قازاقستان پرەزيدەنتى قاسىم-جومارت توقاەۆتىڭ توراعالىعىمەن نۇر-سۇلتان، الماتى، شىمكەنت قالالارىنىڭ جانە وبلىستاردىڭ اكىمدەرى قاتىسقان كەڭەس ءوتتى، دەپ حابارلايدى اقوردانىڭ رەسمي سايتى.

جيىن بارىسىندا پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا.سمايىلوۆتىڭ، پرەمەر-ءمينيستردىڭ ورىنباسارلارى ج.قاسىمبەك پەن گ.ابدىقالىقوۆانىڭ، الماتى قالاسىنىڭ اكىمى ب.بايبەكتىڭ جانە پاۆلودار وبلىسىنىڭ اكىمى ب.باقاۋوۆتىڭ ەسەپتەرى تىڭدالدى.

قاسىم-جومارت توقاەۆ ەلىمىزدەگى الەۋمەتتىك-ەكونوميكالىق جاعدايدىڭ تۇراقتى ەكەنىن جانە مەملەكەتتىك باعدارلامالاردىڭ دايەكتى تۇردە جۇزەگە اسىرىلىپ جاتقانىن اتاپ ءوتىپ، كەيبىر باعىتتار بويىنشا جۇمىستاردى جانداندىرۋ قاجەتتىگىن ايتتى.

– تۇڭعىش پرەزيدەنتىمىز – ەلباسىنىڭ دانا ساياساتىنىڭ ارقاسىندا ەڭ قيىن كەزەڭدەرگە تابىستى توتەپ بەرىپ، ەكونوميكانىڭ ءوسۋ قارقىنىن قامتاماسىز ەتتىك جانە حالىقتىڭ ءال-اۋقاتىن ارتتىردىق. قازىرگى تاڭدا وسى قارقىندى ساقتاۋدى، جۇمىس تاسىلدەرىن جەتىلدىرۋدى جانە جۇكتەلگەن مىندەتتەردى ساپالى ورىنداۋدى قامتاماسىز ەتۋ قاجەت. باستى ماقسات – ازاماتتارىمىزدىڭ ءال-اۋقاتىن جانە بولاشاققا دەگەن سەنىمىن ارتتىرۋ، – دەدى قازاقستان پرەزيدەنتى.

باسقوسۋ سوڭىندا مەملەكەت باسشىسى ەكونوميكانىڭ ءوسىمىن، ينۆەستيتسيا تارتۋ ءىسىن قامتاماسىز ەتۋگە، الەۋمەتتىك تۇراقتىلىقتى نىعايتۋعا، وڭىرلەردەگى ينفراقۇرىلىمدىق جانە ەكولوگيالىق وتكىر پروبلەمالاردى شەشۋگە، سۋ تاسقىنىنىڭ الدىن الۋعا، تۇرعىن ءۇي-كوممۋنالدىق شارۋاشىلىعىن جانە الەۋمەتتىك سالانى قامتاماسىز ەتۋگە، سونداي-اق كوكتەمگى ەگىس جۇمىستارىنا دايىندىق جانە ونى جۇرگىزۋ جۇمىستارىن ۇيىمداستىرۋعا باعىتتالعان بىرقاتار تاپسىرما بەردى.

بەرىلگەن تاپسىرمالاردىڭ ءبارىن قاتاڭ باقىلاۋدا ۇستاۋ پرەزيدەنت اكىمشىلىگىنە تاپسىرىلدى.

مەملەكەت باسشىسى قاسىم-جومارت توقاەۆتىڭ سويلەگەن ءسوزىنىڭ تولىق ءماتىنىن مىنا جەردەن وقي الاسىزدار.

Abai.kz