلاپ تابىلدى، ەل تيىن تۇراتىن مۇسىندەردى ءبىر-بىرىنە سىيلاپ ءماز-مەيرام بولىستى، شامپان اتتى، وتشاشۋ شاشتى. تۇنگى 12-دە گەنسەكتىڭ قۇتتىقتاۋىن تىڭداپ، قول سوقتى. اياز اتا مەن اقشاقار كۋلتقا اينالدى، ەل ولاردى جىل بويى تەلمىرىپ كۇتەتىن بولدى.

مەرەكەنى ساناعا ءسىڭىرۋ ساياساتىنىڭ مىقتىلىعى سونشا ءالى كۇنگە ارىلعان جوقپىز. ءتىپتى، ءبىر اي بۇرىن شىرشا جاعىپ، جىن قاققانداي ەلىرىپ جۇرەتىن دەرتكە ۇرىنىپ، اسقىندىرىپ الىپ ەدىك، شۇكىر، بەتى قايتقانداي. سوندا دا جاڭا جىل ارباپ تۇرادى...

19 مامىر سايىن الاۋ جاققىزاتىن پيونەرلەر كۇنى شە؟ ساباقتان قاشىپ جۇرەتىن ەڭ-ەڭنىڭ ءوزى سول ءتۇنى وتتىڭ باسىندا بولۋدى ارماندايتىن. جارايدى، ونى قويا بەر، الگى بەرىدەگى اۋليە ۆالەنتيندى الايىق. اۋ، اينالدىرعان ەكى-ءۇش جىلدا مەكتەپ ديرەكتورلارىنىڭ ميى اينالىپ قالىپ، مەكتەپتەرگە جاشىك قويعىزىپ، بالالارىمىزدان "ماحاببات" حاتىن جيناپ، ماسقارا بولماپ پا ەدى. دۇكەن، دۇڭگىرشىك جۇرەككە ۇقساس كادەسىي، وتكرىتكالارعا تولىپ، بۇلدىرشىندەر "يا تەبيا ليۋليۋ" دەپ حات جازىسىپ، ايعايلاپ، اتتانداپ ءجۇرىپ ازەر توقتاتتىق قوي. نە دەگەن سۇڭعىلا يدەولوگيا دەيمىن دە، ءسىڭىپ، تەز تامىرلانىپ ۇلگەرەدى عوي.

تاۋەلسىزدىك مەرەكەسىندە دۇكەنگە كىرىڭىزشى، ءىشىڭىز ۋداي اشيدى. قانداي سۋۆەنير الاسىز، نە بار ادامدى ەرىكسىز تارتىپ، وسىنى بالاما اپارىپ ءماز ەتەيىنشى دەگىزەتىن؟ كوشەگە قاراساڭىز دا نىشان، ورتاق ءبىر سيمۆوليكا جوق.

اسىرەلەي ايتسام: ءار ادام ءبىر اپتا بويى بالكونىنا تۋ جەلبىرەتىپ قويسىن دەگەندەي ءبىر ناقتى ۇستانىم بولسا. وتباسىنداعى ارەكەتتىڭ اسەرى از، مەرەكەنى تۇتاس رەسپۋبليكا كەمى ءبىر اپتا بۇرىن سەزىنۋى كەرەك، اسىرەسە، بالالارىمىز ءبىر-بىرىنە سىيلىق جاساپ، ويناپ ءجۇرۋى كەرەك قوي. -تاقپاق جاتتا، جۇگەرمەك! - دەپ ءبىر جيىنمەن جابا سالۋ بالانى ماجبۇرلىكتىڭ جالشىسى ەتىپ تىنار. ۇلكەندەرگە ءتۇرلى سىيلىق تاراتىلادى، بىراق، ماسسالىق شاتتىق جوق. ارى كەتسە فبعا ء"سۇيىنشى" دەپ سۋرەتىن سالار، 100-200 لايكقا ءماز بولار.

27 جىل... ەڭ ۇلى مەرەكەمىزدى ەلگە جاپپاي اتاپ وتكىزۋدىڭ جولىن تاپپادىق، ءبىر ءىزدى يدەولوگيالىق ستسەناري جازا المادىق. ءىش ۋداي اشيدى. ءبىر مەرەكەنى ماندىتپادىق. ال ون التىسىنان كەيىن جاڭا جىل گۇرىلدەپ الا جونەلەدى، ءشۇبا جوق. ولەكسەسى ساسىپ كەتكەن ساياساتتىڭ يدەياسىن وشىرۋگە الەۋەتىمىز جەتپەدى. اۋليە ۆالەنتيننىڭ "توپ-مەنەدجەرلەرىن" ءبىر-ەكى جىلعا شاقىرۋ كەرەك شىعار؟

سەرىك ابىكەنۇلىنىڭ facebook پاراقشاسىنان

Abai.kz