جۇيەنىڭ بازالىق فۋنكتسيونالى تەگىن بولادى دەگەن مينيسترلىكتىڭ مالىمدەمەسىنە قاراماستان مەكتەپ وقۋشىلارى ەلەكتروندى «كۇندەلىككە» نەگە اقى تولەيدى؟

ءدال وسىنداي ساۋالدى ءماجىلىس دەپۋتاتى كەڭەس ابساتيروۆ پرەمەر-ءمينيستردىڭ ورىنباسارى ەربولات دوساەۆقا جولدادى. اڭگىمە 2016 جىلدان بەرى پيلوتتىق جوباعا ەنگىزىلگەن ساتتەن بەرى ۇنەمى سىنعا ۇشىراپ جۇرگەن «كۇندەلىك» اۆتوماتتاندىرىلعان اقپاراتتىق جۇيەسىن ىسكە قوسۋ جونىندە بولىپ وتىر

دەپۋتات 2018 جىلدىڭ مامىر ايىندا «اق جول» فراكتسياسىنىڭ «كۇندەلىك» جۇيەسىن ەنگىزۋدىڭ زاڭدىلىعى مەن قاۋىپسىزدىگىنە قاتىستى دەپۋتاتتىق ساۋالىنا بەرگەن جاۋابىندا ءبىلىم جانە عىلىم ءمينيسترى ونىڭ دەرەكتەرى مينيسترلىكتىڭ مەملەكەتكە تيەسىلى سەرۆەرىندە ساقتالادى دەپ تۇسىنىكتەمە بەرگەنىن ەسكە سالىپ ءوتتى. الايدا سول جىلدىڭ كۇزىندە «كۇندەلىك» جۇيەسى «اقپاراتتاندىرۋ تۋرالى» زاڭدا قاراستىرىلعان اقپاراتتىق قاۋىپسىزدىك تالاپتارىنا سايكەستىگىن انىقتايتىن سىناق راسىمدەرىنەن وتپەگەنى انىقتالدى. سايكەسىنشە، ونى پايدالانۋعا بەرۋ، ونىڭ ۇستىنە مەملەكەتتىك ورگاننىڭ اقپاراتتىق جۇيەسىمەن بىرىكتىرۋ مەرزىمىنەن بۇرىن ىسكە قوسىلعان.

«2018 جىلدىڭ قاڭتار ايىندا سىناپ كورۋدىڭ وڭ ناتيجەسى كورسەتىلۋى ءتيىس اكتىسى، تەحنيكالىق قۇجاتتامانى ساراپتاۋ جانە اقپاراتتىق قاۋىپسىزدىك تالاپتارىنا سايكەستىك اتتەستاتى بولماي جاتىپ مەملەكەتتىك-جەكە مەنشىك ارىپتەستىك تۋرالى كەلىسىمشارت قالايشا جاسالعان؟»، - دەپ «اقجولدىقتار» ساۋال قويا وتىرىپ، كەلەسى ماسەلەگە نازار اۋداردى.

«كۇندەلىكتى» ازىرلەۋشىلەر مەن ءبىلىم مينيسترلىگىنىڭ وكىلدەرى ءبىر ەمەس بىرنەشە مارتە جۇيەنىڭ بازالىق فۋنكتسيونالى ءۇشىن مەكتەپ وقۋشىلارى مەن ونىڭ اتا-انالارىنان ەشقانداي اقى الىنبايدى دەپ مالىمدەگەن بولاتىن.

سوندىقتان دا اتالعان رەسۋرستى قولدانۋدى شىن مانىندە ماجبۇرلەپ مىندەتتەۋگە جانە ءموبيلدى قۇرىلعى ارقىلى «كۇندەلىك» جۇيەسىندە كورسەتىلەتىن قىزمەتتەردىڭ باسىم بولىگىنە قول جەتكىزۋ ءۇشىن اقى تولەۋگە قاتىستى اتا-انالاردىڭ نارازىلىق ءبىلدىرۋى ابدەن تۇسىنىكتى (اعىمداعى جىلدان باستاپ ايىنا 299 تەڭگە نەمەسە ءبىر جىلعا 2690 تەڭگە).سونىمەن قاتار، پايدالانۋشىنىڭ ءوتىنىشى بويىنشا اقىلى نەگىزدە ارنايى قوسىمشا جۇيە مۇمكىندىگىن قامتاماسىز ەتەتىن پايدالانۋشى كەلىسىمىنىڭ 2.3 تارماعىنا قاراما قايشى كەلىپ، بۇل ەشبىر الدىن الا حابارلاندىرۋسىز جۇرگىزىلگەن. بۇل قىزمەت اقىلى سەرۆيستىك قىزمەت كورسەتۋ تۋرالى كەلىسىممەن رەتتەلۋى ءتيىس ەدى.

بۇدان باسقا، دەپۋتاتتاردىڭ پىكىرىنشە، پايدالانۋشىلار تۋرالى ءۇشىنشى تۇلعالارعا اقپارات بەرۋمەن بايلانىستى تۋىندايتىن پايدالانۋشى كەلىسىمىنىڭ كەيبىر تارماقتارىنىڭ زاڭدىلىعىنا قاتىستى دا ماسەلەلەر بار. بۇل جەردە اڭگىمە كونستيتۋتسيانىڭ 18-بابىندا كوزدەلگەن ازاماتتاردىڭ جەكە مەنشىك، دەربەس ءومىرى جانە وتباسىلىق قۇپيالارى جونىندە بولىپ وتىر.

وسىعان بايلانىستى، «اق جول» پارلامەنتتىك فراكتسياسى ۆيتسە-پرەمەردەن:

1.قۇزىرەتتى ورگاندارعا «قازاقستان رەسپۋبليكاسىنداعى «كۇندەلىك» اۆتوماتتاندىرىلعان اقپاراتتىق جۇيەسىن قۇرۋ، ەنگىزۋ جانە ونى ىسكە قوسۋدى قامتاماسىز ەتۋ» جوباسى بويىنشا مەملەكەتتىك-جەكە مەنشىك ارىپتەستىك كەلىسىمشارتىن جاساسۋ كەزىندە اقپاراتتىق قاۋىپسىزدىكتى قامتاماسىز ەتۋ سالاسىنداعى زاڭنامانىڭ تالاپتارىن ساقتاۋىنا تەكسەرىس جۇرگىزۋدى تاپسىرۋ;

1.سالالىق مينيسترلىككە «كۇندەلىك» اقپاراتتىق جۇيەسىن قولدانۋشىلارىنىڭ بازالىق اقپاراتتىق رەسۋرستارعا، سونىڭ ىشىندە ءموبيلدى بايلانىس قۇرىلعىلارىن پايدالانۋ ارقىلى ەمىن-ەركىن ءارى تەگىن قولجەتىمدىلىكتى قامتاماسىز ەتۋدى سالالىق مينيسترلىككە جۇكتەۋ;

2.ادىلەت مينيسترلىگىنە قازاقستان رەسپۋبليكاسى زاڭناماسىنىڭ تالاپتارىنا سايكەستىگىن انىقتاۋ ءۇشىن پايدالانۋشى كەلىسىمىنە ساراپتاما جۇرگىزۋدى تاپسىرۋىن سۇرادى.

«اق جول» قدپ جانە ونىڭ پارلامەنتتىك فراكتسياسى سايلاۋالدى باعدارلامانى جۇزەگە اسىرۋ بويىنشا جۇمىستاردى جالعاستىرۋدا.

Abai.kz