جۇما, 14 تامىز 2020
COVID-19 قازاقستاندا. جۇقتىرعاندار — 101848. جازىلعاندار — 78633. قايتىس بولعاندار — 1269
ساڭلاق 5158 8 پىكىر 11 ناۋرىز, 2019 ساعات 12:13

ءماميننىڭ حوككەيىنە ءبىر ماۋسىمدا 3 653 490 000 تەڭگە جۇمسايمىز

قۇرلىقتىق حوككەي ليگاسى (قحل) — 2008 جىلى قۇرىلعان ەۋرازياداعى حالىقارالىق اشىق حوككەي چەمپيوناتى. 2009 جىلدان باستاپ ەۋروپاداعى ەڭ ۇزدىك ليگا سانالادى. 2018/19 جىلعى ماۋسىمعا جەتى ەلدەن 25 كوماندا قاتىستى. ءبىزدىڭ ەلدىڭ اتىنان ەلوردالىق «بارىس» حوككەي كلۋبى ونەر كورسەتۋدە.

شايبالى حوككەي قازاق قوعامىنا ءسال تاڭسىق سپورت. بىراق سولتۇستىكتەگى كورشىمىز اسا ءسۇيىپ اينالىساتىن سپورت ءتۇرى بولعاندىقتان، سولاردىڭ اسەرىمەن ءبىز دە بۇل سالادان باسىرە الساق دەپ ۇمىتتەنىپ ءجۇرمىز. ءوز ۇلتىمىزدان، ءوز ەلىمىزدەن مىقتى ويىنشى شىقپاعان سوڭ، ءوز ەلىندە اسا قۇرمەتكە بولەنە الماعان شەتەلدىك ويىنشىلارعا جاپپاي ازاماتتىق بەردىك. سول سانسىز لەگيونەرلەردىڭ ارقاسىندا ۇلتتىق قۇرامامىز بەن استانالىق «بارىس» حالىقارالىق تۋرنيرلەردە ءتاپ-ءتاۋىر ناتيجە كورسەتىپ ءجۇر. بىراق، اراسىندا ءوز ۇلدارى بولماعان سوڭ ءبارى-ءبىر قازاق قاۋىمىنىڭ ماحابباتىنا بولەنە العان جوق بۇل سپورت.

قۇرلىقتىق حوككەي ليگاسىنىڭ ەرەجەسىنە ساي، بيىل قازاقستاندىق كلۋبقا لەگيونەر سانى جاعىنان شەكتەۋ بولعان جوق. قۇرامىن تەك لەگيونەرلەرمەن جاساقتاسا دا ءوز ەركى. ال رەسەيلىك كلۋبتار ويىن حاتتاماسىنا تەك بەس شەتەلدىك حوككەيشىنى عانا تىركەي الادى. بۇل ءوز ويىنشىلارىنىڭ دەڭگەيىن كوتەرۋ ءۇشىن جاسالىپ وتىرعانى ءسوزسىز. ال «بارىسقا» بۇنداي شەكتەۋ جوق. وسىنداي الا قويدى بولە قىرىققان ەرەجەنىڭ اسەرىنەن بيىل «بارىس» ساپىندا 8 لەگيونەر جانە ءبىزدىڭ ەلدىڭ ازاماتتىعىن العان رەسەي، كانادا، اقش جانە شۆەتسيا ەلدەرىنىڭ 11 ويىنشىسى ونەر كورسەتتى.

قازاق جۇرتشىلىعى بوكس پەن كۇرەستەي ۇناتپاسا دا حوككەيگە بولىنەتىن قارجى شاش-ەتەكتەن. جاقىندا رەسەيلىك «چەمپيونات» پورتالىندا قحل كلۋبتارىنىڭ 2018/19 جىلعى ماۋسىمعا ارنالعان بيۋدجەتى (كەلىسىمشاتتار + بونۋس) جاريالاندى. ءبىز ەل بىلەتىن فۋتبولداعى قىراۋار قارجىعا نارازىلىق تانىتىپ جۇرگەندە، ەل بىلمەيتىن حوككەي سپورتى دا ەشكىمگە بىلدىرمەي ميللياردتاردى جۇتىپ جاتىر ەكەن.

«بارىس» حوككەي كلۋبىنىڭ سوڭعى ەكى ماۋسىمداعى بيۋدجەتى مىناداي: 

وتكەن ماۋسىمدا: 3 450 840 000 تەڭگە;

2018/19 جىلعى ماۋسىمدا: 3 653 490 000 تەڭگە.

قازاقستان شايبالى حوككەي فەدەراتسياسىنىڭ پرەزيدەنتى اسقار مامين. ءبىر قىزىعى، ماماندار اسقار ۇزاقبايۇلى ۇكىمەت باسشىسى بولعالى حوككەي كوپتەگەن باسىلىمنىڭ سۇيىكتى سپورتىنا اينالعانىن ايتۋدا. بۇعان دەيىن «بارىستىڭ» ويىندارىنا اسا ءمان بەرمەيتىن وتاندىق باسىلىمدار سوڭعى كەزدەرى توبەگە كوتەرە باستادى. ماسەلەن، كەشە گاگارين كۋبوگىنىڭ العاشقى كەزەڭىندە جەڭىسكە جەتكەن «بارىس» بىرقانشا رەسپۋبليكالىق ءىرى باسىلىمنىڭ باس تاقىرىبىنا شىقتى. ءسوز سوڭىندا "جانى قالماي جالپى ماقتاپ جاتقان" سول جەڭىس جايلى جازا كەتەيىك.

22 اقپاندا قۇرلىقتىق حوككەي ليگاسىنىڭ تۇراقتى چەمپيوناتى مارەسىنە جەتتى. قۇرامىندا قاپتاعان شەتەلدىك سپورتشىلار ونەر كورسەتەتىن «بارىس» شىعىس كونفەرەنتسياسىندا ەكىنشى ورىن يەلەنىپ، پلەي-وفف كەزەڭىنە جولداما الدى.

گاگارين كۋبوگى دەپ اتالاتىن بۇل كەزەڭدە جالپى 16 كوماندا ونەر كورسەتەدى. شىعىس، باتىس كونفەرەنتسياسىنىڭ ارقايسىسىنان سەگىزدەن. ەكى كونفەرەنتسيانىڭ وكىلى تەك فينالدا عانا جولىعادى.

سونىمەن شىعىس توپتا ەكىنشى ورىن العان ەلوردالىق كلۋبتىڭ العاشقى قارسىلاسى جەتىنشى ورىن العان نيجني نوۆگورود قالاسىنىڭ «تورپەدو» كومانداسى بولدى.

سەرياداعى ءبىرىنىش جانە ەكىنشى ماتچ 26 جانە 28 اقپان استانادا ءوتتى. ەكى ويىندا دا قارسىلاسىنان باسىم تۇسكەن قازاقستاندىق كوماندا 2:0 ەسەبىمەن العا شىققان، الايدا، 2 جانە 4 ناۋرىز كۇندەرى نيجني نوۆگورودتا وتكەن قوس كەزدەسۋ جالپى ەسەپتى 2:2-گە جەتكىزدى.

تۋرنير جارعىسىنا ساي كوماندالار 6 ناۋرىز كۇنى استانادا قايتا جولىقتى. بۇل جولدى دا جەرگىلىكتى كوماندا باسىم بولىپ، ەسەپتە قايتا العا شىققانىمەن، 8 ناۋرىز رەسەيدە وتكەن التىنشى ماتچ ەسەپتى قايتا تەڭەستىردى - 3:3. ءسويتىپ، جەڭىمپازدى انىقتاۋ ءۇشىن شەشۋشى، جەتىنشى ماتچ وتكىزۋگە تۋرا كەلدى. بۇل جۇپتا "ەلەنگەن" (قحل-دا جوعارى ورىن العان) «بارىس» شەشۋشى ويىندى ءوز الاڭىندا قابىلدادى. كەشە، 10 ناۋرىزدا استاناداعى "بارىس ارەنادا" وتكەن كەزدەسۋدە 3:2 ەسەبىمەن ايدىن يەلەرى جەڭىسكە جەتتى.

وسىلايشا، جەتى ويىننىڭ قورىتىندىسى بويىنشا 4:3 ەسەبىمەن جەڭىسكە جەتكەن «بارىس» گاگارين كۋبوگىنىڭ شيرەك فينالىنا شىقتى. كەلەسى قارسىلاسى - ومبىنىڭ «اۆانگارد» كومانداسى. «اۆانگارد» 1/8 فينالدا قازان قالاسىنىڭ «اق بارس» كومانداسىن جەڭگەن، ەندى 1/4 فينالدا قازاقستاندىق ناق «بارىسقا» جولىعىپ وتىر.

«اۆانگارد» قحل تۇراقتى چەمپيوناتىندا ءتورتىنشى ورىن العاندىقتان، بۇل جۇپتا دا ءسال باسىمدىلىق «بارىس» جاعىندا. دەمەك، سەرياداعى العاشقى ەكى ماتچ جانە جوعارداعىداي جەڭىمپازدى انىقتايتىن جەتىنشى كەزدەسدى ءوز الاڭىندا قابىلدايدى. بۇل كەزەڭدەگى نەگىزگى ويىندار 14, 16, 18, 20 ناۋرىز كۇندەرى، ەگەر قاجەت بولعان جاعدايدا قوسىمشا ويىندار 22, 24 جانە 26 ناۋرىزدا وتەدى.

جارتىلاي فينال:

«شىعىس» كونفەرەنتسياسى: 29, 31 ناۋرىز، 2, 4 ءساۋىر كۇندەرى، ەگەر قاجەت بولسا قوسىمشا ويىندار 6, 8 جانە 10 ساۋىردە وتەدى.

گاگارين كۋبوگىنىڭ فينالى: 13, 15, 17, 19 ءساۋىر كۇندەرى، ەگەر قاجەت بولعان جاعدايدا قوسىمشا ماتچتار 21, 23 جانە 25 ءساۋىر كۇندەرى وتەدى.

قۋانىش قاپپاس

Abai.kz

8 پىكىر