قىتاي حالىق رەسپۋليكاسىنىڭ وكىلدەرى ەتنيكالىق قازاق سايراگۇل ساۋىتبايدى قايتارۋ ءۇشىن رەسمي سۇرانىس جىبەرگەن ەمەس. بۇل تۋرالى باس پروكۋراتۋرا Tengrinews.kz رەسمي ساۋالىنا بەرگەن جاۋابىندا ايتىلادى.

“قىتاي حالىق رەسپۋبليكاسىنىڭ قۇزىرلى ورگاندارى ساۋىتبايدى بەرۋ تۋرالى قازاقستان رەسپۋبليكاسىنىڭ باس  پروكۋراتۋراسىنا رەسمي تۇردە قايتارۋ سۇرانىسىن جىبەرگەن ەمەس”، – دەدى قر بپ وكىلدەرى.

ۆەدومستۆونىڭ مالىمەتىنشە، 2018 جىلدىڭ 25 شىلدەسىنەن باستاپ سايراگۇل ساۋىتباي قازاقستان اۋماعىندا ساياسي باسپانا ىزدەۋشى ادام مارتەبەسىنە يە. 4 قازاندا الماتى وبلىستىق پوليتسيا دەپارتامەنتىنىڭ كوشى-قون قىزمەتى كوميسسياسى بوسقىن مارتەبەسىن بەرۋدەن باس تارتتى. ايەل شەشىمگە شاعىمدانىپ، سوتقا جۇگىندى. ءىس تالدىقورعان سوتىنىڭ وندىرىسىندە.

“ساۋىتباي ءوتىنىشتى قاناعاتتاندىرۋدان باس تارتقان جاعدايدا شەشىم شىعارىلعان كۇننەن باستاپ ءبىر اي ىشىندە ازاماتتىق ءىس جۇرگىزۋ كودەكسىنىڭ 403 جانە 404-باپتارىندا كوزدەلگەن تارتىپپەن اپەللياتسيالىق شاعىم بەرۋگە قۇقىلى. اپەللياتسيالىق ساتىداعى سوتتىڭ قاۋلىسىنا كۇشىنە ەنگەن كۇننەن باستاپ (جاريا ەتىلگەن كۇننەن باستاپ) التى اي ىشىندە اىجك-ءنىڭ 441-بابىنىڭ تالاپتارى ساقتالا وتىرىپ، جوعارعى سوتقا شاعىم جاسالۋى مۇمكىن. “بوسقىندار تۋرالى” زاڭنىڭ 8-بابى 1-بولىگى 6-تارماعىنا سايكەس پانا ىزدەگەن ادامنىڭ بوسقىن مارتەبەسىن بەرۋ تۋرالى ءوتىنىشحات بويىنشا شەشىم قابىلدانعانعا دەيىن، شاعىمدانۋ مەرزىمىن قوسا العاندا، قازاقستان رەسپۋبليكاسىندا بولۋعا قۇقىعى بار. سوڭعى شەشىم قابىلدانعانعا دەيىن سايراگۇل ساۋىتباي قازاقستان رەسپۋبليكاسىنىڭ اۋماعىندا پانا ىزدەگەن ادام مارتەبەسىندە بولۋعا قۇقىلى”، – دەدى باس پروكۋراتۋرا وكىلدەرى.

ساۋىتباي 2018 جىلدىڭ مامىر ايىنىڭ ورتاسىندا وتباسىمەن كورىسۋ ءۇشىن قىتاي شەكاراسىنان ءوتتى. بۇرىن ونىڭ كۇيەۋى مەن ەكى بالاسى قازاقستانعا قونىس اۋدارىپ، وسى ەلدىڭ ازاماتتىعىن العان. الايدا، ايەل وتباسىنا قوسىلا المادى. ونىڭ ايتۋىنشا، قىتايدا ول بيۋدجەتتىك ۇيىمدا جۇمىس ىستەگەن، سوندىقتان قىتاي بيلىگى ونىڭ تۋىستارىمەن بىرىگۋىنە كەدەرگى جاسادى. 2018 جىلى 1 تامىزدا جاركەنت قالاسىندا قىتايدان كەلگەن ەتنيكالىق قازاق سايراگۇل ساۋىتباي ءىسى بويىنشا شەشىم قابىلداندى.

ول قازاقستاننىڭ مەملەكەتتىك شەكاراسىن زاڭسىز كەسىپ وتكەنىنە كىنالى دەپ تانىلعان ەدى. سايراگۇل ساۋىتباي التى ايعا شارتتى تۇردە باس بوستاندىعىنان ايىرىلدى. سوت وعان قازاقستاننان شىعارىپ جىبەرۋ تۇرىندەگى جازا تاعايىنداماۋدى شەشتى. سايراگۇل ساۋىتبايدى سوت زالىنان بوساتتى.

Abai.kz