ادام قۇندىلىعىنا جەتەر نارسە جوق
ماڭعىستاۋ وبلىسىنىڭ اكىمدىگى!
"جاڭاوزەن قالاسىندا ءتارتىپ كۇشەيتىلۋدە، قالاعا اسكەر كىرگىزىلىپتى، برونەتەحنيكا كوبەيتىلىپتى، اسكەري ۇشاقتار مەن تىكۇشاقتار قونىپ جاتىر، جاستار قۋعىندالىپ جاتىر" دەگەن الىپ-قاشپا سوزدەر الەۋمەتتىك جەلىدە كوبەيىپ كەتتى. بۇل سوزدەر قانشالىقتى راس؟! ءبىز الاڭداۋلىمىز.
ەگەر شىندىققا جاناسپايتىن بولسا، حالىقتى دۇرلىكتىرمەي، حابارلاۋىڭىزدى سۇرايمىن.
ەگەر راس بولسا، ءبىز 2011 جىلعى وزەن وقيعاسىنىڭ قايتالانۋىنان قاۋىپتەنەمىز. حالىقتى بۇلاي كۇشپەن قورقىتىپ ۇستاۋعا بولمايدى.
جاڭاوزەن ماسەلەسى اسابا اكىمدەردىڭ جالىندى سوزدەرىمەن شەشىلمەيدى!
جاڭاوزەن ماسەلەسى پوليتسيانىڭ شوشاڭداعان مىلتىعىمەن شەشىلمەيدى!
جاڭاوزەن ماسەلەسى پروكۋرورلاردىڭ قوقان-لوقىسىمەن شەشىلمەيدى!
جاڭاوزەن ماسەلەسىن حالىق اراسىندا ىقپالى بار، كونفليكتىلى جاعدايلاردى شەشۋدە تاجىريبەسى بار، حالىققا ءسوزى جۇرەتىن، جەرگىلىكتى بەدەلدى ازاماتتاردى ورتاعا سالىپ، كەلىسسوزدەر جۇرگىزىپ، سوڭعى ءسوزدى حالىقتىڭ وزىنە ايتقىزىپ، كۇش قولدانباي-اق، ءبارىن دە بەيبىت جولمەن شەشۋگە بولادى. مەنىڭ ويىمشا، حالقىمىز بۇعان دايىن، تەك بيلىگىمىز دايىن بولسا. سوندىقتان، حالىقتى كۇش كورسەتۋ ارقىلى قورقىتامىن دەپ، 2011 جىلعى وقيعالاردى قايتالاۋدان ساق بولايىق!
ەلىمىزدىڭ اڭساپ قول جەتكىزگەن تاۋەلسىزدىگىنە جەتەر نارسە جوق. بيلىكتەگى باسشىلار دا وتپەن ويناماسىن. كونستيتۋتسيامىز كەپىل بولعان ادام قۇندىلىعىنا جەتەر نارسە جوق. جاستاردى ساقتايىق!
ۋايس ەرسايىنۇلىنىڭ facebook پاراقشاسىنان
Abai.kz
