مەملەكەت باسشىسى قاسىم-جومارت توقاەۆ قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى تۋرالى جارلىققا قول قويدى، دەپ حابارلايدى اقوردانىڭ رەسمي سايتى.

قازاقستان رەسپۋبليكاسى كونستيتۋتسياسىنىڭ 41-بابىنىڭ 3-1-تارماعىنا سايكەس قاۋلى ەتەمىن:

1. قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى 2019 جىلدىڭ 9 ماۋسىمىنا تاعايىندالسىن.

2. قازاقستان رەسپۋبليكاسىنىڭ ورتالىق سايلاۋ كوميسسياسى كەزەكتەن تىس پرەزيدەنتتىك سايلاۋدى ۇيىمداستىرۋ مەن وتكىزۋدى قامتاماسىز ەتسىن.

3. قازاقستان رەسپۋبليكاسىنىڭ ۇكىمەتى كەزەكتەن تىس پرەزيدەنتتىك سايلاۋدى ۇيىمداستىرۋشىلىق، ماتەريالدىق-تەحنيكالىق جانە قارجىلىق قامتاماسىز ەتۋ جونىندەگى قاجەتتى شارالاردى قابىلداسىن.

4. وبلىستاردىڭ، نۇر-سۇلتان، الماتى مەن شىمكەنت قالالارىنىڭ اكىمدەرى سايلاۋ قۇقىعى بار ازاماتتاردىڭ ءتىزىمىن دەر كەزىندە جاساۋدى جانە دۇرىستىعىن قامتاماسىز ەتسىن، ورتالىق، اۋماقتىق جانە ۋچاسكەلىك سايلاۋ كوميسسيالارىنا كەزەكتەن تىس پرەزيدەنتتىك سايلاۋدى ۇيىمداستىرۋ مەن وتكىزۋ ماسەلەلەرىن شەشۋدە جان-جاقتى كومەك كورسەتسىن.

5. وسى جارلىق العاشقى رەسمي جاريالانعان كۇنىنەن باستاپ قولدانىسقا ەنگىزىلەدى.

قازاقستان رەسپۋبليكاسىنىڭ

            پرەزيدەنتى                                                                                                ق.توقاەۆ    

نۇر-سۇلتان، اقوردا،    2019 جىلعى  9  ءساۋىر

№ 18

Abai.kz