الماتىدا رەسپۋبليكا سارايى الدىندا «سالەم، نۇر-سۇلتان! وسە بەر، وركەندەي بەر، نۇر-سۇلتان!» اتتى مىڭداعان ادامدىق كونتسەرت ءوتتى، بۇل شاراعا استانا اتاۋىن وزگەرتۋگە قولداۋ بىلدىرگەن جاستار قاتىستى، ولاردىڭ اراسىندا سپورتشىلار قانات يسلام، يسلام بايرامۋكوۆ، وتاندىق ەسترادا جۇلدىزدارى كامشات جولدىباەۆا، كەنتال، لۋينا، رينگو، ازيا، باقاي توپتارى جانە باسقالارى بولدى.

ءوز سوزدەرىندە الماتىلىق جاستار ەلباسىنىڭ تاريحي ءرولىن اتاپ ءوتىپ، ەلىمىزدىڭ تۇڭعىش پرەزيدەنتى، كوشباسشىسى، يدەيالىق جەتەكشىسى، ارحيتەكتورى نۇرسۇلتان نازارباەۆ ەسىمىنىڭ استاناعا بەرىلۋى وتە ورىندى دەگەندى ايتتى.

«مەن ءوزىم قالاعان ىسپەن اينالىسۋعا، بولاشاققا قۇلاش سەرمەۋگە مۇمكىندىك بەرگەن، ءوسىپ-وركەندەگەن قازاقستاندا ءومىر سۇرگەنىم ءۇشىن تاعدىرىما ريزامىن. ءبىز جاستار تاريحي وقيعالاردىڭ كۋاسى بولۋدامىز. استانامىز ءوزىنىڭ ىرگەتاسىن قالاۋشى كوشباسىنىڭ ەسىمىن الىپ، نۇر-سۇلتان اتاندى، بۇل ۇلكەن قۋانىش! بۇل - وعان وتان الدىندا، بولاشاق ۇرپاق الدىندا سىڭىرگەن ەڭبەگى ءۇشىن كورسەتىلگەن قۇرمەت. استانا ەلىمىزدىڭ جۇرەگىنە، تاۋەلسىزدىكتىڭ سيمۆولىنا، ءبىزدىڭ ماقتانىشىمىزعا اينالدى»، - دەپ اتاپ ءوتتى قازاقستان حالىقتارى اسسامبلەياسى جاستار قاناتىنىڭ وكىلى ديليارام ابديميتوۆا.

قر ەڭبەك سىڭىرگەن سپورت شەبەرى، وليمپيادا ويىندارىنىڭ كۇمىس جۇلدەگەرى قانات يسلام تۇڭعىش پرەزيدەنتتىڭ حالىقارالىق ارەناداعى زور بەدەلىن ايتتى.

«مەن قيىر جايلاپ، شەتتە وسكەن قازاقپىن. «اتاجۇرت»، «تۋعان ەل»، «تاۋەلسىزدىك»، «قاسيەتتى وتان» دەگەننىڭ قادىرىن سىرتتاعى قازاقتان ارتىق ەشكىم بىلمەس. قازاقستان ازات ەل، تاۋەلسىز مەملەكەت بولعاندا جۇرەگىمىز جارىلا قۋانعانىمىز ءالى ەسىمدە. تۇڭعىش پرەزيدەنتىمىز نۇرسۇلتان ءابىشۇلى نازارباەۆتىڭ دا ەڭ الدىمەن قولعا العانى وسى سىرتتاعى قازاقتاردىڭ جاعدايى ەدى. دۇنيەنىڭ ءتورت بۇرىشىنداعى بار قازاققا ساۋىن ايتىپ، «قازاقستان – ازات ەل بولدى. اتاجۇرتقا ورالىڭدار. وزدەرىڭە ارقاشاندا ەلدىڭ قۇشاعى اشىق. تۋعان ەلىمىزدى بىرگە وركەندەتەيىك» دەپ، ۇلى كوشكە جول سالعان بولاتىن. جاستايىمنان سپورتپەن اينالىسىپ، قىتاي ەلىندە تالاي بيىكتەردى باعىندىرسام دا كوكەيىمنەن اتاجۇرت – قازاق ەلىنە ورالۋ نيەتى ەشقاشان كەتكەن ەمەس. «وسىندا قال، الدىڭدا كەرەمەت بولاشاق كۇتىپ تۇر» دەگەن تالاي جاناشىر جاننىڭ سوزىنە قايرىلماي، ءبارىن تاستاپ بايتاق قازاقستانىما ءبىر-اق تارتتىم. ءبىرجولا»، - دەدى قانات يسلام.

سپورتشى قازىرگى كەزدە قازاقستاندا سپورتتى دامىتۋ ءۇشىن بارلىق جاعدايلار جاسالعانىن ايتتى، بوكستىڭ ارقاسىندا قانات يسلام الەمنىڭ ونداعان ەلدەرىندە بولدى.

«سۇيىكتى سپورتىم – بوكسپەن اينالىسۋىما بار جاعدايىن جاسادى. سپورتتىڭ ارقاسىندا الەمنىڭ تالاي ەلىندە بولدىم. قاي جەرگە بارساقتا قازاق ەكەندىگىمىزدى بىلگەن شەتەلدىكتەر الدىمەن ەلباسىمىز نۇرسۇلتان نازارباەۆتى اۋزىنا الاتىن. سول كەزدە قازاق بولعانىمىزعا، دۇنيەدە قازاقستانداي عاجايىپ ەلىمىزدىڭ جاساپ جاتقانىنا جانە ونىڭ ەلىن سۇيگەن نازارباەۆتاي كوشباسشىسى بارىنا ماساتتانىپ، كوكىرەگىمىزدى ماقتانىش سەزىمى كەرنەيتىن. استانانى الاتاۋدان ارقاعا كوشىرىپ، ەسىلدىڭ بويىنا ەل قوندىرىپ، ەڭسەلى ەلوردا، ساۋلەتى مەن سالتاناتى كەلىسكەن جاڭا قالا سالعان، قازاقستاننىڭ اتىن تورتكۇل دۇنيەگە تانىتقان ەلباسىمىزدى قالاي ۇلىقتاساق تا ارتىقتىق ەتپەيدى. استانا قالاسىنىڭ اتاۋىن «نۇر-سۇلتان» دەپ اتاۋ تۋرالى شەشىم وتە ورىندى دەپ سانايمىن»، - دەپ اتاپ ءوتتى قانات يسلام.

«باس قالامىز – استانا اتاۋىن «نۇر-سۇلتان» دەپ قايتا اتاۋدى زاڭدى قۇبىلىس دەپ قابىلدادىم. ويتكەنى استانا – ەلباسىنىڭ ءوز تۋىندىسى. سپورتتىق جارىستارمەن الەمدى ارالاي ءجۇرىپ كوزىمنىڭ جەتكەنى، جاڭا قانات يسلام باۋىرىم دا ايتىپ كەتكەندەي، شەتەلدىكتەر ءۇشىن «قازاقستان-استانا-نۇرسۇلتان» ءبىر ۇعىم بولىپ كەتكەن. سوندىقتان دا بۇل شەشىمدى ءساتتى، دەر كەزىندە قابىلدانعان دەپ قولداپ-قۋاتتايمىن»، - دەدى وليمپيادانىڭ كۇمىس جۇلدەگەرى، ەلىمىزدىڭ ەڭبەك سىڭىرگەن سپورت شەبەرى يسلام بايرامۋكوۆ.

الماتىنىڭ ەرىكتىلەر ليگاسىنىڭ جەتەكشىسى ايسۋلۋ ەرنيازوۆا ستۋدەنتتەردىڭ ءوزىن-ءوزى باسقارۋ «G-38»-ءدىڭ ۇيىمداستىرۋىمەن كونتسەرتكە مەگاپوليستىڭ بارلىق جوعارى وقۋ ورىندارىنان 5 مىڭنان استام جاستار قاتىسقانىن ايتتى.

«مەن تۇڭعىش پرەزيدەنت داۋىرىندە وقىعان، جۇمىس ىستەگەن قۇرداستارىم شىنايى باقىتتى جاندار دەپ ەسەپتەيمىن. ءبىز ارمانعا اينالعان قالادا - ەلىمىزدىڭ استاناسىندا تالاي مارتە باس قوستىق. ءبىز وسىناۋ كيەلى ءداستۇردى استانامىز نۇر-سۇلتاندا ودان ءارى جالعاستىرامىز!»، - دەپ اتاپ ءوتتى ساحنادان ايسۋلۋ ەرنيازوۆا.

Abai.kz