قر پرەزيدەنتى ن.نازارباەۆتىڭ “قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك” اتتى قازاقستان حالقىنا ارناعان جولداۋىندا ۇكىمەتكە “تسيفرلى قازاقستان” باعدارلاماسىن ازىرلەۋدى جانە قابىلداۋدى تاپسىرعان بولاتىن. بۇل باعدارلامانىڭ باستى ماقساتى - قازاقستاندىقتاردىڭ ءومىر ساپاسىن ارتتىرۋ، ءارى ۇلتتىق ەكونوميكانى تسيفرلاندىرۋ. جانە  2020 جىلعا دەيىن ينتەرنەت قولدانۋشىلاردىڭ سانىن 80 پايىزعا دەيىن ارتتىرۋ، تۇرعىنداردىڭ 95 پايىزىن تسيفرلىق xابار تاراتۋمەن قامتۋ، ازاماتتاردىڭ تسيفرلىق ساۋاتتىلىعىن 80 پايىزعا دەيىن ارتتىرۋ.

وسىعان سايكەس، قۇرىلىس جانە تۇرعىن ءۇي-كوممۋنالدىق شارۋاشىلىق سالاسىن تسيفرلاندىرۋ شەڭبەرىندە دە ءبىراز جۇمىستار اتقارىلىپ جاتىر. بيىل بۇل سالانى تسيفرلاندىرۋ بويىنشا 2 جوبا جۇزەگە اسىرىلادى. ولار - قۇرىلىس ساپاسىن باقىلاۋمەن جانە وبەكتىلەردى پايدالانۋعا قابىلداۋمەن بايلانىستى ە-QURYLYS تسيفرلىق پورتالى جانە پيك-ءتىڭ كوممۋنالدىق قىزمەتتەرى مەن جۇمىسىن تۇتىنۋدىڭ اشىقتىعىن قامتاماسىز ەتەتىن ە-SHANYRAQ اقپاراتتىق جۇيەسى.

ايتا كەتۋ كەرەك، وتكەن جىلى رەكوردتىق 12,5 ملن. شارشى مەتر تۇرعىن ءۇي پايدالانۋعا بەرىلدى. بۇل 2017 جىلعى دەڭگەيدەن 12,1%-عا جوعارى. بارلىق وڭىرلەردە تۇرعىن ءۇي قۇرىلىسى بويىنشا وڭ سەرپىن بايقالادى. بۇل رەتتە ەداۋىر ءوسىم ماڭعىستاۋ (141%), اتىراۋ (127%), تۇركىستان (122%) جانە جامبىل (121%) وبلىستارىندا بايقالىپ وتىر.

2018 جىلى ءبىر تۇرعىنعا تۇرعىن ءۇيدى بەرۋ 0,68 شارشى مەتردى قۇرادى. بۇل تمد ەلدەرىنىڭ ىشىندە ەڭ جوعارى كورسەتكىش. اتاپ ايتار بولساق، رەسەيدە بۇل كورسەتكىش - 0,54 ش.م.، بەلارۋستە - 0,40 ش.م.، وزبەكستاندا - 0,36 ش.م. بولىپ وتىر.

113 مىڭنان استام وتباسىنىڭ تۇرعىن ءۇي جاعدايى جاقساردى، ونىڭ ىشىندە مەملەكەتتىك قاراجات ەسەبىنەن 14 مىڭنان استام وتباسى جالعا بەرىلەتىن جانە كرەديتتىك تۇرعىن ۇيمەن قامتاماسىز ەتىلدى.

«7-20-25» باعدارلاماسىن ىسكە اسىرۋ ءۇشىن ينجەنەرلىك كوممۋنيكاتسيالاردىڭ قۇرىلىسىن قارجىلاندىرۋ 100 ملرد. تەڭگەگە دەيىن ارتتى. بيىلعى قۇرىلىس قارقىنى بىلتىرعىدان كەم بولمايدى. جالپى 2019 جىلى 13 ملن. شارشى مەتر تۇرعىن ءۇي سالۋ جوسپارلانۋدا. ونىڭ ارقاسىندا شامامەن 118 مىڭ وتباسى تۇرعىن ۇيمەن قامتاماسىز ەتىلەدى.

قۇرىلىس سالاسىنداعى تاعى ءبىر وزەكتى ماسەلە - جوبالاۋ جانە قۇرىلىس كەزەڭىندەگى وتاندىق ماتەريالداردى قولدانۋ ماسەلەسىن ۇكىمەت ەرەكشە باقىلاۋىنا الدى. وتكەن جىلدىڭ قورىتىندىسى بويىنشا قۇرىلىستاعى قازاقستاندىق  قامتۋ ۇلەسى 77%-ءتى قۇرادى.

وتكەن جىلدان باستاپ اۋىلدى سۋمەن جابدىقتاۋعا جىل سايىن بارلىق قارجىلاندىرۋ كوزدەرىنەن 100 ملرد. تەڭگە بولىنۋدە. وسىعان وراي، 84,4% اۋىلدىق ەلدى مەكەن ورتالىق سۋمەن جابدىقتاۋمەن قامتاماسىز ەتىلدى (6,5 ملن. ادام). 3 جىل ىشىندە قالا تۇرعىندارىن اۋىز سۋمەن قامتۋ 98%            (10,9 ملن.ادام) جانە  اۋىل تۇرعىندارىن اۋىز سۋمەن قامتۋ - 88,5% قۇرادى (6,9 ملن. ادام).

Abai.kz