جەكسەنبى, 17 اقپان 2019
511 1 پىكىر 8 اقپان, 2019 ساعات 13:08

بىرنەشە وبلىستا ايازعا بايلانىستى ساباق توقتاپ، جول جابىلدى

قازاقستاننىڭ سولتۇستىگى مەن ورتالىق ايماقتارىندا قاتتى ايازعا بايلانىستى ءبىلىم مەكەمەلەرى ۋاقىتشا جۇمىسىن توقتاتتى.

كوكشەتاۋ، قاراعاندى، پاۆلودار قالالارى مەن شىعىس قازاقستان جانە سولتۇستىك قازاقستان وبلىستارىنىڭ مەكتەپتەرىندە ساباق توقتادى. استانادا ءبىرىنشى اۋىسىمدا وقيتىن مەكتەپ وقۋشىلارى مەن كوللەدجدەردىڭ ءبىرىنشى كۋرس ستۋدەنتتەرى بۇگىن ساباققا بارمايدى.

اۋا رايىنىڭ بۇزىلۋىنا بايلانىستى بىرنەشە ايماقتا جولدار جابىلعان. "قازاۆتوجول" رەسپۋبليكالىق كاسىپورىنى پاۆلودار وبلىسىندا جولدار جابىلعانىن حابارلادى. استانادان بارلىق باعىتقا شىعاتىن جولدار دا جابىق تۇر. اقمولا، شىعىس قازاقستان جانە سولتۇستىك قازاقستان وبلىستارىندا قوعامدىق جانە ديزەل كولىكتەرىنىڭ قوزعالىسىنا شەكتەۋ قويىلعان.

اپتا باسىندا قازاقستان ىشكى ىستەر ءمينيسترىنىڭ ورىنباسارى يۋري يلين سۋىق تسيكلوننىڭ اسەرىنەن اۋا تەمپەراتۋراسى كۇرت سۋىپ، قار جاۋىپ، بۇرقاسىن بولادى دەپ ەسكەرتكەن. «قازگيدرومەت» كاسىپورىنى ەلدىڭ ون وبلىسىندا قاتتى اياز بولىپ، شىعىس قازاقستان وبلىسىندا اۋا تەمپەراتۋراسى -45 گرادۋسقا دەيىن تومەندەيتىنى تۋرالى اقپارات تاراتقان.

Abai.kz

1 پىكىر