دۇيسەنبى, 20 مامىر 2019
46 - ءسوز 1800 6 پىكىر 14 اقپان, 2019 ساعات 11:44

قايدا نەمەسە ابايدىڭ ەكىنشى سوزىنە پاروديا

مەن بالا كۇنىمدە ەستۋشى ەدىم، ءبىزدىڭ قازاق ورىستى كورسە، كۇلۋشى ەدى، ء"وي، ەنەڭدى ۇرايىن، ورىس، جامان ساسىق ورىس" دەپ، نەمىستى كورسە، ۇرسۋشى ەدى، "وڭباعان فاشيست" دەپ، امەريكاندىق كورسە، جامانداۋشى ەدى، "ويدان-قىردان جيىلعان وڭشەڭ تەكسىزدەر" دەپ، قىتاي كورسە، داتتاۋشى ەدى، "قۇرت-قۇمىرسقا جەگەن كاپىر ءشۇرشىت" دەپ...

اعالارىمىز اڭىز قىلۋشى ەدى: ء"بىزدىڭ اتا-بابامىز ساق-عۇندار التىننان تون كيگەن، ەدىل قاعان ەۋروپانى ەڭىرەتكەن، مودە قاعان قىتايدى موڭىرەتكەن، كۇلتەگىن بابام كوپ ەلگە ۇكىم ەتكەن، شىڭعىس حانىمىز دۇنيەنى تىتىرەتكەن، بەيبارىس سۇلتان مىسىردى كۇڭىرەنتكەن، ابىلاي حان ەكى دۇنيەنى ىعىر ەتكەن..." دەپ.

سوندا مەن ويلاۋشى ەدىم: ە، قۇداي، بىزدەن باسقا حالىقتىڭ ءبارى انتۇرعان، سورلى، بايعۇس ەكەن عوي، ەڭ ءتاۋىر، مىقتى، ەڭ باتىر حالىق ءبىز ەكەنبىز دەپ، الگى ايتىلعان سوزدەردى ءبىر ۇلكەن قىزىق كورىپ، قۋانىپ كۇلۋشى ەدىم...
ەندى قاراپ تۇرسام، ورىستىڭ بىزگە قىلماعانى جوق، ىستەمەگەن زورلىعى جوق، جاساماعان ونەرى جوق، نەمىستىڭ ويلاپ تاپپاعان ماشينەسى جوق، دۇنيەگە كورسەتپەگەن ۇلگىسى جوق، امەريكاندىقتىڭ الەمدە بيلەمەگەن، تىرناعىن باتىرماعان ەلى جوق، بايلىقتىڭ، جاقسىلىق، جاڭالىقتىڭ ءبارى سوندا، ءوزىمىز جەك كورەتىن قىسىق كوز، قارا قىتايدىڭ شىعارماعان بۇيىمى جوق، بىزگە ساتپاعان نارسەسى جوق، قازاققا ىستەمەگەن قورلىعى جوق.

ونىڭ ءبارى - ءبىرىن-ءبىرى قۋىپ قور بولماي، شارۋا قۋىپ، ونەر تاۋىپ، بوسقا قۋىپ سويلەمەي، عىلىم ىزدەپ، مال تاۋىپ زور بولعاندىق.
ولارعا ايتار سوزدە جوق، ءبىز ولاردىڭ قۇلى، كۇڭى قۇرلى دا جوقپىز. ايتپەسە، "ورىس قۇرتادى", "نەمىس شىرقادى", "امەريكا جىرتادى", "قىتاي تۇقىرتادى" دەگەن قورقاق مىنەز قايدان شىقتى؟

باعاناعى ماقتان، باعاناعى قۋانعان، باعاناعى بوسكەن، كۇلگەن سوزدەرىمىز قايدا؟ 30 ەلدىڭ قاتارىنا ەنگەنىمىز قايدا؟ ەلدىگىمىز قايدا؟ ەرلىگىمىز قايدا؟ جىگىتتەرىمىز قايدا؟ نامىسىمىز قايدا؟ قايدا ءبارى؟
قايدا كەتكەن؟!

سەرىكباي قىلىشبايدىڭ facebook پاراقشاسىنان

Abai.kz

6 پىكىر