قازاقستان پرەزيدەنتى قاسىم-جومارت توقاەۆ اقوردادا بىرقاتار كەزدەسۋلەر وتكىزدى
قاسىم-جومارت توقاەۆ پرەمەر-مينيستر اسقار ءماميندى قابىلدادى. كەزدەسۋ بارىسىندا قاسىم-جومارت توقاەۆقا ەلىمىزدىڭ قازىرگى الەۋمەتتىك-ەكونوميكالىق جاعدايى جانە ۇكىمەتتىڭ بيىلعى 2 ايدا اتقارعان جۇمىستارىنىڭ ناتيجەلەرى تۋرالى باياندالدى، دەپ حابارلايدى اقوردانىڭ ءباسپاسوز قىزمەتى.
ۇسىنىلعان مالىمەتتەرگە سايكەس، بيىلعى قاڭتار-اقپان ايلارىندا ونەركاسىپ ءوندىرىسى – 2,7 پايىزعا، اۋىل شارۋاشىلىعى – 3,6 پايىزعا، قۇرىلىس – 2 پايىزعا، قىزمەت كورسەتۋ سالاسى – 3,9 پايىزعا وسكەن. ەكونوميكانىڭ ءتۇرلى سالالارىنىڭ دا جاقسارا تۇسكەنى بايقالادى.
قازاقستان پرەزيدەنتى ۇلت جوسپارى اياسىنداعى قۇرىلىمدىق جانە ينستيتۋتسيونالدىق رەفورمالاردى، سونداي-اق تۇڭعىش پرەزيدەنت – ەلباسىنىڭ جولداۋلارى مەن تاپسىرمالارىندا قامتىلعان الەۋمەتتىك سالاداعى شارالاردى ساپالى جۇزەگە اسىرۋدى، بيۋدجەت قاراجاتىن ءتيىمدى يگەرۋ تۇرعىسىنان نەگىزگى مەملەكەتتىك باعدارلامالاردى ورىنداۋدى، ەكونوميكانى ءارتاراپتاندىرۋ جونىندەگى جۇمىستاردى جالعاستىرۋدى، ەلىمىزدىڭ جەكەلەگەن ايماقتارىندا سۋ تاسقىنىنا توسقاۋىل قويۋ شارالارىن جەدەل قابىلداۋدى تاپسىردى.
پرەمەر-مينيستر مەملەكەت باسشىسىنا ۇكىمەت تاراپىنان بيۋدجەتتىك مىندەتتەمەلەر مەن الەۋمەتتىك باستامالاردىڭ بارلىعىنىڭ تولىقتاي ورىندالۋىن قامتاماسىز ەتىپ، الەۋمەتتىك ماڭىزى بار تاۋارلارعا باعانىڭ نەگىزسىز ءوسۋىن بولدىرماۋ جانە ەكونوميكالىق ءوسىمنىڭ ساپاسىن ارتتىرۋ ءۇشىن ءتيىستى جۇمىستاردى جالعاستىرا بەرەتىنىن جەتكىزدى.
كەزدەسۋ قورىتىندىسى بويىنشا قازاقستان پرەزيدەنتى بىرقاتار ناقتى تاپسىرما بەردى.
مەملەكەتتىك حاتشى باقىتجان ساعىنتاەۆپەن كەزدەسۋدە مەملەكەت باسشىسىنا پرەزيدەنت جانىنداعى كونسۋلتاتيۆتىك-كەڭەسشى ورگانداردىڭ قازىرگى جۇمىستارى جونىندە باياندالىپ، ۇلتتىق جانە مەملەكەتتىك مەيرامداردى مەرەكەلەۋگە دايىندىق بارىسى تۋرالى مالىمەت بەرىلدى.
قاسىم-جومارت توقاەۆ مەملەكەتتىك حاتشىعا «نۇر وتان» پارتياسىنىڭ سەزىندە ايتىلعان بارلىق تاپسىرمالاردىڭ ورىندالۋىنا، ستراتەگيالىق باعدارلامالار مەن باستامالاردىڭ جۇزەگە اسىرىلۋىنا ءتيىستى باقىلاۋ جاساۋدى تاپسىردى.
ۇلتتىق بانك توراعاسى ەربولات دوساەۆپەن كەزدەسۋدە قاسىم-جومارت توقاەۆقا ەلىمىزدىڭ ۆاليۋتا-قارجى نارىعىنداعى احۋالى مەن التىن-ۆاليۋتا قورىنىڭ جاعدايى تۋرالى مالىمدەلدى.
سونىمەن قاتار، مەملەكەت باسشىسىنا ينفلياتسيانىڭ تومەن دەڭگەيىن ۇستاپ تۇرۋعا جانە ۆاليۋتا ايىرباستاۋ ورىندارىنداعى الىپ-ساتارلىق وپەراتسيالاردىڭ الدىن الۋعا باعىتتالعان اقشا-نەسيە ساياساتىن جۇزەگە اسىرۋ جونىندەگى جۇمىستاردىڭ ناتيجەلەرى مەن الداعى ۋاقىتتا اتقارىلاتىن شارالار تۋرالى باياندالدى.
كەزدەسۋ قورىتىندىسى بويىنشا قازاقستان پرەزيدەنتى ۇلتتىق بانك توراعاسىنا ۆاليۋتا نارىعىنىڭ، بانك سەكتورىنىڭ جانە قارجى نارىعىنىڭ باسقا دا سەگمەنتتەرىندەگى احۋالدىڭ تۇراقتىلىعىن قامتاماسىز ەتۋدى تاپسىردى.
قورعانىس ءمينيسترى نۇرلان ەرمەكباەۆپەن كەزدەسۋ بارىسىندا مەملەكەت باسشىسىنا ەلىمىزدىڭ قارۋلى كۇشتەرىنىڭ قازىرگى جاعدايى مەن مينيسترلىك قىزمەتىنىڭ ستراتەگيالىق باعىتتارى تۋرالى مالىمدەلدى.
ن. ەرمەكباەۆ قازاقستان پرەزيدەنتىنە ارميانىڭ قورعانىس قابىلەتىن ارتتىرۋ جانە اسكەردى قارۋ-جاراقپەن قامتاماسىز ەتۋ ءۇشىن قابىلدانىپ جاتقان شارالار تۋرالى باياندادى.
كەزدەسۋ قورىتىندىسى بويىنشا قاسىم-جومارت توقاەۆ بىرقاتار ناقتى تاپسىرما بەردى.
سونىمەن قاتار، قازاقستان پرەزيدەنتى ىشكى ىستەر ءمينيسترى ەرلان تۇرعىمباەۆتى قابىلدادى. مەملەكەت باسشىسىنا ۆەدومستۆونىڭ قازىرگى قىزمەتى، سونداي-اق ەلىمىزدە قۇقىقتىق ءتارتىپتى قامتاماسىز ەتۋ ءۇشىن قابىلدانىپ جاتقان شارالار تۋرالى ەسەپ بەرىلدى.
سونىمەن بىرگە، ەرلان تۇرعىمباەۆ قاسىم-جومارت توقاەۆقا ىشكى ىستەر ورگاندارىن رەفورمالاۋ جانە مينيسترلىكتىڭ جەكە قۇرامىن كەزەكتەن تىس اتتەستاتسيادان وتكىزۋگە ازىرلىك بارىسى جونىندە باياندادى.
كەزدەسۋ قورىتىندىسى بويىنشا قازاقستان پرەزيدەنتى بىرقاتار ناقتى تاپسىرما بەردى.
Abai.kz
