18 ناۋرىز كۇنى استانا قالاسىنداعى №76 مەكتەپ-ليتسەيىنىڭ ىشىنەن ۇلت كوسەمى، الاش وردا قوزعالىسىنىڭ قايراتكەرى ءاليحان بوكەيحانعا ارنالعان مۋزەي اشىلدى.

مۋزەيدىڭ سالتاناتتى اشىلۋ راسىمىنە عالىم ءارى ءاليحاننىڭ ۇرپاعى ورتاي ءابدىراحمانوۆ اقساقال، بەلگىلى الاشتانۋشى عالىمدار – پروفەسسور تۇرسىن جۇرتباي، ءاليحانتانۋشى سۇلتان حان اققۇلى، قر ۇعا اكادەميگى ديحان قامزابەكۇلى جانە «اق جول» دەموكراتيالىق پارتياسىنىڭ مۇشەسى،
قر پارلامەنت ءماجىلىسىنىڭ دەپۋتاتى بەرىك دۇيسەمبينوۆ، سونداي-اق اتا-انالار مەن وقۋشىلار قاتىستى.

عالىم سۇلتان حان اققۇلى ءوزىنىڭ سويلەگەن سوزىندە بۇل ءاليحاننىڭ قۇرمەتىنە رەسمي تۇردە اشىلعان تۇڭعىش مۇراجاي ەكەنىن ايتىپ ءوتتى.

جاڭادان اشىلعان مۇراجايدا الاشتىڭ ارداقتى ازاماتىنىڭ پورترەتى، قايراتكەرلىك كەزەڭدەرىن كورسەتەتىن قۇجاتتىق دەرەكتەرى بار ارنايى ستەندتەر قويىلعان.

سونىمەن قاتار، الاشتانۋشى عالىمدار اباي، الاش، ءاليحان، شاكارىم، ماعجان اتىنداعى ءدارىسحانالاردا ساباق وتكىزدى. ال، مەكتەپتىڭ باستاۋىش سىنىپ وقۋشىلارى الاش تاقىرىبىندا مانەرلەپ ولەڭدەر وقىدى.

Abai.kz