Transparency International (TI) حالىقارالىق ۇيىمى جىل سايىنعى جەمقورلىق يندەكسىن جاريالادى. ۇيىم ەسەبىندە 2018 جىلى شىعىس ەۋروپا مەن ورتالىق ازيا ەلدەرىنىڭ "مەملەكەتتىك جانە قوعامدىق سالالاردا سىبايلاس جەمقورلىق دەڭگەيىن ازايتۋدا ىلگەرى باسپاي، ايماقتا دەموكراتياعا قاۋىپ توندىرگەنى" ايتىلعان.

2017 جىلى جەمقورلىق يندەكسىندە 31 بالمەن 131-ورىندا تۇرعان قازاقستان 2018 جىلى ءدال سونداي 31 بالمەن ەكى ساتى تومەندەپ، دجيبۋتي، گابون، مالديۆ جانە نەپالمەن قاتارلاسقان. قازاقستان 2016 جىلى جەمقورلىق يندەكسىندە 123-ورىندا بولعان ەدى.

​Transparency Kazakhstan ۇيىمىنىڭ اتقارۋشى ديرەكتورى ولگا شياننىڭ سوزىنشە، TI ەسەبىندە قازاقستان قارجى مينيسترلىگى قۇرىلىمىن كوررۋپتسيا جايلاعانىن، ال ىشكى ىستەر مينيسترلىگى وزىنە جۇكتەلگەن قىزمەت مىندەتىن اتقارۋعا "دارمەنسىز" ورگانعا اينالعانىن اتاپ كورسەتكەن. ولگا شيان قازاقستاننىڭ بيىل دا 31 بالل الۋى "وڭ ءۇردىس" ەكەنىن جانە "ەۋروپالىق زەرتتەۋ ينستيتۋتتارى كوررۋپتسياعا قارسى قابىلدانعان شارالارعا باعا بەرگەنىن" ايتادى.

الەم بويىنشا تالداۋ جاساعان ۇيىم ەسەبىندەگى 180 ەلدىڭ ۇشتەن ەكىسىنەن كوبى 2018 جىلى جەمقورلىقپەن كۇرەستە ەڭ جوعارعى 100 بالدىڭ جارتىسىن دا جيناي الماعان. بالل نەعۇرلىم از بولسا، مەملەكەتتىڭ جەمقورلىق يندەكسىندەگى ورنى دا تومەندەي بەرەدى.

بۇرىن سوۆەت وداعى قۇرامىندا بولعان ەلدەردەن ەستونيا 18-ورىندا، ليتۆا – 38-ورىندا، گرۋزيا مەن لاتۆيا - 58-ورىندا، ال بەلارۋس 70-ورىندا اتالعان. ورتالىق ازيا ەلدەرى اراسىندا جەمقورلىق يندەكسىندە تۇركىمەنستان - 161, وزبەكستان - 158, تاجىكستان - 152, ال قىرعىزستان 132-ورىندا تۇر. رەسەي بىلتىرعىمەن سالىستىرعاندا ءۇش ساتى تومەندەپ، 138-ورىنعا تۇسكەن.

Abai.kz