بۇل سۇراققا «Financial Times» گازەتىنىڭ شولۋشىسى دەۆيد شەپپارد جاۋاپ بەردى. Goldman Sachs ينۆەستيتسيالىق بانكى مۇناي ەكسپورتتاۋشى ەلدەر ۇيىمىنداعى (مەەۇ)  باعاعا ساۋد ارابياسىنىڭ  شەشىمى اسەر ەتكەنىن ايتتى. بۇل ءىستىڭ باستى ماقساتى – قارا التىننىڭ باعاسىن كوتەرۋ.

مۇناي جاڭا جىلدان بەرى 11%-عا قىمباتتاعان.

وسى اپتادا ساۋد ارابياسىنىڭ ەنەرگەتيكا ءمينيسترى حاليد فاليح كورولدىك مۇناي ءوندىرۋدى ناۋرىز ايىندا، شامامەن، 9,8 ملن باررەلگە دەيىن قىسقارتاتىنىن مالىمدەدى. بۇل رەسەي مەن مۇناي ەكسپورتتاۋشى ەلدەر ۇيىمى جاساعان قاراشا ايىنداعى كەلىسىمنەن 1 ملن باررەلگە از. سونداي-اق كورولدىك 2011 جىلدان بەرى مۇناي ەكسپورتىن ەڭ تومەنگى دەڭگەيگە دەيىن قىسقارتقان.

Goldman Sachs اناليتيكتەرى مۇناي باعاسى كەلەسى كۆارتالدا كوبەيەتىنىن ايتتى. بىراق، بۇل تەك ەر-رياد ساياساتىنا عانا بايلانىستى ەمەس. قارا التىن باعاسىنىڭ وزگەرۋى الەمدەگى كوپ جاعداياتتارعا اسەر ەتۋدە. ۆەنەسۋەلاعا قاتىستى سانكتسيا، يراندىق مۇناي ەكسپورت كولەمىنىڭ كۇرت قىسقارۋىنا الىپ كەلگەن ۆاشينگتوندا قابىلدانعان شەشىم، ايتا بەرسەڭ كوپ.

الايدا، بۇگىندە باررەلدىڭ دوللارعا شاققانداعى باعاسى - 60 دوللار. وتكەن جىلعى كورسەتكىش 86 دوللار بولاتىن. ءدال قازىر 2018 جىلعى باعانىڭ اۋىلى الىس دەيدى شولۋشى. Nordea ەكونوميستەرى قىسقى ۋاقىتتا ەنەرگەتيكالىق رەسۋرستارعا دەگەن قاجەتتىلىك مۇنايعا دەگەن سۇرانىستى ارتتىرادى دەيدى. بىراق، جاقىن ۋاقىتتا مۇناي باعاسى كۇنىنە باررەلگە شاققاندا 60-62 دوللاردان كوتەرىلە قويۋى ەكىتالاي.

مۇنىڭ باستى سەبەبى – اقش-تا ءوندىرىلىپ جاتقان مۇناي كولەمنىڭ كوبەيۋى. وتكەن جىلى قارا التىننىڭ كوپ وندىرىلۋىنە بايلانىستى ونىڭ باعاسى قۇلدىراعان بولاتىن. امەريكالىق ەنەرگەتيكالىق اقپارات باسقارماسى وسى اپتادا 2019 جىلى كۇندەلىكتى وندىرىلەتىن مۇناي 12,4 ملن باررەلگە دەيىن وسەدى دەپ بولجام جاسادى. بۇل 2018 جىلمەن سالىستىرعاندا 1,45 ملن باررەلگە كوپ.

سونىمەن قاتار بۇل وسىدان ءۇش اي بۇرىن بولجانعان باعادان 350 مىڭ باررەلگە ارتىق. ءبىر جىل بۇرىن امەريكالىق ۇيىم 2019 جىلى مۇناي ءوندىرۋ كۇنىنە بار بولعانى 590 مىڭ باررەل بولادى دەپ ەسەپتەگەن ەدى.

Goldman Sachs بانكى امەريكالىق مۇنايدىڭ الەمنىڭ كوپتەگەن ەلىنە ەكسپورتتالاتىنىن، سونداي-اق باعاسى ءوسۋى مۇمكىن ەكەنىن ايتتى.

ءشىنادىل سالتانات

Abai.kz