بۇگىن مەملەكەت باسشىسى قاسىم-جومارت توقاەۆ استانانى نۇر-سۇلتان ەتىپ قايتا اتاۋ تۋرالى قاۋلىعا قول قويدى. وسى كۇن تاريحتا قالاتىنى ايتپاسا دا بەلگىلى.

20-ناۋرىزدا اتا زاڭىمىز ءتيىستى باپتارىنا نەگىزدەلىنىپ، استانا اتاۋىن «نۇر-سۇلتان» دەپ قايتا اتالۋى تۋرالى شەشىم قابىلدانعانى بەلگىلى. بۇل شەشىمدى حالقىمىز قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىشۇلى نازارباەۆ ەسىمىن ماڭگىلىك ەتۋدىڭ ءبىر جولى رەتىندە قىزۋ قولداۋ ءبىلدىرىپ قابىلداۋدا. ەلىنە جەل وتىنەن پانا، ىق جاعىنان سايا بولىپ مەملەكەتتىڭ دامۋ باعىتتارىن انىقتاپ، ۇنەمى ورلەۋمەن داڭققا بولەنگەنىن، ءاربىر پرەزيدەنتتىك كۇنى ەرلىكپەن پارا-پار ەكەنىن وتانداستارىمىز جوعارى باعالايدى.

ەل پرەزيدەنتى رەتىندە نۇرسۇلتان ءابىشۇلى قول جەتىكسىز قيىندىققا قول سوزدى، حالىقتى مۇراتقا جەتكىزەر يدەيالار بەلگىلەپ بەردى، مەجە ەتتى، حالقىنىڭ مەرەيىن الەمگە پاش ەتىپ زور ايتتى، ەسىمى ەلىمەن تۇتاسىپ، جاڭاعا باستاعان جاڭاشىلدىق اتاعى جەر جاردى. «كۇن ساناپ وزگەرىپ جاتقان ءدۇبىرلى دۇنيەدە سانا-سەزىمىمىز بەن دۇنيەتانىمىمىزعا ابدەن ءسىڭىپ قالعان تاپ-تاۋرىن قاعيدالاردان ارىلماساق، كوش باسىنداعى ەلدەرمەن تەرەزەمىزدى تەڭەپ، يىق ءتۇيىستىرۋ مۇمكىن ەمەس. وزگەرۋ ءۇشىن ءوزىمىزدى مىقتاپ قولعا الىپ، زامان اعىمىنا قاراي يەكمدەۋ ارقىلى جاڭا ءداۋىردىڭ جاعىمدى جاقتارىن بويعا ءسىڭىرۋىمىز كەرەك!» - دەپ ۇران تاستادى. قوعامنىڭ دامۋىنىڭ بارلىق سالالارىنا جاقسى سەرپىن بەرىپ، الەمدەگى دامىعان ەلۋ ەل قاتارىنا قازاقستان رەسپۋبليكاسىن كوتەردى. ەندىگى جەردە ەڭ وزىق وتىز ەلدىڭ دەڭگەيىنە جەتۋ جولدارىن انىقتاپ بەردى. بولاشاقتىڭ باسەكەسىنە قابىلەتتى ءححى-عاسىر جاستارىن تاربيەلەۋگە ءبىلىم بەرۋ سالاسىن ۇنەمى باعىتتادى. نازارباەۆ زياتكەرلىك مەكتەپتەرىن، نازارباەۆ ۋنيۆەرسيتەتىن دۇنيەگە كەلتىرتىپ، سول ۇلگىدە ءبىلىم بەرۋ وشاقتارىنىڭ دامۋىنا جول سالدى. وسىعان ساي ۇستازدار مارتەبەسى تۋرالى زاڭ قابىلداۋدى، جاڭارعان مەكتەپ ءۇشىن جاڭا مۇعالىم دايىنداۋدى قولعا الدىردى.

ال بۇكىل دۇنيەجۇزىن جانداندىرىپ تامساندىرعان ەلوردامىز جاڭا استانا قالاسى – ەلباسىنىڭ پەرزەنتى، قايرات – جىگەرىنىڭ، كورەگەندىگىنىڭ، كەمەڭگەرلىگىنىڭ جەمىسى. استانا ۇلت بىرلىگىنىڭ سيمۆولىنا اينالدى.

ەۋرازيادا تاتۋلىق پەن كەلىسىم ساقتاۋ ورتالىعى رەتىندە تانىلدى.

مەنىڭ ايتقىم كەلگەنى – ن.ءا.نازارباەۆتىڭ مەملەكەت باسشىسى رەتىندەگى تاعى باسقا قيساپسىز ۇشان – تەڭىز ەڭبەگىن حالقىمىزدىڭ جوعارى باعالايتىنىنا جانە وسىعان وراي استانا اتاۋىن «نۇر-سۇلتان» دەپ وزگەرتۋ تولىق نەگىزدى ەكەنىن ىزگى تىلەكپەن ءبىلدىرۋ. بۇل – كەلەر ۇرپاقتىڭ پاتريوتتىق رۋحىن كوتەرۋ ءۇشىن دە كەرەك. بۇل – الەمگە قازاق ەلىنىڭ، قازاق جۇرتىنىڭ ساياسى مادەنيەتتىلىگىنىڭ دە ۇلگىسى، ءوز تاريحىمىزعا قۇرمەتپەن قاراۋعا ۇندەيتىن ونەگە.

ەلوردامىزدىڭ جاڭا اتاۋى، قۇتتى بولسىن دەيمىن! بىرلىك پەن بىرتۇتاستىعىمىز نىعايا بەرسىن!

اياگۇل تورەقىزى ميرازوۆا

قازاقستاننىڭ ەڭبەك ەرى، «التىن جۇلدىز»، «وتان» وردەندەرىنىڭ يەگەرى، قازاقستانعا ەڭبەگى سىڭگەن قىزمەتكەر، الماتى قالاسىنىڭ قۇرمەتتى ازاماتى

Abai.kz