اعىمداعى جىلدىڭ 17-ناۋرىز كۇنى ساعات 11.00-دە م.اۋەزوۆ اتىنداعى قازاق مەملەكەتتىك اكادەميالىق دراما تەاترى قر مادەنيەت جانە سپورت ءمينيسترى ارىستانبەك مۇحامەديۇلىنىڭ باستاماسىمەن جانە ءوزىنىڭ تىكەلەي قاتىسۋىمەن «ۇلى دالانىڭ ۇلى كۇنى – ناۋرىز» مەيرامىن سالتاناتتى تۇردە كەڭىنەن اتاپ وتەدى.

ا.مۇحامەديۇلى بۇل مەرەكەنى بالالاردىڭ كوز قۋانىشىنا اينالدىرىپ، وقۋشىلاردىڭ ءۇشىنشى توقساندىق دەمالىسىن ناۋرىز مەرەكەسىنە ۇيلەستىرۋ، ناۋرىزدىڭ  اتريبۋتتىق بەلگىسى، ەمبلەماسى ءھام سيمۆوليكاسىن بەكىتۋ، وسى مەيرام اياسىندا تال ەگۋ، كورىسۋ، ت.ب قۇندىلىقتاردى دارىپتەۋ، مەرەكەنى زاماناۋي ۇلتتىق كيىمدەرمەن قارسى الۋ، ت.ب كەرەكتىگىن العا تارتتى. مينيستر «زامان تالابىنا ساي ناۋرىزدىڭ فورماتىن تۇبەگەيلى وزگەرتۋ قاجەت. ناۋرىزدىڭ ايرىقشا ءتالىم-تاربيە، قادىر-قاسيەت بەرەتىن تۇرلەرى وتە ەرەكشە. سوندىقتان، ناۋرىز مەيرامىنا جاڭا رەڭك بەرۋ ءۇشىن، ادامنىڭ ۇلتىنا، ءدىني باعىنىشتىلىعىنا قاراماستان، ادامگەرشىلىك قۇندىلىقتارعا ءمان بەرە وتىرىپ، قازاقستان حالقى تۇگەل قامتىلاتىنداي مازمۇنىن جاساۋ كەرەك» ەكەندىگىن ءوز سۇحباتىندا ايتقان بولاتىن.

م.اۋەزوۆ تەاترى الاڭىنداعى اۋقىمدى شارا قر مادەنيەت جانە سپورت مينيسترلىگىنە قاراستى مادەني وشاقتاردىڭ كورىسۋىمەن باستالىپ، قازاق ونەرى جۇلدىزدارىنىڭ قاتىسۋىمەن وتەتىن مەرەكەلى كۇن قولونەر شەبەرلەرىنىڭ جارمەڭكەسىنە، ۇلتتىق ويىندار مەن مەرەكەلىك-كونتسەرتتىك باعدارلاماعا ۇلاسپاق.

ناۋرىز – ەجەلگى زاماننان قالىپتاسقان جىل باستاۋ مەيرامى، ايرىقشا ءتالىم-تاربيەلىك، ۇلگى-ونەگەلىك، ءسان-سالتاناتتىق مەيرام. مەركەلىك شارادا ءاسانالى ءاشىموۆ، ءسابيت ورازباي مەن ارىستانبەك مۇحامەديۇلى بۇلدىرشىندەردىڭ تۇساۋىن كەسىپ، «ونەر بارىسىنا» قاتىسقالى جاتقان ەركەبۇلان دايىروۆ پەن ايان وتەپبەرگەنگە باتا بەرەدى.

Abai.kz