بەيسەنبى, 20 ماۋسىم 2019
678 2 پىكىر 13 ناۋرىز, 2019 ساعات 18:16

ۆيتسە-پرەمەر جۇمىس ساپارىمەن بقو-عا باردى

بۇگىن قر پرەمەر-ءمينيسترىنىڭ ورىنباسارى گۇلشارا ابدىقالىقوۆا باستاعان جۇمىس توبى باتىس قازاستان وبلىسىنا جۇمىس ساپارىمەن باردى.

جۇمىس توبىنىڭ قۇرامىندا قر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ، ءبىلىم جانە عىلىم ءمينيسترى كۇلاش ءشامشيدينوۆا، دەنساۋلىق ساقتاۋ ءمينيسترى ەلجان ءبىرتانوۆ، ورمان شارۋاشىلىعى جانە جانۋارلار دۇنيەسى كوميتەتىنىڭ توراعاسى قايىر رىسكەلدينوۆ پەن قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆتەر بار. الەۋمەتتىك بلوگ بويىنشا ءبىرىنشى باسشىلاردان قۇرالعان جۇمىس توبى ەڭ الدىمەن ەلباسىنىڭ «الەۋمەتتىك قامقورلىق» جاڭا الەۋمەتتىك شارالارىن ىسكە اسىرۋ بويىنشا اقپاراتتىق-ءتۇسىندىرۋ جۇمىستارىن جۇرگىزۋدى كوزدەيدى.

ۆيتسە-پرەمەر باستاعان توپ ەڭ اۋەلى حالىققا قىزمەت كورسەتۋ ورتالىقتارىنىڭ جۇمىسىمەن تانىستى. ورالداعى ورتالىقتاردىڭ تۇتىنۋشىلارى تسيفرلاندىرۋ يگىلىگىن كورىپ وتىر. بىلتىر باتىس قازاقستان وبلىسىنداعى حالىققا قىزمەت كورسەتۋ ورتالىقتارى 1 ميلليون 200 مىڭنان استام مەملەكەتتىك قىزمەت كورسەتكەن. ولاردىڭ باسىم بولىگى ەلەكتروندى فورماتتا راسىمدەلگەن. 200 مىڭداي ءوڭىر تۇرعىنى ەلەكتروندى تسيفرلىق قولتاڭبا السا، egov پورتالىنداعى 752 مەملەكەتتىك قىزمەت ءتۇرىنىڭ 506-سى قولجەتىمدى.

بۇدان كەيىن ۇكىمەت مۇشەلەرى جۇمىسپەن قامتۋ ورتالىعىندا بولدى. مۇندا ۆيتسە-پرەمەر تەلەگرامم كانالىنداعى كوپبالالى وتباسىلارمەن كەرى بايلانىس ورناتۋدى قامتاماسىز ەتەتىن جوبامەن تانىستى.

گۇلشارا ابدىحالىقوۆا باستاعان جۇمىس توبى بۇدان كەيىن وبلىستىق ءماسليحات زالىندا تۇرعىندارمەن كەزدەستى. پرەمەر-مينيستر ورىنباسارى ءوز سوزىندە ۇكىمەت مۇشەلەرىنىڭ وڭىرلەردى ارالاۋىنىڭ باستى ماقساتى – از قامتىلعان وتباسىلاردىڭ تىنىس-تىرشىلىگىن كوزبەن كورىپ، قوردالانعان ماسەلەلەردىڭ شەشىلۋىنە تىكەلەي اتسالىسۋ ەكەندىگىن اتاپ ءوتتى. جيىنعا كەلگەن كوپبالالى انالار دا وزدەرىن تولعاندىرعان ساۋالدارعا جاۋاپ الدى.

جۇرتشىلىقپەن جۇزدەسۋلەر كەزىندە مەملەكەت باسشىسىنىڭ «Nur Otan» پارتياسىنىڭ XVIII سەزىندە العا قويعان تاپسىرمالارى ءتۇسىندىرىلىپ، حالىقتىڭ ءال-اۋقاتىن كوتەرۋگە باعىتتالعان قارجىنىڭ قالاي يگەرىلەتىنى جونىندە اقپارات بەرىلدى.

ايتا كەتەرلىگى، باتىس قازاقستان وبلىسىندا كوپبالالى جانە مۇگەدەك بالا تاربيەلەپ وتىرعان 21 مىڭداي وتباسى اتاۋلى الەۋمەتتىك كومەك الاتىندار ساناتىندا. ۇكىمەت باسشىلارى بۇل رەتتە حالىقتىڭ از قامتىلعان توپتارىن قولداۋ جانە تابىستى ارتتىرۋعا بارىنشا كۇش سالىناتىنىن ايرىقشا اتاپ ءوتتى. مەملەكەتتىڭ قولداۋى اسىرەسە كىرىستەرى تومەن ازاماتتاردىڭ تۇرعىن ءۇي ماسەلەلەرىن شەشۋدەن دە كورىنىس تاپپاق. اقجايىق وڭىرىندە بۇگىنگى تاڭدا 2700 پاتەرلىك 20 كوپقاباتتى ءۇيدىڭ قۇرىلىسى ءجۇرىپ جاتىر. اۋىلدىق ەلدى مەكەندەردە جىل سوڭىنا دەيىن 70 شاقتى باسپانا پايدالانۋعا بەرىلەدى. 2025 جىلعا دەيىن وڭىردە 8 جارىم مىڭداي وتباسى باسپانامەن قامتىلماقشى.

ءبىلىم بەرۋ ىسىندە ىلگەرىلەۋشىلىكتەر بار. ايماقتا اپاتتى جاعدايداعى جانە ءۇش اۋىسىمدا ءبىلىم بەرەتىن مەكتەپتەر ماسەلەسى تۇبەگەيلى شەشىمىن تابار كۇن الىس ەمەس. شىلدە ايىندا وبلىستاعى ءبىلىم بەرۋ سالاسى قىزمەتكەرلەرىنىڭ جالاقىسى 30 پايىزعا وسپەكشى. مەملەكەت باسشىسىنىڭ وڭىرلەردى كەشەندى دامىتۋعا باعىتتالعان تاپسىرمالارى دەنساۋلىق ساقتاۋ سالاسىنان دا كورىنىس تابادى.

دەسەك تە، حالىقتى تولعاندىرعان كۇرمەۋلى ماسەلەلەردىڭ ءبىرى – باسپاناعا قاتىستى. پرەزيدەنت تاپسىرماسىنا سايكەس، ەلىمىزدە «نۇرلى جەر» باعدارلاماسى اياسىندا 40 مىڭعا جۋىق پاتەر سالىنۋى ءتيىس.

«ارەندا جۇيەسىندەگى بۇل پاتەرلەر الەۋمەتتىك جاعىنان از قامتىلعاندارعا بەرىلەدى. بۇل ءۇشىن 7 جىل قاتارىنان 50 ملرد تەڭگە بولىنبەك. كوپبالالى مەن تولىق ەمەس وتباسىلارعا, مۇگەدەك بالاسى بار ادامدار ءۇشىن تۇرعىن ءۇي نەسيەسىن تۇقجب ارقىلى 3-5 پايىزبەن بەرۋدى تاپسىرامىن. ول ءۇشىن تۇقجب-عا قوسىمشا قارجى كەرەك»، - دەگەن بولاتىن مەملەكەت باسشىسى.

بۇل رەتتە ورال قالاسى بويىنشا 19 مىڭداي ادام جالعا بەرىلەتىن تۇرعىن ءۇي كەزەگىندە تۇر. بيىل وسى ساناتتاعىلار ءۇشىن 800 پاتەرلىك 4 ءۇيدىڭ قۇرىلىسىن باستاۋ كوزدەلگەن.

جۇمىس توبى ساپار بارىسىندا ەڭ نەگىزگى 3 باعىتقا كوڭىل ءبولىندى. ول بىرىنشىدەن، ەڭ مۇقتاج ازاماتتارعا، از قامتىلعان وتباسىلارعا كومەك بەرۋدىڭ جاي-جاپسارىن ءتۇسىندىرۋ. ەكىنشىدەن، باسپانا ماسەلەسىن شەشۋ بويىنشا قولعا الىنعان ناقتى جۇمىستار رەتىن تالقىلاۋ. ۇشىنشىدەن، وڭىرلىك دامۋ مۇمكىندىكتەرىن سارالاۋ. ياعني، جولدار، اۋىزسۋ جانە ەلەكتر ەنەرگياسىمەن قامتاماسىز ەتۋ باعىتىنداعى جۇمىستاردىڭ بارىسىن پىسىقتاۋ.

سونداي-اق، ساپار بارىسىندا ءبىلىم جانە عىلىم ءمينيسترى كۇلاش ءشامشيدينوۆا، دەنساۋلىق ساقتاۋ ءمينيسترى ەلجان ءبىرتانوۆ باستاعان توپ مۇشەلەرى قالاداعى جانە ءبورلى، تەرەكتى اۋداندارىنداعى ءبىلىم بەرۋ مەن دەنساۋلىق ساقتاۋ ۇيىمدارىن ارالاپ كوردى. اتالعان سالا قىزمەتكەرلەرىمەن كەزدەسۋلەر وتكىزىپ، مەملەكەت باسشىسى تاراپىنان جۇكتەلگەن مىندەتتەردىڭ اۋىلدىق جەرلەردە جۇزەگە اسىرىلۋ مۇمكىندىگىمەن تانىستى.

وسى كۇنى پرەمەر-ءمينيستردىڭ ورىنباسارى ءوڭىر تۇرعىندارىن جەكە قابىلداپ، ولاردى تولعاندىرعان ماسەلەلەردى تىڭداپ، ساۋالدارىنا جاۋاپ بەردى.

سونىمەن قاتار، ورمان شارۋاشىلىعى جانە جانۋارلار دۇنيەسى كوميتەتى مەن قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعالارى دا ءوز سالالارى بويىنشا نىسانداردى ارالاپ، ەڭبەك ۇجىمدارىمەن كەزدەستى.

ۇكىمەت مۇشەلەرى ەرتەڭ كوپبالالى جانە از قامتىلعان وتباسىلاردى ارالاپ، وبلىستىڭ بايتەرەك، تاسقالا جانە تەرەكتى اۋداندارىندا بولادى دەپ جوسپارلانىپ وتىر.

ايتا كەتۋ كەرەك، پرەمەر-ءمينيستردىڭ ورىنباسارى بۇعان دەيىن ءوز ارىپتەستەرىمەن بىرگە اتىراۋ وبلىسىندا بولعان ەدى. جۇمىس ساپارى الداعى ۋاقىتتا اقتوبە، ماڭعىستاۋ جانە ەلىمىزدىڭ وزگە دە وڭىرلەرىندە جالعاسپاق.

Abai.kz

2 پىكىر