كەزدەسۋ بارىسىندا ع.ءابدىراحىموۆ شىمكەنتكە رەسپۋبليكالىق ماڭىزى بار قالا مارتەبەسىن بەرۋ تۋرالى شەشىم قابىلداعانى ءۇشىن مەملەكەت باسشىسىنا العىس ايتىپ، 2018 جىلدىڭ قورىتىندىسى بويىنشا بارلىق ماكروەكونوميكالىق كورسەتكىشتەردىڭ جاقسى ەكەنىن اتاپ ءوتتى.

– وتكەن جىلى 17 مىڭنان استام جاڭا جۇمىس ورنى اشىلدى. ورتاشا جالاقى مولشەرى 6,6 پايىزعا ءوسىپ، 113 700 تەڭگەگە جەتتى. ال، جان باسىنا شاققانداعى ورتاشا كىرىس كولەمى 19 پايىزعا ارتىپ، 60 427 تەڭگەنى قۇرادى. ءسىزدىڭ تاپسىرمالارىڭىزدى ورىنداۋ ماقساتىمەن تۇرعىندار ءۇشىن جىلۋدىڭ ءتاريفى 19 پايىزعا، سۋدىڭ ءتاريفى 10 پايىزعا، گازدىڭ ءتاريفى 5,8 پايىزعا جانە ەلەكتر قۋاتىنىڭ ءتاريفى 6,8 پايىزعا تومەندەتىلدى، – دەدى قالا اكىمى.

قازاقستان پرەزيدەنتى بەرىلگەن مالىمەتتەرمەن تانىسقان سوڭ، ءوڭىر اكىمدەرى حالىقتى الەۋمەتتىك تۇرعىدان قورعاۋ، ءبىلىم بەرۋ، دەنساۋلىق ساقتاۋ، كوممۋنالدىق قىزمەتتەردىڭ تاريفتەرىن رەتتەۋ، جولداردىڭ ساپاسى، اۋلالاردى اباتتاندىرۋ، كوشەلەردى جارىقتاندىرۋ، قوعامدىق قاۋىپسىزدىك، اۋىز سۋمەن جانە ەلەكتر ەنەرگياسىمەن قامتاماسىز ەتۋ، سونداي-اق قوعامدىق كولىك پەن كوممۋنالدىق قىزمەت كورسەتۋ مەكەمەلەرىنىڭ جۇمىستارى جونىندەگى ماسەلەلەردى ءاردايىم باقىلاۋدا ۇستاۋ كەرەكتىگىن ايتتى.

مەملەكەت باسشىسى بۇل ماسەلەلەر قازاقستان پرەزيدەنتى اكىمشىلىگىنىڭ ەرەكشە باقىلاۋىندا ەكەنىن اتاپ ءوتتى.

Abai.kz