مۇحتار شاحانوۆتىڭ وتتى جىرلارى، حالىققا قادىرلى قوس ساياساتكەردىڭ ءولىمى بەلسەندىلىگىن وياتا الماعان ساياسي بويكۇيەز جۇرتتى ينتەرنەت وياتتى. جاسى بار، جاسامىسى بار قازاق قاۋىمى الەۋمەتتىك جەلىدەگى العاشقى قادامىن جاڭبىردان كەيىنگى ساڭىراۋ قۇلاقتاي قاپتاپ كەتكەن جۇلدىزدارعا “لايك” باسۋدان باستادى. كوپ نازارىنا ىلىنگەن سانقوي توپتىڭ باسقان-تۇرعانىن، “ەرتەگى ءومىرىن” ۇزىندى كۇن اڭگىمەگە، قىسىر كەڭەسكە ارقاۋ ەتتى. وزدەرىن اسپاندا جۇرگەندەي سەزىنەتىن ولار دا وسى قوعامنىڭ ءبىر مۇشەسى ەمەس پە؟! قاتارداعى پەندەنىڭ باسىنا تۇسەتىن تاعدىردان شەت قالمادى. اتاقتى پروديۋسەر بايان حانىم كۇيەۋىنەن ءولىمشى بولىپ تاياق جەپ اۋرۋحاناعا ءتۇستى. بايان وقيعاسى قوعامدا ەرەكشە ءدۇمپۋ تۋدىردى. سەميالىق زورلىق-زومبىلىقتىڭ شىرقاۋ كورىنىسى رەتىندە باعالاندى. ەل اۋانىن شوۋ بيزنەستەن الەۋمەتتىك ماسەلەگە اۋداردى.

بۇرىن بيلىكتى سىناۋ، قوعامدىق پىكىر ءبىلدىرۋ “وپپوزيتسيا” قالپاعىن كيگەن ساناۋلى ادامداردىڭ مەنشىكتى شارۋاسى بولسا، دەموكراتيانىڭ جاڭاشا فورماسى، ەركىن پىكىر الاڭى بولىپ تابىلاتىن ينتەرنەت، الەۋمەتتىك جەلى اركىمدى “سىنشىل رەاليست” جازۋشىعا، قوعامدىق بەلسەندىگە ايلاندىردى. ەركىندىك اياسىن كەڭەيتىپ، قوعامدىق ماسەلەلەرگە ارالاسۋعا، بيلىك پەن ۇكىمەتتىڭ قىزمەتىن قاداعالاۋعا، باعالاۋعا مۇمكىندىك بەردى. توقتاۋسىز اعىلعان اقپاراتتار اعىنى، ومىردەن ويىپ الىنعان بوياماسىز كورىنىستەر ەشكىمدى دە بەي جاي قالدىرمادى. سانالاردا سىلكىنىس تۋدىرىپ، قوعامعا قالىپتاسقان داعدىلى كوزقاراسپەن ەمەس الۋان تۇرعىدا،سىني ءارى سالىستىرمالى پوزيتسيامەن قاراۋعا جەتەلەدى.

تۋالەتتەن تابىلعان شارانا مەن زورلانعان بالانىڭ تاعدىرى، مەكتەپتەردەگى توپتىق توبەلەس... قوعامنىڭ ءون بويىنداعى تولىپ جاتقان ءىرىڭدى جارالار جۇرت تالقىسىنا ءتۇسىپ، بيلىك ورگاندارىنا نارازىلىعىن قوزعادى. ايگىلى سپورتشى دەنيس تەننىڭ بۇزاقىلار قولىنان مەرت بولۋى، وتقا ورانعان ۆرەميانكامەن بىرگە ورتەنگەن كۇناسىز بەس ءسابيدىڭ تراگەدياسى قوعام الاڭىن ورشىتە ءتۇستى. كوپ بالالى انالار ۇكىمەت ءۇيىنىڭ الدىنا جينالدى. ولاردى بيلىككە دات ايتۋعا يتەرمەلەگەن قاشقىن بانكيردىڭ ۆيدەو ۋاعىزى ەمەس، استى-ءۇستى قازىناعا تولى كەڭ بايتاق وتانىنان جانعا سايا باسپانا تاپپاي سەندەلگەن كۇيكى تىرلىگى، جاۋتاڭداعان ۇرپاعىنىڭ الدىنداعى شاراسىز ءحالى ەدى.

تۇيىندەي ايتساق، جالپى قوعام تاريحتا ۇلى قاعاناتتار قۇرعان بابالار رۋحى مەن بولاشاقتاعى باقىتتى ءومىردى باياندايتىن ۇزاق مەرزىمدىك جوسپارلاردىڭ “تاماق” بولمايتىنىن ءتۇسىندى. بيلىكتىڭ قايتا ويلاناتىن ۋاقىتى ءپىسىپ جەتىلدى

ەسبول ۇسەنۇلى

Abai.kz