نۇرسۇلتان نازارباەۆ ۋكراينا پرەزيدەنتى پەتر پوروشەنكومەن تەلەفون ارقىلى سويلەستى. بۇل تۋرالى اقوردانىڭ رەسمي سايتى جازدى.

مەملەكەتتەر باسشىلارى ەكى جاقتى ىنتىماقتاستىقتىڭ وزەكتى ماسەلەلەرى مەن پەرسپەكتيۆالارىن تالقىلاپ، بيىل قازاقستان مەن ۋكراينا اراسىنداعى بايلانىستاردىڭ جاندانا تۇسكەنىن اتاپ ءوتتى.

ەكى ەل كوشباسشىلارى ۋكراينانىڭ وڭتۇستىك-شىعىسىنداعى قازىرگى احۋال جونىندە پىكىر الماستى. نۇرسۇلتان نازارباەۆ ۋكراينا داعدارىسىنا قاتىستى تاراپتاردى سىندارلى ديالوگ جۇرگىزىپ، كەلىسىمگە كەلۋگە شاقىردى، سونداي-اق وسى قاقتىعىستى شەشۋ ءۇشىن جان-جاقتى قولداۋ كورسەتۋگە ءازىر ەكەنىن ايتتى.

ۋكراينا پرەزيدەنتى پەتر پوروشەنكو كەرچ بۇعازى ماڭىندا بولعان وقيعا جونىندە مالىمدەدى. وسىعان وراي، قازاقستان پرەزيدەنتى بۇل ماسەلەنىڭ ۋكراينا مەن رەسەي تاراپتارى اراسىنداعى كەلىسسوزدەر ارقىلى تەزىرەك شەشىلۋىنە نيەتتەستىك ءبىلدىردى.

مەملەكەتتەر باسشىلارى الداعى ۋاقىتتا دا بايلانىستى جالعاستىرا بەرۋ جونىندە ۋاعدالاستى.

تەلەفون ارقىلى سويلەسۋگە ۋكراينا جاعى باستاماشى بولدى.

Abai.kz