«اق جول» جەر مەن بيزنەستى قورعاۋ ماسەلەسىن كوتەردى
«اق جول» پارلامەنتتىك فراكتسياسى ۇكىمەتكە ينۆەستيتسيالىق جوبالاردى قۇرۋ كەزىندە ەشبىر نەگىزسىز جەردى تارتىپ الۋدان بيزنەستى قورعاۋدى جانە مۇنداي جەر ۋچاسكەلەرىن يگەرۋدىڭ ناقتى كريتەريلەرىن بەكىتۋدى ۇسىندى – بۇل تۋرالى ءماجىلىستىڭ كەشەگى وتكەن وتىرىسىندا ازات پەرۋاشەۆ مالىمدەدى.
«ينۆەستيتسيالىق تارتىمدىلىققا جانە بيزنەستىڭ قاۋىپسىزدىگىنە اسەر ەتەتىن ماڭىزدى فاكتورلاردىڭ ءبىرى - جوبانى ىسكە اسىرۋعا بولىنگەن جەر تەلىمدەرىن قايتارىپ الۋ ماسەلەلەرىندە مەملەكەتتىك ساياساتتىڭ اشىقتىعى مەن نەگىزدىلىگى. بىردە-ءبىر ينۆەستيتسيالىق جوبانى ءتيىستى عيماراتتار مەن قۇرىلىستاردى سالۋسىز جۇزەگە اسىرۋ مۇمكىن ەمەس. قيالداعى اسەم سارايلار عانا اسپاندا ءىلۋلى بولا الادى، ال يندۋستريالاندىرۋ ءۇشىن سالىنعان عيماراتتار جەر بەتىندە بەرىك تۇرۋ كەرەك»، - دەپ ايتىلعان ۇكىمەتتىڭ اتىنا جولدانعان دەپۋتاتتىق ساۋالدا.
كاسىپكەرلەر شەنەۋنىكتەردىڭ داۋ تۋدىراتىن جانە كەيدە بوپسالاۋعا دەيىن باراتىن نەگىزسىز شەشىمدەرىنە تالاپ-ارىزدارىن ءبىلدىرىپ، شاعىم تۇسىرۋدە. الايدا، مۇنداي ماسەلە تۋىنداعاندا سوتتار ادەتتەگىدەي كاسىپكەرلەردىڭ بارلىق قاجەتتى راسىمدەردەن ءوتىپ، جوبانى ازىرلەپ، ساراپتاۋعا جۇمساعان ۋاقىتى مەن قاراجاتىنا قاراماستان مەملەكەتتىك ورگانداردىڭ تالاپتارىن قولدايدى.
بۇل ورايدا، ازات پەرۋاشەۆ «اق جول» فراكتسياسىنىڭ بۇدان بۇرىن دا جوعارعى سوت توراعاسى جاقىپ اسانوۆتىڭ اتىنا وتىنىشپەن جۇگىنىپ، مەملەكەتتىڭ ەكونوميكالىق دامۋى مەن كاسىپكەرلەردىڭ زاڭدى قۇقىعىن قورعاۋ مۇددەسىنە نەگىزدەلگەن امال-تاسىلدەردى ازىرلەۋىن سۇراعانىن جەتكىزدى. وسى ماقساتتا جوعارعى سوتتا ارنايى جۇمىس توبى قۇرىلىپ، اتالمىش سالانى رەتتەۋدەگى ەلەۋلى ولقىلىقتاردى انىقتاعان بولاتىن.
سونىمەن، جەر كودەكسىندە ەگەر ۋچاسكە يگەرىلمەگەن بولسا نەمەسە ءتيىستى ماقساتتا پايدالانىلماسا جەر تەلىمىن ءماجبۇرلى تۇردە الىپ قويۋدى كوزدەيدى. الايدا، يگەرۋگە قويىلاتىن كريتەريلەردىڭ انىقتالماعان. بۇل شەنەۋنىكتەرگە جەر ۋچاسكەلەرىن ءوز قالاۋى بويىنشا تارتىپ الۋعا مۇمكىندىك بەرىپ، ونى كاسىپكەرلەرگە قارسى تەرىس پايدالانۋعا جاعداي جاساپ وتىر.
دەپۋتات بۇگىندە شاعىن جانە ورتا بيزنەس جەر تەلىمدەرىن يگەرۋ كەزىندە كەدەرگىلەرگە ءجيى تاپ بولاتىنىن مالىمدەدى. ماسەلەن، ينجەنەرلىك توراپتىڭ بولماۋى، مەملەكەتتىك ورگانداردىڭ رۇقساتتاما قۇجاتتامالارىن كەشىكتىرۋى. ال، ونسىز جوبالىق ساراپتامانىڭ قورىتىندىسىن الۋ جانە قۇرىلىسقا كىرىسۋ مۇمكىن ەمەس.
ارىدەن سوڭ، شاعىن جانە ورتا بيزنەس ءۇشىن كوممۋنيكاتسيالاردى ءوز ەسەبىنەن جۇرگىزۋ – ونى شىعىنعا ۇشىراتادى. ال، شەنەۋنىكتەردىڭ قاراما-قارسى ارەكەتتەرىن فورس-ماجورعا تەڭەۋگە بولادى. ويتكەنى، بۇل، شىن مانىندە، كاسىپكەرلەر ءۇشىن بەينە ءبىر «بوي بەرمەيتىن كۇشكە» اينالدى.
وعان دالەل بولارلىق مىسالدار جەتىپ ارتىلادى. مەملەكەتتىك ورگاندار بىردە باس جوسپاردى، بىردە قۇرىلىستى تۇرعىزاتىن اۋداننىڭ ەگجەي-تەگجەيلى جوسپارلاۋىنا وزگەرىستەر ەنگىزىپ، ءتىپتى كوممۋنيكاتسيا جۇرگىزۋدىڭ مەرزىمىن كەيىنگە شەگەرەدى. وسى ۋاقىت ارالىعىندا كاسىپكەرگە بەرىلگەن جەردى يگەرۋ مەرزىمى دە اياقتالادى. ازىرلەنىپ، تولەمى جاسالعان قۇجاتتارعا قاراماستان سوتتار جەر ۋچاسكەسىن تارتىپ الادى. وسىلايشا، ينۆەستيتسيالىق جاڭا باستامالاردىڭ بولاشاعىنا بالتا شابادى.
«ەكونوميكانىڭ درايۆەرى ءدال وسى شاعىن جانە ورتا بيزنەس ەمەس پە ەدى؟! جاڭا تەحنولوگيالاردى ەنگىزەتىن دە، ازاماتتاردى جاپپاي جۇمىسپەن قامتۋعا جول اشاتىن سەكتور دا وسى ەدى. دەگەنمەن، شەنەۋنىكتەر زاڭدى سىلتاۋ ەتىپ جاندانىپ كەلە جاتقان بيزنەستەن جەردى تارتىپ الىپ، كاسىپكەرلىك باستامانىڭ دامۋىنا توسقاۋىل قويادى. «اق جول» پارتياسىنىڭ پوشتاسىنا كەلىپ تۇسكەن مۇنداي مىسالدار جەتەرلىك»، - دەپ اتاپ ءوتتى ازات پەرۋاشەۆ.
وسىعان بايلانىستى «اق جول» فراكتسياسى قۇرىلىس ماۋسىمىنىڭ باستالۋىن ەسكەرە وتىرىپ، ۇكىمەتكە جەر تەلىمدەرىن يگەرۋدىڭ بىرىڭعاي كريتەريلەرىن ازىرلەۋدى، سونداي-اق ينجەنەرلىك جەلىلەردى قوسۋ جانە باسقا دا وبەكتيۆتى جاعدايلاردى ەسكەرە وتىرىپ، شاعىن جانە ورتا بيزنەس ءۇشىن جەر ۋچاسكەلەرىن يگەرۋ مەرزىمىن ەسەپتەپ شىعارۋدى ۇسىندى.
«اق جول» قدپ جانە ونىڭ پارلامەنتتىك فراكتسياسى سايلاۋالدى باعدارلامانى ىسكە اسىرۋ جانە بيزنەس مۇددەسىن قورعاۋ بويىنشا جۇمىستاردى جالعاستىرۋدا.
Abai.kz
