تاۋەلسىز قازاقستاننىڭ ەكىنشى پرەزيدەنتى ەل-جۇرتتىڭ الدىندا انت قابىلداپ، ءوز قىزمەتىنە كىرىسكەنىنە تۇپ-تۋرا ءبىر اپتا ۋاقىت ءوتتى. ءوزىنىڭ پرەزيدەنتتىك امبيتسياسىن سەنات توراعالىعىن اتقارىپ ءجۇرىپ تە بايقاتقان قاسىم-جومارت كەمەلۇلى وسى ءبىر اپتادا نە ىستەدى؟ ءبىز شولىپ شىققاندى ءجون دەپ تاپتىق.

19 ناۋرىز. 2019 جىل. 

كەشكى ساعات 19:00-دە ەندىگى ەكس-پرەزيدەنت نۇرسۇلتان نازارباەۆ تىكەلەي ەفيرگە شىقتى. ەل-حالىققا ريزاشىلىعىن ءبىلدىرىپ، پرەزيدەنتتىك وكىلەتىن توقتاتاتىنىن حابارلادى. قازاقستاندى 30 جىلعا جۋىق ۇزدىكسىز باسقارعان نازارباەۆ ءوزىنىڭ ورنىنا سەنات سپيكەرى قاسىم-جومارت توقاەۆتىڭ پرەزيدەنتتىك قىزمەتتى اتقاراتىنىن ايتتى.

زاڭ بويىنشا پارلامەنتتىڭ جوعارعى پالاتاسىن باسقاراتىن ادام سايلاۋ وتكەنگە دەيىن اۆتوماتتى تۇردە ۋاقىتشا پرەزيدەنت اتانادى. سولاي بولدى دا. قازاقستاندا كەلەر سايلاۋ 2020 جىلى ءوتۋى ءتيىس ەدى. توقاەۆ سول سايلاۋعا دەيىن پرەزيدەنت بولادى. ءارى قاراي، بۇل لاۋازىمدى كىم يەلەنەتىنىن سايلاۋ شەشەدى.

20 ناۋرىز. 2019 جىل.

"قازاقستان حالقىنا ادال قىزمەت ەتۋگە، كونستيتۋتسيا مەن قازاقستان رەسپۋبليكاسى زاڭدارىن قاتاڭ ساقتاۋعا، ازاماتتاردىڭ بوستاندىعى مەن قۇقىعىنا كەپىلدىك بەرۋگە، ماعان ۇلكەن سەنىممەن جۇكتەلگەن قر پرەزيدەنتى مىندەتتەرىن ابىرويلى اتقارۋعا سالتاناتتى تۇردە انت ەتەمىن".

بۇل قاسىم-جومارت كەمەلۇلى توقاەۆتىڭ ءسىز بەن بىزگە تىكەلەي ەيفردە بەرگەن انتى. ءسويتىپ، توقاەۆ قازاقستان ەكىنشى پرەزيدەنتى اتاندى. پرەزيدەنتتىك كۋالىكتى، توسبەلگى مەن مەملەكەت باسشىسىنا بەرىلۋى ءتيىس شتاندارتتاردى قابىلداپ الدى.

توقاەۆ پرەزيدەنتتىك قىزمەتىنە كىرىسە سالا، ەكس-پرەزيدەنت نۇرسۇلتان نازارباەۆتىڭ كەۋدەسىنە "التىن جۇلدىز" وردەنىن تاقتى. "حالىق قاھارمانى" اتاعىن بەردى.

استاناعا نازارباەۆ ەسىمىن بەرۋ

مەملەكەت استاناسىنا نۇرسۇلتان نازارباەۆتىڭ ەسىمىن بەرۋ تۋرالى ۇسىنىس ايتتى. پرەزيدەنت توقاەۆتىڭ ۇسىنىسىن ءماجىلىس ماقۇلدادى.

كوشە اتاۋلارىن وزگەرتۋ

سونداي-اق، بارلىق وبلىس ورتالىقتارىنداعى باستى كوشەلەرگە نۇرسۇلتان نازارباەۆ ەسىمىن بەرۋدى تاپسىردى. ءتىپتى ەلوردادا نازارباەۆتىڭ قۇرمەتىنە ەسكەرتكىش مونۋمەنت تۇرعىزۋ كەرەكتىگىن ايتتى.

توقاەۆتىڭ بۇل تاپسىرماسى دا ءاپ-ساتتە ورىندالدى. ءتىپتى كەي قالالار پرەزيدەنت پارمەن بەرگەن كۇنى-اق، كوشە اتاۋلارىن وزگەرتتى.

داريعا نازارباەۆا سەنات سپيكەرى بولدى 

ءيا، تۇڭعىش پرەزيدەنتتىڭ تۇڭعىشى سەنات توراعاسى اتاندى. د.ن-ءنىڭ كانديداتۋراسىن توقاەۆتىڭ ءوزى ۇسىندى. 44 سەناتور جاسىرىن داۋىس بەرىپ، ءبىر اۋىزدان شەشىم قابىلداندى. ءسويتىپ، داريعا نۇرسۇلتانقىزى قازاقستاننىڭ "زاپاستاعى" پرەزيدەنتى اتاندى.

كەزدەسۋلەر:

بۇدان بولەك، قاسىم-جومارت توقاەۆ پرەزيدەنت اكىمشىلىگى باسشىسىمەن، پرەمەر-مينيستر اسقار مامينمەن, باقىتجان ساعىنتاەۆپەن, مينيسترلەرمەن، ۇلتتىق بانك توراعاسى ەربولات دوساەۆپەن كەزدەسۋ جاسادى. ىشكى ىستەر مينيستر ەرلان تۇرعىمباەۆ ءىىم رەفورماسى تۋرالى ەسەپ بەردى. قورعانىس ءمينيسترى نۇرلان ەرمەكباەۆ قارۋلى كۇشتەردىڭ قازىرگى جاعدايى تۋرالى باياندادى.

21 ناۋرىز. 2019 جىل.

ەكىنشى پرەزيدەنت توقاەۆ پەن ەكس-پرەزيدەنت نازارباەۆ باس قالاداعى ناۋرىز مەيرامىنا قاتىستى.

تاعايىنداۋلار:

- ەرلان باتتاقوۆ - پرەزيدەنتتىڭ ءىس باسقارۋشىلى بولىپ;

- نۇرلان ونجانوۆ - پرەزيدەنت كەڭسەسىنىڭ باسشىلى بولىپ تاعايىندالدى.

22 ناۋرىز. 2019 جىل.

اۋەلى پرەزيدەنت توقاەۆ قازاقستان حالقىن ناۋرىز مەيرامىمەن قۇتتىقتادى.

سونان سوڭ 1 ماۋسىمنان باستاپ بيۋدجەتتەن جالاقى الاتىن قىزمەتكەرلەردىڭ جالاقىسىن كوتەرۋدى تاپسىردى. توقاەۆ بۇل تۋرالى ءوزىنىڭ "تۆيتتەر" جەلىسىندەگى جەكە پاراقشاسىندا جازدى. ايتپاقشى، بۇل توقاەۆتىڭ پرەزيدەنتتىك ءمانساپتى قابىلداعاننان سوڭ جازعان العاشقى جازباسى ەدى.

بۇدان بولەك، ۇكىمەتكە سۋ تاسقىنىنىڭ الدىن الۋ تۋرالى تاپسىرما بەردى.

ارمەنيا پرەزيدەنتى ارمەن ساركسيانمەن جانە تاجىكستان پرەزيدەنتى ەمومولي راحمونمەن تەلەفون ارقىلى سويلەستى. سونداي-اق، گرۋزيا پرەمەر-ءمينيسترى مامۋكا باحتادزە توقاەۆتىڭ قۇتتىقتادى.

تاعايىنداۋلار:

- تيمۋر سۇلەيمەنوۆ - پرەزيدەنتتىڭ كەڭەسشىسى بولىپ;.

- بەرىك ءۋاليۇلى - پرەزيدەنتتىڭ ءباسپاسوز حاتشىسى بولىپ تاعايىندالدى.

23 ناۋرىز. 2019 جىل.

تۇركىستانعا ساپار

پرەزيدەنت توقاەۆ العاشقى جۇمىس ساپارىن تۇركىستان وبلىسىنا جاسادى. قاسىم-جومارت كەمەلۇلىنىڭ بۇل ساپارى تۋرالى ورىس اقپاراتى "توقاەۆ تۇركىمەنياعا باردى" دەپ شۋلادى.

قوجا احمەت ياسساۋي كەسەنەسىن، "ازىرەت سۇلتان" مەملەكەتتىك مۇراجايىن ارالاپ كوردى. وتىرار ىقشاماۋدانىندا بولدى. "نۇرلى جەر" باعدارلاماسىنىڭ جۇمىسىمەن تانىستى. شىمكەنت قالاسىنىڭ اكىمشىلىك-ىسكەرلىك ورتالىعىن ارالاپ، "Shymkent city" جاڭا اۋدانىنىڭ ماكەتىن، اۋەجايدىڭ جاڭا تەرمينالىن كوردى. "ەسكى قالاشىق", قوشقار اتا وزەنىنىڭ جاعالاۋىن اباتتاندىرۋ جانە "تۇران" شاعىن اۋدانىنىڭ ينجەنەرلىك ينفراقۇرىلىمىن سالۋ جوبالارىمەن تانىستى.

سونداي-اق، پرەزيدەنت توقاەۆ بۇل كۇنى ءوزى باستاما كوتەرىپ، ءماجىلىسى ماقۇلداعان استانانىڭ اتاۋىن نۇر-سۇلتان دەپ وزگەرتۋ تۋرالى قاۋلىعا قول قويدى.

جاپونياداعى الەم چەمپيوناتىندا كۇمىس جۇلدە العان مانەرلەپ سىرعاناۋشىەليزابەت تۇرسىنباەۆانى قۇتتىقتادى.

24 ناۋرىز. 2019 جىل.

قابىلداۋلار:

- قر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ توراعاسى اليك شپەكباەۆتى;

- قر جوعارعى سوت توراعاسى جاقىپ اسانوۆتى;

- "سامرۇق-قازىنا" اق باسقارماسىنىڭ توراعاسى احمەتجان ەسىموۆتى قابىلداپ، ەسەپ-قيساپتارىن تىڭدادى.

تاعايىنداۋلار:

- باقىتجان ساعىنتاەۆ - پرەزيدەنت اكىمشىلىگىنىڭ جەتەكشىسى بولىپ;

- مارات تاجين - مەملەكەتتىك حاتشى بولىپ تاعايىندالدى.

فۋتبول كوردى

سول كۇنى كەشكە فۋتبولدان قازاقستان-رەسەي اراسىنداعى ماچتى تاماشالاۋعا باردى. پرەزيدەنتپەن بىرگە باقىتجان ساعىنتاەۆ، اسقار مامين، ادىلبەك جاقسىبەكوۆتەر دە فۋتبول كوردى.

"قازاقستان مەن رەسەي ۇلتتىق قۇرامالارى اراسىنداعى فۋتبول ماتچىن 30 مىڭ جانكۇيەرمەن بىرگە تاماشالادىق. ناتيجەگە قاراماستان ءوز قۇرامامىزعا جاقتاسۋدى جالعاستىرامىز. العا، قازاقستان!".

بۇل پرەزيدەنت توقاەۆتىڭ "تۆيتتەردەگى" جازباسى. پرەزيدەنت تاماشالاعان ويىندا قازاقستان قۇراماسى ءىرى ەسەپپەن جەڭىلدى.

25 ناۋرىز. 2019 جىل. 

تاعايىنداۋ:

- دارحان كالەتاەۆ - پرەزيدەنت اكىمشىلىگى جەتەكشىسىنىڭ ءبىرىنشى ورىنباسارى بولىپ تاعايىندالدى.

26 ناۋرىز. 2019 جىل.

تاعايىنداۋ:

- مارات سىزدىقوۆتى سىرتقى ىستەر ءمينيسترىنىڭ ورىنباسارى قىزمەتىنە تاعايىندادى.

"قالامقاس" كەن ورنىنداعى ءورتتى توقتاتىپ، توتەنشە جاعدايدى قالىپقا كەلتىرۋ جونىندە ءتيىستى شارالاردى جاساۋعا تاپسىرما بەردى.

27 ناۋرىز. 2019 جىل. 

اكىمدەردى قابىلدادى

پرەزيدەنت اكىمدەردى قابىلداپ، حالىقتىڭ تالاپ-تىلەگىنە ۋاقىتىلى جاۋاپ بەرۋدى، الەۋمەتتىك جەلىلەردە اككاۋنت اشۋدى تاپسىردى.

ء"بىز ءۇشىن قاراپايىم ادامداردىڭ الەۋمەتتىك جاعدايىن ءبىلۋ جانە دەر كەزىندە ارەكەت ەتۋ وتە ماڭىزدى. جاعدايدى ءبىلىپ وتىرۋ وتە ماڭىزدى. بۇل ءاردايىم ءبىز ۇشىن ماڭىزدى. اكىمدەر حالىقتىڭ سۇرانىستارىنا جەدەل دەن قويىپ، ءتۇسىندىرۋ جۇمىستارىن جۇرگىزۋى ءتيىس. 

الەۋمەتتىك جەلىلەردە بەلسەندى جۇمىس ىستەۋ ماڭىزدىلىعى: مەسسەندجەرلەردە توپتار قۇرىپ، جۇرگىزىلىپ جاتقان ساياساتتى ءتۇسىندىرۋ، جاعدايدى جەتىلدىرۋ جانە باسقارۋ. حالىقپەن كەرى بايلانىس بارلىق جەردە ورناعان جوق، 17 اكىمدىكتەن بارلىعى ءتورت بايلانىس كولل-ورتالىعى بار، ال ءموبيلدى حالىق باقىلاۋى - 7 وڭىردە عانا", - دەدى توقاەۆ.

قابىلداۋلار:

- پرەمەر-ءمينيستردىڭ ءبىرىنشى ورىنباسارى، قارجى ءمينيسترى ءاليحان سمايىلوۆتىڭ;

- پرەمەر-ءمينيستردىڭ ورىنباسارى گۇلشارا ابدىحالىقوۆانىڭ;

- پرەمەر-ءمينيستردىڭ ورىنباسارى جەڭىس قاسىمبەكتىڭ;

- الماتى قالاسى اكىمى باۋىرجان بايبەكتىڭ;

- پاۆلودار وبلىسى اكىمى بولات بوقاۋوۆتىڭ ەسەپتەرىن تىڭدادى.

ۇشتىلدىلىك جايلى

"بۇل - وتە كۇردەلى ءارى ماڭىزدى ماسەلە. مەنىڭ ۇستانىمىم، بىرىنشىدەن، قازاق ءتىلى بولۋعا ءتيىس، ورىس ءتىلى بولۋعا ءتيىس. بۇلاردىڭ بالالارىمىز ءۇشىن ماڭىزى زور. تەك سودان كەيىن عانا اعىلشىن ءتىلىن وقىتۋ كەرەك".

بۇل پرەزيدەنت توقاەۆتىڭ مەكتەردەردەگى ۇشتىلدىلىككە قاتىستى ايتقان پىكىرى ەدى.

جاعدايى تومەن وتباسىلارىن باسپانامەن قامتۋ

پرەزيدەنت اكىمدەرگە الەۋمەتتىك جاعدايى تومەن ازاماتتار ءۇشىن 40 مىڭنان استام جالدامالى پاتەرلەردى بەرۋ ماسەلەسىن جەدەلدەتۋدى جانە بۇل ۇدەرىستى بيىلعى مامىر ايىنان باستاۋدى جۇكتەدى.

سونداي-اق، پرەزيدەنت توقاەۆ اقش ەلشىسىنەن سەنىم گراموتاسىن قابىلدادى.

ازىرگە كورگەن-بىلگەنىمىز وسى. سوندىقتان وسى جەردەن قايىرايىق...

Abai.kz