ەكىنشى دۇنيەجۇزىلىك سوعىستا پولشا بومبانىڭ استىندا قالدى. شارۋاشىلىق تۇگەل كۇيرەدى. الەمگە كوپەرنيكتەي عالىم، شوپەندەي سازگەر سىيلاعان ۆارشاۆانىڭ 90 پايىزى جويىلىپ كەتتى. ءيا، ءبىر ەلدىڭ ونداعان عاسىرلاردان بەرى جيىپ-تەرگەن دۇنيەسى بىرنەشە جىلدىڭ ىشىندە تۇگەل دەرلىك قيراپ قالدى. وسىدان بىرنەشە جىل بۇرىن عانا اسقاقتاپ تۇرعان سارايلار، ونەركاسىپ ورىندارى تەاترلار مەن كىتاپحانالاردىڭ كۇل-پارشاسى شىقتى.  ەندى قاراڭىز.

سوعىستان كەيىن مايدان دالاسىندا شاشىلىپ جاتقان تاس كىرپىشتەردىڭ ورنىنا عاجايىپ ۆارشاۆا قايتا تۇرا قالدى.  قازىر ۆارشاۆاعا بارىپ كورىڭىز. قۇددى ەشتەڭە بولماعانداي. كورولدەر تۇرعان، شوپەننىڭ تۇنگى سوناتاسىن تىڭداپ، ميتسكەۆيچتىڭ جىرىنا بالقىعان ۆارشاۆانى كورەسىز. قۇرىلىستىڭ ءمىنسىز شىققانى سونشا 1980 جىلى يۋنەسكو-نىڭ  «الەمدىك مۇراسىنا» ەندى.

ادامنىڭ اقىل-ويىنىڭ قۇدىرەتىنە تاڭ قالىپ، ءتىپتى كوزىڭىزگە جاس الۋىڭىز مۇمكىن. ويلاپ قاراڭىزشى، 90% جويىلىپ كەتكەن قالا دىم بولماعانداي قايتا قۇلپىرىپ كەتتى.

بۇل وقيعا كوپ نارسەنى اڭعارتتى. قاراپ وتىرسىز با، ءبىر دۇربەلەڭ كەلسە مىڭداعان جىلدان بەرى جيعان ماتەريالدىق دۇنيەڭىز ءبىر ساتتە تاس-تالقان بولادى. ال ادامنىڭ ميى دەگەن بار. ونى ەشكىم سىزدەن تارتىپ الا المايدى. ونى جاراتۋشىدان باسقا ەشكىم جويىپ جىبەرە المايدى. ءسىز سول جۇدىرىقتاي ميدىڭ ارقاسىندا ءبارىن قايتا تۇرعىزا الاسىز. سەبەبى سول نارسەلەردى كەزىندە ءسىزدىڭ اقىل-ويىڭىز تۇرعىزدى. ءان – الەمدى تەربەگەنىمەن، ءاندى ءانشى جازادى. مىنا جەر بەتىندەگى بارلىق ماتەريالدىق يگىلىكتەر بار بولعانى ءبىزدىڭ اقىل-ويىمىزدىڭ جەمىسى عانا.

عاجايىپ عيمارات، ءساندى دۇكەن، قىمبات ماشينا ايتەۋىر ءبىر كۇندەرى جويىلادى. ءسىز مۇناي مەن گازعا سەنەسىز بە؟ وعان مۇلدە سەنبەڭىز. بىزدە جەر استى بايلىق توگىلىپ جاتىر. ال سول توگىلىپ جاتقان بايلىقتان قالتاڭىزعا ەڭ بولماعاندا 15 تەڭگە تۇسە مە؟ اتا-بابام قورعاعان جەردىڭ بايلىعىنىڭ ارقاسى دەپ ەڭ قۇرىعاندا دۇكەننەن ءبىر بولكە نان تەگىن الا الاسىز با؟

بىزدە ءبارى بار. بىراق بىزدە ەشتەڭە جوق! وسىنى مويىندايتىن كەز كەلدى.

مەن بۇل جەردە باسقا نارسە ايتقىم كەلىپ وتىر.

ۆارشاۆا وقيعاسى – ادام اقىل-ويىنىڭ قانشالىقتى كۇدىرەتتى ەكەنىن كورسەتتى. ناعىز بايلىق ءبىز ويلاعانداي جەر قىرتىسىندا ەمەس، ادامنىڭ مي قىرتىسىندا ەكەنىن دالەلدەدى.

ءدال قازىرگى تۇرىمىزبەن ۆارشاۆانىڭ ەرلىگىن قايتالاي الامىز با؟

الدە نەمىستىڭ ماشينەسىن، اراب-تۇرىكتىڭ عيماراتىن، فرانتسۋزدىڭ ءاتىرىن، امەريكانىڭ ايفونىن،كورەيدىڭ سامسۋنگىن، ەڭ اقىرى قىرعىزدىڭ كيىمىنە دەيىن سىپىرىپ السا كوشپەندى بابامىزعا ۇقساپ دالادا مال باعىپ كەتەمىز بە؟

باسشىلىقتىڭ قۇلاعىنا التىن سىرعا. بيۋدجەتتى يگەرە الماي تابان ەت، ماڭداي تەرمەن كەلگەن حالىقتىڭ اقشاسىن تۇسىنىكسىز جوبالارعا سالىپ، ودان قالعانىن ۇرتتاپ-جالاپ، سوڭىندا اقشانىڭ قايدا كەتكەنىن بىلمەي ءبىر بىرىنە جىپىلىقتاپ قاراپ وتىرعانشا سول اقشانى  ادامنىڭ ميىن دامىتۋعا سالسىن. سوسىن قارا دا تۇرسىن.  جاستاردىڭ ءوزى «رۋحاني جاڭعىرۋدىڭ» قانداي بولاتىنىن كورسەتەدى ولارعا.

رىسبەك رامازانۇلى

Abai.kz