ءبىز ماقساتتى باعىتىمىزدىڭ العاشقى مەجەسىنە قول جەتكىزگەندىك. كۇنى كەشە پاريجدە الەمدەگى  ەڭ ۇزدىك 10 اگرارلىق جوو-نىڭ قاتارىنا كىرەتىن AgriParisTech ۋنيۆەرسيتەتىمەن (فرانتسيا) ىنتىماقتاستىق تۋرالى مەموراندۋمعا قول قويىلدى .

بۇدان بىلاي، ءبىز فرانتسۋز پروفەسسورلارىمەن حالىقارالىق دەڭگەيدەگى جاڭا وقۋ باعدارلامالارىن بىرلەسە ازىرلەپ، ءبىلىم بەرۋ ۇدەرىسىنە ەنگىزەتىن بولامىز، ال ءارى قاراي، ەگەر بارلىعى جوسپارلاعانىمىزداي بولسا، ولارمەن قوس ديپلومدى ءبىلىم بەرۋگە كوشەمىز. مۇنداي مىندەتتى ءبىزدىڭ الدىمىزعا پرەمەر-ءمينيستردىڭ ورىنباسارى - اۋىل شارۋاشىلىعى ءمينيسترى ءو.ە.شوكەەۆ، ۇلتتىق اگرارلىق عىلىمي-ءبىلىم بەرۋ ورتالىعىنىڭ  باسشىلىعى قويىپ وتىر.

بىزگە وسىنداي اۋىل شارۋاشىلىعى باعىتىندا ءبىلىم بەرەتىن الەمدىك كوشباسشىنىڭ كەلۋىن «تىڭ وزگەرىستەرگە جاسالعان العاشقى قادامنىڭ باسى» دەپ باعالاعان ءجون. دەگەنمەن، بۇل شەشىمدى فرانتسۋز ارىپتەستەرىمىز قاتۋ-دىڭ وقىتۋشىلارى مەن ستۋدەنتتەرىنىڭ الەۋەتتى مۇمكىندىكتەرىن جان-جاقتى زەرتتەپ، ۇزاق ويلانىپ بارىپ قابىلداعانىن ايتا كەتۋ كەرەك. مۇنداي كوشباسشىلارمەن سەرىكتەستىككە قول جەتكىزۋ دە وڭاي ەمەس، سەبەبى بۇل ۋنيۆەرسيتەتتەر ءۇشىن وزدەرىنىڭ جەكە ءيميدجى ءبىرىنشى ورىندا.

ەندى، ەڭ باستىسى، قاتۋ-دىڭ دامۋ باعدارلاماسىن تابىستى، ءارى مەرزىمىندە جۇزەگە اسىرۋ ءۇشىن مەملەكەتتىك بيۋدجەتتەن قاراجات ءبولۋ قاجەت.

الداعى ۋاقىتتا ءبىز دە ءوز ەلىمىزدە الەمنىڭ ۇزدىك ۋنيۆەرسيتەتتەرىندەگى سياقتى اۋىل شارۋاشىلىعىنىڭ كاسىبي ماماندارىن دايىنداي الاتىنىمىزعا سەنىمدىمىن. ويتكەنى ءبىز مۇنى قالاي ىستەۋ كەرەكتىگىن بىلەمىز جانە كەزىندەگى سينگاپۋر، مالايزيا، ارگەنتينا، چيلي، قىتاي جانە باسقا دا ەلدەردىڭ جەتەكشى ۋنيۆەرسيتەتتەرى وتكەن جولمەن ءجۇرىپ كەلەمىز. بىراق ولاردىڭ قالىپتاسۋىنا مەملەكەت قولداۋ كورسەتىپ، قارجىلاندىرۋى ارقاسىندا قازىرگى دەڭگەيگە جەتىپ وتىر.

بىزگە دە بۇگىن مەملەكەت تاراپىنان وسىنداي قولداۋ قاجەت. دامىعان ەلدەردىڭ قول جەتكىزگەن ناتيجەلەرىن كورە وتىرىپ، ءبىر جەردە تۇرا بەرۋگە بولمايدى. ءبىز «ءبىلىم بەرۋگە سالىنعان ينۆەستيتسيا– قايتارىمدى ينۆەستيتسيا» دەيمىز. ەندەشە، مۇنى ناقتى جوبالارمەن ىسكە اسىرۋدىڭ ۋاقىتى كەلگەندەي.

س.سەيفۋللين اتىنداعى قازاتۋ رەكتورى ا.ق.كۇرىشباەۆ

Abai.kz