وسىدان بىرەر اي بۇرىن شىعىس قازاقستان وبلىسى ۇلان اۋدانىنىڭ اكىمى مارات مۇزاپاروۆ پەن ونىڭ قىزمەتكەرى سەرىك بالتاباەۆ وبلىس اكىمىنىڭ ورىنباسارى ەرلان نۇرلانباەۆتىڭ تۋعان كۇنىن تويلاۋ ۇستىندە ماس كۇيىندە شقو دەنەشىنىقتىرۋ جانە سپورت باسقارماسىنىڭ باستىعى قايرات ورىنحانوۆتى سوققىعا جىقتى دەگەن سىبىس شىققان بولاتىن. سونداي جايتقا بايلانىستى پرەزيدەنت اكىمشىلىگىنىڭ باسشىسى اسلان مۋسين مەن پرەمەر كارىم ءماسىموۆ وسكەمەنگە ارنايى بارىپ، وبلىستىڭ ءبىراز اتقامىنەرىن «باندى» دەپ تانىپ، وبلىس اكىمى ادىلعازى بەرگەنەۆتى «وبرازتسوۆو-پوكازاتەلنو» جۇمىسىنان العان بولاتىن. ارتىنان ەستىپ جاتىرمىز، «توبەلەسكىش» شەنەۋنىكتەردىڭ ءىسى تەكسەرىلىپ، الدى ءتيىستى جازاسىن دا الا باستاپتى...
الايدا، قاراپ وتىرساق، باسقا ايماقتارداعى شەنەۋنىكتەر وسكەمەندىك ارىپتەستەرىنىڭ تاعدىرىنان ەش ساباق الماعانعا ۇقسايدى. مىسالى، وتكەن اپتادا كەيبىر تاۋەلسىز باسىلىمدار كەرەكۋ ايماعىندا ورىن العان توسىن جاعدايلار تۋرالى جازعان بولاتىن. سول باسىلىمداردىڭ سوزىنە سەنسەك، كەرەكۋ قالاسى اكىمشىلىگىنىڭ عيماراتىندا ەكى ءماسليحات دەپۋتاتى جاقسىلاپ تۇرىپ «دەمالعان» كورىنەدى. «دەم» بەرىپ، ءدۇمىن ارتتىرعان «وتتى سۋلارى» تاۋسىلعان سوڭ، الگى ەكى حالىق قالاۋلىسى ۇيلەرىنە تارايىن دەپ، اكىمشىلىكتىڭ دالىزىنە شىقسا، الدارىنان قالا باسشىلارىنىڭ ءبىرى ۇشىراسا كەتىپتى. ولاردىڭ اراسىندا نە بولعانىن كىم ءبىلسىن، ايتەۋىر سوزدەن ءسوز شىعىپ، ارتى قىرعىن توبەلەسكە اينالىپتى-مىس. ءىستىڭ ناسىرعا شاپقانى سونشا، قالالىق باسشى مەن ءماسليحات دەپۋتاتتارىنىڭ «داۋىن» ارنايى شاقىرىلعان پوليتسيا قىزمەتكەرلەرى عانا توقتاتىپتى.
بۇگىنگى كۇنى كەرەكۋ قالاسىنىڭ اتقارۋشى جانە ۋاكىلەتتى بيلىك تارماقتارىنىڭ اراسىنداعى «جانجال» تۋرالى بۇكىل وبلىس شۋلاپ جاتقانعا ۇقسايدى. ءتىپتى ناقتى ادامداردىڭ اتتارى دا، ولاردىڭ اتقارىپ وتىرعان قىزمەتتەرى دە اتالىپ ءجۇر. بىراق، رەسمي دەڭگەيدە «بارلىعى دۇرىس، ءبارى ءدىن امان» دەگەن اقپاراتتان باسقانى ەستىمەدىك. قالالىق اكىمشىلىك قىزمەتكەرلەرى اياق استىنان تۇك بىلمەگەن، ەستىمەگەن بولىپ قالادى. پوليتسيا قىزمەتكەرلەرى توبەلەستى كورمەگەن، ەشقايدا بارماعان بولىپ شىعادى. سولاي بولا تۇرا، وتكەن سەيسەنبى كۇنى قالالىق ءماسليحاتتىڭ حاتشىسى ۆياچەسلاۆ لەبەد «دەنساۋلىعىنىڭ كۇرت مۇشكىلدەنۋىنە بايلانىستى» ءوز ەركىمەن جۇمىسىنان كەتكەن كورىنەدى.
جالپى العاندا، كەرەكۋدە بۇدان دا بۇرىن وسىنداي جاعدايلار ورىن العان بولاتىن. جىل باسىندا كەرەكۋلىك دەپۋتات سەرگەي تۋپيتسىن كورشىلەرىمەن توبەلەسىپ، سوتتالىپ، ەكى جىلعا باس بوستاندىعىنان ايىرىلدى. كەشە عانا كەرەكۋدە قالالىق «جاس وتان» ۇيىمى باسشىلارىنىڭ ءبىرىن بەلگىسىزدەر باۋىزداپ كەتتى دەگەن دە حابار تارادى. وبلىس شەنەۋنىكتەرىنىڭ جەمقورلىققا سالىنعانى تۋرالى اقپاراتتار شىعا باستادى...
وسى ورايدا اسلان مۋسين مەن كارىم ماسۋموۆكە سۇراق قويۋدىڭ رەتى كەلىپ وتىر: سىزدەر كەرەكۋدە ورىن الىپ جاتقان كەلەڭسىز جايتتار  تۋرالى حاباردارسىزدار ما؟ ەگەر حاباردار بولساڭىزدار، جولعا شىعىپ، كەرەكۋلىك «باندىلارعا» توسقاۋىل نەگە قويمايسىزدار؟ الدە بۇل «باندىلاردىڭ» وسكەمەندىك «باندىلاردان» ءجونى بولەك پە؟

حاميت باندىقۋعانوۆ، «اباي-ينفورم»