اقش مەملەكەتتىك حاتشىسى مايك پومپەو ازاتتىق راديوسىنىڭ فاردا قىزمەتىنە بەرگەن سۇقباتىندا يرانداعى تەراكتىگە اقش-تىڭ نە ءيزرايلدىڭ قاتىسى بارىن ءۇزىلدى-كەسىلدى تەرىسكە شىعاردى. 13 اقپاندا يرانداعى تەراكتىدەن 40-تان اسا ادام قازا تاپقان.

تەراكت يراننىڭ وڭتۇستىك-شىعىسىنداعى سيستان پروۆينتسياسىنىڭ چاباحار قالاسىنداعى اسكەري بازاسى جانىندا بولعان. بيلىكتىڭ مالىمەتى بويىنشا، يسلام رەۆوليۋتسياسىنىڭ ساقشىلار كورپۋسىنىڭ مۇشەلەرى بار اۆتوبۋستى جانكەشتى جارىپ جىبەرگەن. 20-دان استام اسكەري قىزمەتكەر مەن بەيبىت ادامدار مەرت بولعان. بۇدان بولەك 20 ادام جاراقات العان.

يران ءسىم باسشىسى موحامماد جاۆاد زاريف تۆيتتەر پاراقشاسى ارقىلى يرانداعى تەراكت اياق استىنان بولماعانىن ايتادى. سول كۇنى ۆارشاۆادا تاياۋ شىعىس جونىندەگى حالىقارالىق كونفەرەنتسياسى باستالعان. وعان يزرايل، اقش جانە كوپتەگەن اراب مەملەكەتتەرى بار 60 ەلدىڭ وكىلدەرى قاتىسىپ جاتىر. ولاردىڭ ىشىندە پومپەو دا بار.

پومپەو ازاتتىققا بەرگەن سۇقباتىندا "اقش-تىڭ بۇل تەراكتىگە ەشقانداي قاتىسى جوق" دەپ مالىمدەدى.

"كوپتەگەن ەلدىڭ وكىلدەرى، ونىڭ ىشىندە ەۋروپالىق وكىلدەر بار، جاۆاد زاريفپەن كەزدەستى. ول ءوزىن ۇستامدى ساياساتكەر رەتىندە كورسەتەدى. بىراق سوڭعى مالىمدەمەسى ەشقانداي ۇستامدىلىققا جاتپايدى. تەراكت ءۇشىن امەريكالىقتار مەن يزرايلدىكتەردى ايىپتاۋ ۇستامدى پوزيتسياعا جاتپايدى. بۇل زاريف پەن پرەزيدەنت رۋحاني يراننىڭ وزگە ليدەرلەرى سەكىلدى راديكالدى ەكەنىن كورسەتەدى", - دەپ اتاپ ءوتتى پومپەو.

ول سونىمەن بىرگە كۇندەردىڭ ءبىر كۇنىندە يران وزگە ەلدەرگە قاۋىپ توندىرەتىن "راديكالدى" بولمايدى دەپ ۇمىتتەنەدى. بىراق ول ساياسي باعىت سىرتتىڭ اسەرىنەن ەمەس، يراننىڭ ىشىندە ءجۇرۋى ءتيىس دەپ ەسەپتەيدى. ول يراننىڭ قازىرگى ۇستانىپ وتىرعان ساياساتى تۇرعىنداردىڭ بارىنە بىردەي ۇناي بەرمەيدى دەگەن ويىن جەتكىزىپ، قازىرگى بيلىكتىڭ ارەكەتى كورشى ەلدەرگە قيىندىق تۋعىزىپ وتىر دەدى.

«كواليتسيا ءبىراۋىزدان يراننان كەلىپ جاتقان قاۋىپ شىنايى دەگەن ۇيعارىمعا كەلدى. مۇنداي پىكىردى بارلىق ەلدەر ايتتى. بۇل قاۋىپكە قانداي ارەكەت ەتۋ كەرەكتىگى بويىنشا ءارتۇرلى پىكىرلەر ايتىلدى. يران مەملەكەت رەتىندە تۇرعىنداردىڭ كومەگىمەن وزگەرۋى كەرەك. حالقىنىڭ پىكىرى بيلىككە ەستىلۋى قاجەت. يران حالقى وزدەرىنىڭ قۇقىقتارىن تالاپ ەتە ءبىلۋ كەرەك. يران حالقى وتە اقىلدى. ولار كوپ نارسەگە قول جەتكىزە الادى. ولار ءوز ەلىن باسقارا الادى. وسى جاعداي تۋعاندا تاياۋ شىعىس تولىعىمەن قاۋىپسىز ايماققا اينالادى", - دەيدى اقش مەملەكەتتىك حاتشىسى.

ء"بىز يراننىڭ حالقىن قولداۋ ءۇشىن قولىمىزدان كەلگەننىڭ ءبارىن ىستەپ جاتىرمىز. ولار ەرتە مە، كەش پە، وزدەرى قالاعانداي ءومىر سۇرۋلەرى ءتيىس", – دەدى پومپەو.

Abai.kz