مەملەكەتتىك ساتىپ الۋداعى جاڭا تالاپتاردىڭ شاعىن جانە ورتا بيزنەسكە اسەرىن ۇكىمەت قاراستىرادى – قارجى مينيسترلىگىن ءىرى بيزنەستىڭ مۇددەسىن لوببيلەندىرىپ، مەملەكەتتىك ساتىپ الۋ سالاسىندا شاعىن بيزنەسكە قىسىم جاساعانى ءۇشىن ايىپتاعان «اق جول» فراكتسياسىنىڭ دەپۋتاتتىق ساۋالىنا جاۋاپ الىندى.

وتكەن جىلدىڭ 29 جەلتوقسانىندا قارجى مينيسترلىگىنىڭ «مەملەكەتتىك ساتىپ الۋدى جۇزەگە اسىرۋ قاعيدالارىن بەكىتۋ تۋرالى» بۇيرىعىنا وزگەرتۋلەر ەنگىزىلگەن. ماسەلەن، وسىعان دەيىن باعالىق ۇسىنىستارى تەڭ بولعان جاعدايدا تاۋارلار، جۇمىستار، قىزمەت تۇرلەرى نارىعىندا اۋقىمدى جۇمىس تاجىريبەسى بار كونكۋرسقا قاتىسۋشىلار جەڭىمپاز دەپ تانىلدى. ال، جۇمىس تاجىريبەسى تەڭ بولعان كەزدە بايقاۋعا قاتىسۋ تۋرالى ءوتىنىشى باسقا دا الەۋەتتى قاتىسۋشىلاردىڭ وتىنىمىنەن ءبىرىنشى بولىپ جىبەرگەن كونكۋرسقا قاتىسۋشى جەڭىمپاز دەپ تانىلعان ەدى.

ال ەندى، جاڭا وزگەرتۋلەرگە سايكەس مەملەكەتتىك ساتىپ الۋلارداعى باسىمدىق الدىڭعى ءتورت جىل ءۇشىن تولەنگەن سالىق سوماسىنىڭ نەعۇرلىم ۇلكەن كورسەتكىشىنە يە ۇيىمدارعا بەرىلەدى – ياعني، تەك ءىرى كومپانيالار عانا باسىمدىققا يە بولادى.

«اق جول» پارتياسى بۇل ەنگىزىلگەن وزگەرتۋلەردىڭ ناتيجەسىندە ءىرى جەتكىزۋشىلەردىڭ مەملەكەتتىك ساتىپ الۋ نارىعىن مونوپوليالاندىرۋعا جانە وسى سالادان شاعىن جانە ورتا كاسىپكەرلىكتى ىعىستىرۋىنا الىپ كەلەدى دەپ ەسەپتەيدى.

«ارىدەن سوڭ، كۇللى الەم ەلدەرىندە ءوزىنىڭ يكەمدىلىك كۇشى مەن سەرپىندىلىگى ارقىلى شوب سەكتورى ننوۆاتسيالار مەن ءونىم ساپاسىنىڭ جاڭا ستاندارتتارىنىڭ قاينار كوزى بولىپ تابىلادى. ءدال وسى شاعىن جانە ورتا بيزنەس ارقىلى ۇلتتىق ەكونوميكانىڭ تابىسى قايتا ۇلەستىرىلەدى، الەۋمەتتەندىرۋ جانە ونى ءاربىر قازاقستاندىقتىڭ وتباسىنا جەتكىزۋ جۇرگىزىلەدى.

قازاقستان ءوزىن الەۋمەتتىك مەملەكەت دەپ جاريالادى. ال، ءبىزدىڭ شەنەۋنىكتەر بولسا كەزەكتى مارتە بۇقارالىق كاسىپكەرلىكتىڭ دامۋىنا كەدەرگى كەلتىرەتىن قادامدار جاساپ، وعان قاتىسى بار قوعامنىڭ اۋقىمدى ۇلەسىنە دە قىسىم جاساۋدا»، - دەپ مالىمدەدى ءوز ساۋالىندا دەموكراتيالىق پارتيا فراكتسياسىنىڭ دەپۋتاتتارى. ولار پرەمەر-مينيستردەن وسى ماسەلەنى قاراستىرۋىن جانە اتالعان تۇزەتۋلەردى جويۋ تۋرالى ءتيىستى نۇسقاۋلار بەرۋىن سۇراعان بولاتىن.

جۋىردا عانا ۇكىمەتتىڭ بەرگەن جاۋابىندا جەڭىمپازدى «كىم ءبىرىنشى بولىپ ءوتىنىش بەردى» دەگەن كريتەري بويىنشا انىقتاماۋ ءۇشىن ساتىپ الۋلاردىڭ جەڭىمپازىن ءۇشىنشى كەزەڭدە تاڭداۋ ءۇشىن قارجىلىق كورسەتكىشتى – تولەنگەن سالىق سوماسىن نەگىزگە الۋ ۇسىنىلعان دەلىنگەن. ۇسىنىلعان ءتاسىل، ولاردىڭ پىكىرىنشە، ءبىر كۇندىك كومپانيالاردى ساتىپ الۋعا جول بەرمەيدى جانە كاسىپكەرلەردى سالىقتى ادال، ۋاقىتىلى تولەۋگە ىنتالاندىرۋ شارالارى بولىپ تابىلادى.

«سونىمەن قاتار، اتالعان ءتارتىپ اعىمداعى جىلدىڭ 1 قاڭتارىنان باستاپ كۇشىنە ەنگەنىن ەسكەرە وتىرىپ، سونداي-اق جارتىجىلدىق قۇقىقتىق قولدانۋ تاجىريبەسىن ەسەپكە الا وتىرىپ، ونىڭ شاعىن جانە ورتا كاسىپكەرلىكتىڭ سۋبەكتىلەرىنە اسەر ەتۋ ماسەلەسىن قاراستىرۋعا بولادى دەپ پايىمدايمىز»، - دەپ ايتىلعان باقىتجان ساعىنتاەۆ قول قويعان حاتتا.

«اق جول» قدپ جانە ونىڭ پارلامەنتتىك فراكتسياسى سايلاۋالدى باعدارلامانى جۇزەگە اسىرۋ مەن شاعىن جانە ورتا بيزنەستىڭ مۇددەسىن قورعاۋ بويىنشا جۇمىستاردى جالعاستىرۋدا.

Abai.kz