كەزدەسۋدى اشقان مەملەكەت باسشىسى جيىنعا قاتىسۋشىلاردى جانە ەلىمىزدىڭ بۇكىل ايەلدەر قاۋىمىن كەلە جاتقان 8 ناۋرىز – حالىقارالىق ايەلدەر كۇنىمەن قۇتتىقتادى. بۇل تۋرالى اقوردانىڭ رەسمي سايتى جازدى.

قازاقستان پرەزيدەنتى كوپ بالالى انالارعا قولداۋ كورسەتۋگە ارنالعان جاڭا اۋقىمدى الەۋمەتتىك شارالاردى جۇزەگە اسىرۋدىڭ ماڭىزدىلىعىن ايتىپ، بۇل كومەكتىڭ كولەمى بىرتىندەپ ارتا بەرەتىنىن اتاپ ءوتتى.

– نەگىزىنەن، بۇل قولداۋ شارالارى تابىسى تومەن كوپ بالالى وتباسىلار ءۇشىن الەۋمەتتىك كومەكتى كۇشەيتۋگە باعىتتالاتىن بولادى. الەۋمەتتىك تولەمدەر مەن جاردەماقىلار كولەمى ارتىپ، بيۋدجەت سالاسىنداعى جالاقىسى تومەن قىزمەتكەرلەردىڭ ەڭبەكاقىسى وسەدى، تۇرعىن ۇيلەر سالىنادى. سونداي-اق، «باقىتتى وتباسى»، «قۇتتى مەكەن» جانە «اۋىل – ەل بەسىگى» جوبالارى جۇيەلى قولداۋ كورسەتۋگە باعىتتالعان، – دەدى ەلباسى.

نۇرسۇلتان نازارباەۆ كەلەشەك ۇرپاقتى تاربيەلەۋ ىسىندە ايەلدەردىڭ ايرىقشا ءرول اتقاراتىنىن ايتتى.

– الەمدەگى ەڭ ماڭىزدى نارسە ايەلدىڭ قولىنان كەلەدى. ول ادامعا ءومىر سىيلايدى. ورتا ەسەپپەن، ءبىر وتباسىندا ءۇش بالا تاربيەلەنىپ وتىر دەسەك، ءبىر جىلدا شامامەن 400 مىڭ ءسابي ومىرگە كەلەدى. بالا – ءبىر وتباسىنىڭ بايلىعى مەن ماقتانىشى عانا ەمەس، تۇتاس ەلدىڭ باعا جەتپەس كاپيتالى. سوندىقتان ءبىزدىڭ انالارىمىز، اسىرەسە كوپ بالالى انالار، ەرەكشە قۇرمەت پەن العىسقا لايىق. ولار حالقىمىزدىڭ يگىلىگىن ەسەلەپ، ناعىز ەرلىك كورسەتىپ وتىر، – دەدى مەملەكەت باسشىسى.

ەلباسى قازاقستاندىقتاردىڭ ءال-اۋقاتى مەن وتباسىلىق ءومىردىڭ قۇندىلىقتارى مەملەكەتتىڭ بەرىك نەگىزى سانالاتىنىن اتاپ ءوتتى.

– قارقىنى كۇشتى ءارى جاڭاشىلدىققا تولى زاماندا سىزدەر ەل يگىلىگى ءۇشىن ءوز الەۋەتتەرىڭىز بەن قابىلەتتەرىڭىزدى تابىستى جۇزەگە اسىرىپ كەلەسىزدەر. ءتۇرلى سالالار مەن باعىتتاردا جاڭا بەلەستەردى باعىندىرىپ، ماڭىزدى ناتيجەلەرگە قول جەتكىزىپ وتىرسىزدار. مەنىڭ جاڭعىرۋ جونىندەگى يدەيالارىمدى ىسكە اسىرۋدىڭ باستاۋىندا ايەلدەر قاۋىمى تۇر، – دەدى قازاقستان پرەزيدەنتى.

نۇرسۇلتان نازارباەۆ ايەلدەردىڭ ەل ومىرىنە بەلسەندى اتسالىسىپ وتىرعانىن اتاپ ءوتتى.

– بۇگىندە ءبىلىم بەرۋ جانە دەنساۋلىق ساقتاۋ سالاسىنداعى ايەلدەردىڭ ۇلەسى 70 پايىزعا جەتسە، قارجى جانە ساقتاندىرۋ مەكەمەلەرىندە 60 پايىزدى قۇرايدى، ال اۋىل شارۋاشىلىعىندا – 45 پايىز. بيزنەستە، شىعارماشىلىق سالاسى مەن سپورت الەمىندە زور تابىسقا قول جەتكىزگەن ايەلدەر از ەمەس. بىزگە، ياعني ەركەكتەر قاۋىمىنا، سىزدەردەن قالىپ قويماۋ ءۇشىن ويلاناتىن كەز كەلدى، – دەدى مەملەكەت باسشىسى.

سوڭىندا قازاقستان پرەزيدەنتى ەلىمىزدىڭ ايەلدەر قاۋىمى ءومىرىمىزدىڭ ايناسى ەكەنىن ءارى حالقىمىزدىڭ مىنەز-قۇلقىن ايشىقتايتىنىن ايتتى.

– ءبىزدىڭ مىندەتىمىز – سىزدەر ءۇشىن جاسامپاز باستامالارىڭىزدىڭ تولىق جۇزەگە اسۋىنا جاعداي جاساۋ، – دەدى ەلباسى.

كەزدەسۋگە پرەمەر-ءمينيستردىڭ ورىنباسارى، قازاقستان رەسپۋبليكاسىنىڭ پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گ.ابدىقالىقوۆا، «استانا-زەلەنستروي» اق بريگادا جەتەكشىسى ن.ەرمولينا، الماتى وبلىسى الاكول اۋدانى انالار كەڭەسىنىڭ ءتورايىمى ۇ.دۇيسەباەۆا، كرانشى ا.اسماعامبەتوۆا، قوستاناي وبلىسى ميچۋرين اۋىلدىق وكرۋگىنىڭ اكىمى ۆ.كلوچكو، «Qazaq-Oner» قولونەرشىلەر ورتالىعىنىڭ باسشىسى ا.جانسەرىكوۆا، اقىن، «جەتىسۋ» گازەتىنىڭ ءتىلشىسى م.تاجماعانبەتوۆا، «كىشكەنتاي» الەۋمەتتىك اتەلە» جوباسىنىڭ جەتەكشىسى ا.مۇستافينا، ونكولوگ-دارىگەر ۆ.يۋن، ۇستاز ن.سادىقوۆا، «نازارباەۆ ۋنيۆەرسيتەتى» دببۇ عىلىم جانە تەحنولوگيالار مەكتەبىنىڭ اسسيستەنت-پروفەسسورى ا.ساندىعۇلوۆا، كوشى-قون قىزمەتىنىڭ ينسپەكتورى ا.ابىشەۆا، «نۇر» شارۋا قوجالىعىنىڭ باسشىسى س.ماۋتەەۆا، «دانا» جەكە ءبىلىم بەرۋ مەكتەبىنىڭ باس ديرەكتورى ك.باتىربەكوۆا، اكتريسا س.ەسلياموۆا، «Life4job» جشس ديرەكتورى ا.باقتىعاليەۆا، مەملەكەتتىك كۇزەت قىزمەتى پرەزيدەنتتىك وركەسترىنىڭ جەتەكشى ءسوليسى ك.تولەنباەۆا قاتىستى.

Abai.kz