قازاقستان پرەزيدەنتى حالىقتىڭ تۇرمىس ساپاسى مەن ءال-اۋقاتىن ارتتىرۋ مەملەكەتتىڭ نەگىزگى مىندەتى سانالاتىنىن ايتتى. بۇل تۋرالى اقوردانىڭ رەسمي سايتى جازدى.

– ەڭ باستىسى – الەۋمەتتىك ماسەلەلەر، كوممۋنالدىق قىزمەتكە قاتىستى تاريفتەر، اسا قاجەتتى ازىق-تۇلىك پەن ءدارى-دارمەك باعاسى. مۇنىڭ ءبارىن سىزدەر ايرىقشا باقىلاۋدا ۇستاۋلارىڭىز كەرەك، – دەدى مەملەكەت باسشىسى.

نۇرسۇلتان نازارباەۆ جىلۋ بەرۋ ماۋسىمى اياقتالعانعا دەيىن تۇرعىن ءۇي-كوممۋنالدىق شارۋاشىلىق نىساندارىنىڭ ۇزدىكسىز جۇمىس ىستەۋىن قامتاماسىز ەتۋ، سونداي-اق كۇننىڭ جىلىنۋىنا بايلانىستى سۋ تاسقىنى قاۋپىنىڭ الدىن الۋ ماسەلەلەرىنە ارنايى توقتالدى.

– بىلتىر اپاتتى جاعدايلار كوپ بولدى، بيىل ونىڭ قايتالانۋىنا جول بەرمەۋ كەرەك. تابيعاتتىڭ قاۋىپ-قاتەرلەرىنە قارسى شۇعىل ارەكەت ەتىپ، الدىن الا ءتيىستى شارالار قابىلداۋ قاجەت. شىعىس قازاقستان وبلىسىنىڭ ءۇرجار اۋدانىندا 800-دەي ادام مەن 280 اۆتوكولىك قار قۇرساۋىندا قالىپ قويعان. ءبىز ادامداردى قاۋىپتى جاعدايدا قالدىرماۋىمىز كەرەك. توتەنشە جاعدايلاردىڭ سالدارىن جويۋ، ونىڭ الدىن الۋعا قاراعاندا، بىرنەشە ەسە قىمباتقا تۇسەدى، – دەدى ەلباسى.

سونىمەن قاتار، قازاقستان پرەزيدەنتى ازاماتتاردىڭ ارىزدارى مەن وتىنىشتەرىن ءوزارا ءىس-قيمىلدىڭ «كەدەرگىسىز» فورماتىن قالىپتاستىرۋ ارقىلى شۇعىل قاراستىرۋ قاجەت ەكەنىن ايتتى.

مەملەكەت باسشىسى ەلىمىزدەگى وڭ وزگەرىستەردىڭ باستى قوزعاۋشى كۇشى سانالاتىن بەلسەندى جاستارمەن جۇمىس جۇرگىزۋ قاجەتتىگىنە نازار اۋداردى.

– مەن جاقىندا جاستارمەن كەزدەستىم. وڭىرلەرىڭىزدە تالاپتى جاس ازاماتتار بار. ەگەر ءبىر رەت بولسا دا ولاردىڭ باسىن قوسىپ، اڭگىمەلەسسەڭىزدەر، كوپتەگەن ماڭىزدى ۇسىنىستار ەستيسىزدەر. قوعامنىڭ وسىنداي بەلسەندى وكىلدەرىن جۇمىسقا تارتىپ، ولاردى وزگەلەرگە ۇلگى ەتۋ كەرەك، – دەدى نۇرسۇلتان نازارباەۆ.

ەلباسى وڭىرلەردەگى ازاماتتاردىڭ جەكە قاۋىپسىزدىگى مەن قوعامدىق ءتارتىپتى قامتاماسىز ەتۋ ىسىنە وبلىستاردىڭ جانە رەسپۋبليكالىق ماڭىزى بار قالالاردىڭ اكىمدەرى جاۋاپ بەرەتىنىن ايتتى.

– ءبىز قۇقىق قورعاۋ جۇيەسىن رەفورمالاۋعا كىرىستىك. سىزدەرگە پوليتسيا دەپارتامەنتتەرىنىڭ باستىقتارىن تاعايىنداپ، قوعامدىق ءتارتىپتى ساقتاۋ جانە قۇقىق بۇزۋشىلىقتىڭ الدىن الۋ جونىندە مىندەتتەر بەلگىلەۋ قۇقىعىن بەردىك. سىزدەر جەرگىلىكتى جەرلەردەگى ءتارتىپ ءۇشىن سولارمەن بىردەي جاۋاپ بەرەسىزدەر، – دەدى قازاقستان پرەزيدەنتى.

مەملەكەت باسشىسى كوكتەمگى دالا جۇمىستارىن تەحنيكامەن، تۇقىممەن، تىڭايتقىشپەن جانە جانار-جاعارمايمەن ۋاقتىلى قامتاماسىز ەتۋ، سونداي-اق بىرقاتار ءىرى اۋىل شارۋاشىلىعى تاۋارلارىن وندىرۋشىلەردىڭ قارىزىنا قاتىستى ماسەلەلەردى شەشۋ قاجەتتىگىنە ارنايى توقتالدى.

سوڭىندا نۇرسۇلتان نازارباەۆ پرەزيدەنت اكىمشىلىگىنە بۇگىن جۇكتەلگەن بارلىق مىندەتتەردىڭ ىسكە اسىرىلۋىن باقىلاۋعا الۋدى تاپسىردى.

Abai.kz