تۋرا ەلۋ جىل بۇرىنعى وقيعا ەسىمە ءتۇسىپ وتىر. وسى فب-تە مەنىڭ كاكەن حامزا، مىرزان كەنجەباي سەكىلدى ءبىر كۋرستا وقىعان دوستارىم وتىر. جالعان ايتقىزباس.
وندا دا قىس ايى. ستەكلوۆا دەگەن پروفەسسور، ەۆرەي ايەلى ساباق بەردى. بىردە سول پروفەسسور "سەندەر قازاقتار..." دەپ ستولدى سوققانى. كۋرستا ەلۋ بالا وقيمىز. ول كەزدە قازاقستانداعى جالعىز ۋنيۆەرسيتەتتىڭ جۋرناليستيكا جانە زاڭ فاكۋلتەتتەرىنە ەكى جىلدىق ەڭبەك وتىلىمەن قابىلدايدى. ءبىر-جار جىگىت ۆەتنامدا وق-ءدارىنىڭ ءيىسىن الىپ كەلگەن. ءبىر سوزبەن ايتسام، ازداپ ءومىر تاجىريبەمىز بار. بۇكىل كۋرس ورنىمىزدان تىك تۇرىپ، اۋديتوريادان شىعىپ كەتتىك. ستەكلوۆانىڭ ەكىنشى ساباعىنان دا ول اۋديتورياعا كىرگەندە تۇگەلدەي كەتىپ قالدىق.
بۇل ول تۇستا كوز كورىپ، قۇلاق ەستىمەگەن سۇمدىق! ستەكلوۆا ءبىزدى جامانداپ دەكانىمىز تاۋمان اماندوسوۆقا بارىپتى. تاۋمان اعا كۋرستى جينادى. داۋىس شىعارماي، بايىپپەن، جاعدايدى سۇرادى. تاۋكەڭنىڭ ءتۇسى اسا سۋىق ەدى. وسى جولى ءىشى سونداي جىلى ەكەنى ۇقتىق. وقيعا بارىسىن الماي-قوسپاي ايتىپ بەردىك.
-راسىمەن وسىلاي ما؟-دەگەن دەكانىمىز كىجىنىپ قالدى، قازاقشىلىعى بەتىنە تەپتى-وڭباعان! مەن رەكتورعا باياندايمىن. سەندەر ومىربەك جولداسبەكوۆ جولداسپەن كەزدەسكەنشە ول قاتىننىڭ ساباعىنا بارماڭدار!
بۇل، ەندى، ەرلىك ەدى. كومپارتيا دۇرىلدەپ تۇرعاندا قازاقتىڭ ءسوزىن سويلەۋ تاۋمان اعامىزدىڭ قىزمەتىنە زالالىن تيگىزۋى مۇمكىن. اعامىز ۇرمادى دا. ەكى-ءۇش كۇندە كەزدەسۋگە رەكتوردىڭ ءوزى-ومىربەك جولداسبەكوۆ كەلدى. بولعان جايتتى جان-جاقتى سۇرادى. اڭعاردىق، ىزىدان جارىلايىن دەپ وتىر. ورنىنان تۇرىپ:
-مەن ءوز ۇلتىمدى قورلاتىپ، كورىنگەندى ۇرگىزىپ قويمايمىن! ءسوزىم وسى. سەندەر وتە دۇرىس ىستەگەنسىڭدەر. ۇلتتى مازاق ەتكىزبەگەندەرىڭە مىڭ راحمەت!-دەدى دە، قوشتاسىپ شىعىپ كەتتى.
سوۆەت ۇكىمەتىنىڭ تۇسىندا سسسر-ءدىڭ عىلىمى، مادەنيەتى، ونەرى، ادەبيەتى ەۆرەيلەردىڭ قولىندا بولاتىن. ستەكلوۆانى جازالاۋ سول ەۆرەيلەرگە تاس اتۋ، ومىربەك اعانىڭ ءوز باسىنا قاۋىپتى ەكەنىن ول كەزدە قايدان بىلەيىك. قازىر عوي تۇسىنگەنىمىز. سوندا دا ستەكلوۆانى ايداپ شىقتى. ورنىنا ساگالوۆيچ دەگەن كەلىنشەك كەلدى. كەلە جىلى ۇشىرادى. باسىندا بىزدەن سەسكەنىپ، وسىنداي مىنەز تانىتا ما دەپ ويلايتىنبىز. كەلە-كەلە، جوق، وتە جاقسى ادام ەكەنىنە كوز جەتتى.
ومىربەك اعامىزدىڭ وسى ەرلىگى، سسسر تۇسىندا ەۆرەي پروفەسسوردى قازاقتىڭ، قازاق بالالارىنىڭ الدىنا جىعىپ بەرۋى، بولمايتىن وقيعا ەدى. ومەكەڭ جاسادى سونى. باتىر ەكەن مارقۇم!
ال، بۇگىن شە؟ ماياتاس، مولوۆودنوە، شەڭگەلدى وقيعالارى كەزىندە، كەشەگى قاراعاندىدا قازاق قانعا بوككەندە بۇگىنگى بيلىكتەن ومىربەك اعانىڭ ايتقانىن قايتالاعان ءبىر ادام شىقتى ما؟ جوق. بار كۇش قولىمىزدا تۇرعاندا بىرەۋى وشاڭ ەتپەدى. قاراعاندىنىڭ دەپۋتاتتارى اۋزىن بۋعان قاپتاي بولىپ وتىر. سوندا...
ءبىز كىمگە ارقاپ سۇيەپ ءجۇرمىز؟

كامال ءابدىراحماننىڭ facebook پاراقشاسىنان

Abai.kz