مەملەكەت باسشىسى ەلوردانىڭ ەسىل اۋدانىندا بوي كوتەرەتىن جاڭا مەشىتتىڭ ىرگەتاسىن قالادى، دەپ حابارلايدى اقوردانىڭ رەسمي سايتى.

– بۇل جەردە ساۋلەتتى ءارى بىرەگەي مەشىت سالىنادى. بۇكىل ورتالىق ازيادا بۇعان تەڭ كەلەر مەشىت بولا قويماس، – دەدى جۇرتشىلىق پەن بۇقارالىق اقپارات قۇرالدارىنىڭ وكىلدەرى الدىندا ءسوز سويلەگەن نۇرسۇلتان نازارباەۆ.

قازاقستان پرەزيدەنتى جاڭا مەشىت بارشا مۇسىلمان قاۋىمىنىڭ ماقتانىشىنا اينالاتىنىنا جانە استانانىڭ كورىكتى جەرلەرىنىڭ ءبىرى بولاتىنىنا سەنىم ءبىلدىردى.

– بۇل جوبانى ىسكە اسىرۋ ءۇشىن مەملەكەتتىك بيۋدجەتتەن قاراجات جۇمسالمايدى. قۇرىلىس جۇمىستارىن جۇرگىزۋ ءۇشىن ارنايى قور قۇرىلدى. وعان باسقا ازاماتتارىمىزدىڭ دا قارجىلاي اتسالىسۋىنا بولادى. تاۋەلسىزدىك جىلدارىندا تابىسقا جەتىپ، بۇگىندە وسىنداي يگىلىكتى ىسكە قول ۇشىن بەرىپ جاتقان بارلىق كاسىپكەرلەرگە ريزاشىلىعىمدى بىلدىرەمىن، – دەدى مەملەكەت باسشىسى.

نۇرسۇلتان نازارباەۆ بۇل مەشىتتىڭ استاناعا تۋريستەر تارتاتىن جاڭا ورتالىقتاردىڭ ءبىرى بولۋعا ءتيىس ەكەنىن اتاپ ءوتتى.

– مەشىت – ەلوردا ءۇشىن ماڭىزدى ورىن. ءبىز وسىنداي نىسانداردىڭ ءبارىن زەرتتەپ، ىشىنەن ەڭ جاقسى جوبانى تاڭداپ الدىق. مەن ونىڭ جۇزەگە اسىرىلۋ بارىسىن ءوزىم قاداعالاپ وتىرامىن. بارشاڭىزعا تابىس تىلەيمىن، – دەدى مەملەكەت باسشىسى.

***

جاڭا مەشىتتىڭ جالپى كولەمى 57 مىڭ شارشى مەتر. مۇنارالارىنىڭ بيىكتىگى 130 مەتر. كۇمبەزىنىڭ ديامەترى 63 مەتر. ءدىني كەشەندە يسلام مۋزەيى، كىتاپحانا، قولونەر شەبەرحاناسى جانە باسقا دا مەكەمەلەر ورنالاسادى.

Abai.kz