الماتى قالالىق الەۋمەتتىك ءال-اۋقات باسقارماسىندا كوپبالالى انالاردىڭ قاتىسۋىمەن كەزەكتى رەت باسقوسۋ ءوتتى، دەپ حابارلايدى Almaty.tv تىلشىسى. باسقوسۋدا كوپبالالى انالاردىڭ ماسەلەلەرىن شەشۋ جايى تالقىلاندى.

بۇعان دەيىن مەملەكەت باسشىسىنىڭ تاپسىرماسى بويىنشا ۇكىمەتتىك، وڭىرلىك دەڭگەيدە كوپبالالى وتباسىلارعا جۇيەلى قولداۋ شارالارىن قولعا الۋ جونىندەگى جۇمىس توپتارى قۇرىلعان بولاتىن. انالارمەن كەزدەسۋ قالاداعى بارلىق اۋداندا ءوتتى. سونىڭ نەگىزىندە قاتىسۋشىلاردىڭ ۇسىنىس-تىلەكتەرى ءجىتى تالدانىپ،  ناتيجەسىندە، 13 اقپان كۇنى «نۇر وتان» پارتياسى فيليالىنىڭ كەزەكتەن تىس كونفەرەنتسياسىندا الماتى قالاسىنىڭ اكىمى باۋىرجان بايبەك كوپبالالى انالاردى قولداۋ تۋرالى اۋقىمدى شارالاردى ايقىندادى.

قالا باسشىسى جاريالاعان باستاماعا ساي، الماتىدا كوپبالالى انالارعا ارنالىپ «باقىتتى وتباسى» ورتالىعى اشىلادى. ورتالىق كوپبالالى وتباسىلار مۇددەسىنە جۇمىس ىستەيدى. ورتالىق ءبىر تەرەزە قاعيداسى بويىنشا جۇمىس ىستەپ، تۇرمىسى تومەن جانۇيالارعا كەشەندى كومەك كورسەتۋدى كوزدەيدى. ونىڭ ىشىندە، قۇقىقتىق جانە پسيحولوگيالىق كەڭەس تە بەرىلەدى. سونداي-اق، مۇمكىندىگى شەكتەۋلى جانداردى قايتا ساۋىقتىرۋعا كومەك كورسەتىلەدى. ءتىپتى، اتالعان ورتالىققا كوپبالالى انالاردىڭ جۇمىسقا تۇرۋىنا دا جاعداي جاسالماق.

سونىمەن قاتار، تۇرعىن ءۇي كەزەگىندە تۇرعان كوپبالالى انالارعا العاشقى جارناعا جەرگىلىكتى بيۋدجەتتەن سۋبسيديا تولەنەدى. بۇل ءتورت جانە ودان دا كوپ كامەلەت جاسىنا تولماعان بالالارى بارلارعا قاتىستى. كوممۋنالدىق قىزمەت، ياعني ىستىق جانە سۋىق سۋ ەسەپتەيتىن جەكە ەسەپتەۋىش قۇرالدارىن ورناتۋ بويىنشا وتەماقى كولەمى دە ۇلعايتىلادى. مۇمكىندىگى شەكتەۋلى بالالاردى ۇيدە وقىتۋ جانە ءبىر رەتتىك الەۋمەتتىك كومەك كولەمى دە ارتادى. الماتى بيلىگى كوپبالالى جانە الەۋمەتتىك جاعدايى تومەن وتباسىلارعا ەكىنشى بالادان باستاپ بالاباقشا شىعىنىن دا وتەۋدى جوسپارلاپ وتىر. ۇسىنىلعان جۇيەلى شارا اراسىندا كوپبالالى وتباسىلارعا جانە قىسقا مەرزىمدىك تەگىن كۋرس ستيپەندياسىن ۇيىمداستىرۋ بار.

«مەنىڭ ويىمشا، جيىندا ايتىلعان كوپبالالى وتباسىلارعا كورسەتىلەتىن قولداۋ مەن كومەك جۇزەگە اسىرىلادى. بۇل انالار قويعان بارلىق سۇراقتارعا بايلانىستى. ءبىز تۇرعىن ءۇي، جاردەماقى تۇرعىسىندا بايسالدى تۇردە سويلەستىك», – دەدى كوپبالالى انا نۇرگۇل بايسادىقوۆا.

«الماتى اكىمدىگى بارلىق ماسەلەلەردى اشىق تۇردە تالقىلاپ جاتىر. ول ماسەلەلەر كوپبالالى، الەۋمەتتىك جاعدايى تومەن وتباسىلارعا قاتىستى بولىپ وتىر. ءبىزدى الماتى قالاسى اكىمىنىڭ ورىنباسارى ەرلان اۋكەنوۆ مۇقيات تىڭدادى», – دەپ پىكىر ءبىلدىردى كوپبالالى انا ۇلجالعاس ساتقىمبەكوۆا.

ءوز كەزەگىندە، باستاماشىل توپ وكىلى ساۋلە ابەدينوۆا اشىق ديالوگقا شاقىردى. ونىڭ سوزىنشە، ەش بايبالامسىز، اقىلعا جۇگىنۋ كەرەك.

«الماتى كوپبالالى، الەۋمەتتىك جاعدايى تومەن وتباسىلاردىڭ ۇسىنىستارىنا شۇعىل تۇردە نازار اۋداردى. جۇمىس توبى قۇرىلدى. ونىڭ قۇرامىندا قالانىڭ ءار اۋدانىنان قوعام بەلسەندىلەرى كىردى. بۇل اشىق ديالوگتىڭ وڭ اسەرى», – دەپ اتاپ ءوتتى كەزەكتى وتكەن جيىندى قورىتىندالاعان قوعام بەلسەندىسى ساۋلە ابەدينوۆا.

Abai.kz