بەيسەنبى, 25 ءساۋىر 2019
1040 1 پىكىر 8 اقپان, 2019 ساعات 13:15

حقو جاڭا قىزمەت تۇرىمەن تولىقتى

وزگە ەلگە تۇراقتى تۇرۋعا شىعاتىندار قۇجاتتارىن ميگراتسيالىق حقو ارقىلى راسىمدەي الاتىن بولادى

«ازاماتتارعا ارنالعان ۇكىمەت» مەملەكەتتىك كورپوراتسياسى ەڭبەك ميگرانتتارىنا ارنالعان كوشى-قون ورتالىقتارىندا كورسەتىلەتىن مەملەكەتتىك قىزمەتتەر سانىن ارتتىرادى. بۇدان بۇرىن اتالمىش ورتالىقتا شەتەلدىكتەر جۇمىس ىستەۋگە رۇقسات بەرەتىن قۇجاتتى الىپ، قر اۋماعىنا ۋاقىتشا كەلەتىندەر ءۇشىن جەكە سايكەستەندىرۋ ءنومىرى عانا بەرىلەتىن.

«ەلىمىز بويىنشا 12 كوشى-قون ورتالىعى جۇمىس ىستەيدى. بۇگىن كەزەكتىسىن قىزىلوردا قالاسىندا اشىپ وتىرمىز. قازاقستانعا كەلەتىن ەڭبەك ميگرانتتارى كوپ، بىراق بارلىعى قىزمەتىن زاڭداستىرا بەرمەيدى. بىرنەشە مەملەكەتتىك ورگاننىڭ اراسىنداعى سەرگەلدەڭنەن ولار قۇجاتتارىن رەتتەۋگە اسىقپايدى. كوشى-قون ورتالىعى – كولەڭكەدە جۇرگەن ەڭبەك ميگرانتتارىنىڭ زاڭدى تۇردە تىركەلۋىنە ىقپال ەتەدى. وسى رەتتە كوشى-قون حقو-سى ارقىلى كورسەتىلەتىن قىزمەتتەر سانى كوبەيەتىن بولادى»، – دەپ اتاپ ءوتتى مەملەكەتتىك كورپوراتسيانىڭ باسقارما توراعاسى ابلايحان وسپانوۆ قىزىلوردا قالاسىنداعى كوشى-قون ورتالىعىنىڭ اشىلۋ سالتاناتىندا.

2019 جىلعى اقپان ايىنىڭ سوڭىنا دەيىن كوشى-قون ورتالىقتارى ارقىلى كەلەسى قىزمەتتەر كورسەتىلەدى دەپ جوسپارلانۋدا:

* قر اۋماعىنا ۋاقىتشا كەلەتىن شەتەلدىكتەر مەن ازاماتتىعى جوق تۇلعالاردى تىركەۋ;

* قر تىسقارى ايماعىنا تۇراقتى تۇرۋعا شىعاتىنداردىڭ قۇجاتتارىن راسىمدەۋ;

* قر ۆيزالارىن بەرۋ بويىنشا قابىلداۋشى تۇلعالاردىڭ شاقىرۋلارىن قابىلداۋ جانە كەلىسۋ.

بۇگىندە ءىىم-مەن بىرلەسىپ اشىلعان ميگراتسيالىق حقو-دا ەڭبەك ميگرانتتارى قاجەتتى مەملەكەتتىك قىزمەت تۇرلەرىن «ءبىر تەرەزە» قاعيداتى بويىنشا الا الادى. بۇل جەردە مەديتسينالىق تەكسەرىس پەن داكتيلوسكوپيادان ءوتىپ، ساقتاندىرۋ ءپوليسىن دە قوسا راسىمدەۋگە بولادى. بۇرىن ميگرانتتار ەڭبەك ەتۋگە بەرىلەتىن رۇقسات قۇجاتتارىن الۋ جانە ونىڭ مەرزىمىن ۇزارتۋ ءۇشىن 6 مەملەكەتتىك مەكەمەگە بارىپ، 3-5 كۇنىن جۇمسايتىن. قازىر قاجەتتى قۇجاتتاردى كوشى-قون قىزمەتتەرىنىڭ ورتالىعى ارقىلى ءبىر ساعاتتىڭ ىشىندە راسىمدەۋگە بولادى.

ايتا كەتەيىك، قىزىلوردا قالاسىنداعى كوشى-قون قىزمەتتەرى ورتالىعىنىڭ اشىلۋ سالتاناتىنا وبلىس اكىمى قىرىمبەك كوشەرباەۆ، قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قىزىلوردا وبلىسى بويىنشا دەپارتامەنت باسشىسى ابزال مۋحيموۆ قاتىستى. 2018 جىلى وبلىس بويىنشا 11 مىڭنان اسا شەتەلدىك ميگرانت جۇمىس ىستەۋگە بەرىلەتىن رۇقسات قۇجاتىن راسىمدەدى.

Abai.kz

1 پىكىر