بەيسەنبى, 20 ماۋسىم 2019
589 0 پىكىر 14 ناۋرىز, 2019 ساعات 10:35

بەكەتاەۆ: لوندون بانكىندە بۇعاتتا جاتقان 500 ملن دوللارعا قاۋىپ جوق

قازاقستان ادىلەت ءمينيسترى مارات بەكەتاەۆ "بيلىك قىسىم جاسادى" دەپ استانانى سوتقا بەرگەن مولدوۆالىق بيزنەسمەن اناتول ءستاتيدىڭ شاعىمى بويىنشا سوتتىڭ ءالى ءوتىپ جاتقانىن، "پروتسەسس ءبىر جارىم جىلعا سوزىلۋى مۇمكىن" ەكەنىن ايتتى. 

ءمينيستردىڭ سوزىنشە، اۋەلدە بۇعاتتالعان ۇلتتىق قوردىڭ 22 ملرد دوللار قارجىسىنىڭ 21,5 ملرد دوللارى قازىر "قورعا قايتارىلعان".

- ەشقانداي قاۋىپ جوق. 21,5 ملرد دوللار باسقا بانككە اۋىستىرىلدى. ول قارجى باسقا باعالى قاعازدارعا ينۆەستيتسيالانىپ، ودان قازاقستانعا پايدا كەلەدى. ال 500 ميلليون دوللار ءالى لوندونداعى New York Mellon بانكىندە جاتىر. بۇل - از [اقشا] ەمەس. بىراق وعان دا ەشقانداي قاۋىپ جوق. قازىر لوندون سوتىندا بۇل ماسەلە قارالىپ جاتىر. پروتسەسس ءالى ءبىراز ۋاقىت الادى، - دەدى ول.

جۋرناليستەر بەكەتاەۆتان يتاليا سوتى ناۋرىزدىڭ باسىندا شىعارعان شەشىمتۋرالى سۇراعان. شەشىم بويىنشا، قازاقستان مولداۆالىق كاسىپكەرلەر - اناتول مەن گابريەل ستاتيگە 500 ميلليون دوللاردان اسا وتەماقى تولەۋگە مىندەتتەلگەن. بۇعان قوسا، ريم سوتىنىڭ شەشىمىمەن استانا ستاتيگە 120 مىڭ ەۋرو (شامامەن 136 مىڭ دوللار) سوت شىعىنىن وتەپ بەرۋى كەرەك بولعان.

بەكەتاەۆ "يتاليا سوتى قازاقستانعا جۇرمەيدى" دەيدى.

- يتاليا سوتىنىڭ قۇزىرەتى تەك يتاليادا [بار]. وندا ءبىزدىڭ ەشبىر اكتيۆىمىز جوق. تەك ەلشىلىك عيماراتى بار. ءستاتيدىڭ نەگە يتاليا سوتىنا جۇگىنگەنى بىزگە دە تۇسىنىكسىز. مۇمكىن تەك قانا وسىنداي سوت شەشىمىن الۋعا [باردى]، - دەدى مينيستر.

ەكى جىل بۇرىن - 2017 جىلى جەلتوقساندا New York Mellon بانكى مولدوۆالىق بيزنەسمەن اناتول ءستاتيدىڭ قازاقستان ۇكىمەتىنە قارسى ارىزى بويىنشا قازاقستان ۇلتتىق قورىنىڭ 22 ميلليارد دوللار قارجىسىن بۇعاتتاعان. بىلتىر تامىزدا انگليا سوتى بيزنەسمەن ءستاتيدىڭ سوت شەشىمىن ورىنداتۋ جونىندە تۇسىرگەن شاعىمى بويىنشا وتكەن سوت پروتسەسىندە قازاقستاننىڭ پايداسىنا قاراي شەشىم شىعارعان.

قازاقستاننىڭ مۇناي-گاز سالاسىنا ينۆەستيتسيا سالعان ستاتي مەملەكەتتىك ورگاندار ءوزىن "ينۆەستيتسياسىن تىم ارزانعا ساتۋعا ماجبۇرلەۋ ءۇشىن قىسپاققا العانىن" ايتادى. استانا بۇل ايىپتاۋدى تەرىستەپ، ءستاتيدى "الاياقتىق جاسادى" دەپ ايىپتايدى.

Abai.kz

0 پىكىر