بەلگىلى جازۋشى، قازاقستاننىڭ ەڭبەك سىڭىرگەن قايراتكەرى، «ءبيبى-انا» قايىرىمدىلىق قورىنىڭ پرەزيدەنتى بيبىگۇل يمانعازينانىڭ قامقورلىق ىستەردە وق بويى وزىق جۇرەتىنى كوپكە ايان. شالقارداي شەجىرەلى مەكەندە كىندىگى كەسىلىپ، بويجەتكەن بۇلا شاعىنان ءومىردىڭ تاۋقىمەتىن ارقالاعان قايسار قىزدىڭ تۋعان جەرىنە دەگەن قۇرمەتى استە بولەك. «تاۋقىمەت» رومانىندا ءبىر كەيىپكەردىڭ ءومىرىن بايانداۋ ارقىلى كۇللى قازاق قىز-كەلىنشەكتەرىنىڭ تاعدىرىنا الاڭداعان قارىمدى قالامگەر، اسىرەسە، مۇگەدەك انالاردىڭ ماسەلەلەرىنە كەلگەندە جۇرەگى بايىز  تاپپايدى.

ونىڭ وسىنداي قايسار قاسيەتىنە جاقىندا جەرلەستەرى دە كۋا بولدى. ۇزاق جىلداردان بەرى باسپانا قيىندىعىن كورىپ كەلگەن شالقار قالاسىنداعى بەكىشوۆتەر اۋلەتىنە ول اۋماعى 15 سوتوكتى قۇرايتىن 7 بولمەلى جەر ءۇيدى سىيعا تارتتى. قۇنى 6 ملن. تەڭگەگە باعالانعان ۇلكەن ءۇي اۋىز سۋمەن، كوگىلدىر وتىنمەن قامتىلعان جانە بىرنەشە سارايلارى، اۋلاسىندا شەگەندەلگەن قۇدىعى بار، مال ۇستاۋعا قورا-جايلارى ساقاداي ساي.

- وسىعان دەيىن باسپانا قيىندىعىن ءبىر كىسىدەي كورىپ كەلدىك. وتاعاسى الدابەرگەن ەكەۋىمىز كەزىندە «شەتىرعىز» كەڭشارىندا مال شارۋاشىلىعىندا ەڭبەك ەتتىك. ول سوۆحوزدىڭ تراكتورىن ايدادى، مەن مالشىلارعا جاردەمشى، شوپشىلەرگە اسپازشى سياقتى جۇمىستاردى اتقاردىم. 2000 جىلى اۋدان ورتالىعىنا كوشىپ، بالا-شاعامىزبەن 3 بولمەلى ۇيدە 17 جىلداي تۇردىق،  تابىس ماردىمدى بولماعاسىن ونى كەڭەيتە دە، جوندەي دە المادىق. بەرتىن كەلە ول دا اپاتتى جاعدايعا تاپ بولدى. جەرگىلىكتى جەردە باسپانا كەزەگىنە تۇرعانىمىزبەن، زاڭ تالاپتارىنا ساي جاقىن ارادا قول جەتكىزۋ مۇمكىن بولمادى.  ءبىزدىڭ وسى مۇقتاجدىعىمىز «ءبيبى-انانىڭ» نازارىنا ىلىگىپ، مىنەكەي، جەرلەس اپامىزدىڭ ارقاسىندا سان جىلدار بويعى وتباسىلىق ارمانىمىزدىڭ ورىندالعان ساتىنە كۋا بولىپ وتىرمىز، - دەيدى قۋانىشىن جاسىرا الماعان وتاناسى، «التىن القا» يەگەرى باعيلا بەكىشوۆا.

الدابەرگەن اعاي مەن باعيلا اپاي ومىرگە 7 قىز، ءبىر ۇل ومىرگە اكەلىپ، ولاردان بۇگىندە 15 نەمەرە ءسۇيىپ وتىر. كەنجەسى گۇلشات - ءى توپتاعى تۋا ءبىتتى مۇگەدەك. جالعىز ۇلى ساعىنىشتىڭ جۇرەگىنە وتا جاسالعان، اۋىر جۇمىسقا جارامسىز. باعيلا اپايدىڭ دا دەنساۋلىعىنداعى كىناراتىنا بايلانىستى ءىىى توپتاعى مۇگەدەكتىك تاعايىندالعان. ازىرگە بۇل اۋلەتكە كىرەتىن تۇراقتى كىرىس كوزى وسى ەكى ساناتپەن بەرىلەتىن جاردەماقىلار عانا.

- شۇكىرشىلىك ەتەمىن. ەڭ باستىسى، باسپاناعا قول جەتكىزدىك. «جاقسىنىڭ جاقسىلىعىن ايت، نۇرى تاسىسىن» دەمەكشى، ءزاۋلىم ءۇي الىپ بەرگەن بيبىگۇل  اپاعا، ءوتىنىشىمىزدى رەتتەپ، جاعدايىمىزدى ەسكەرگەن اۋدان باسشىلارىنا وتباسىمىزدىڭ اتىنان شىنايى العىسىمىزدى بىلدىرەمىز. بارشاسىنىڭ دەندەرىنە ساۋلىق، ىستەرىنە بەرەكە بەرسىن! - دەيدى ريزا كەيىپپەن كوپ بالالى انا باعيلا.

دەگەنمەن جۇمىسسىزدىق ماسەلەسى بۇل شاڭىراقتىڭ دا بوساعاسىنان سىعالاپ تۇر. بالالاردىڭ ىشىندە ديپلومدارى بار ءبىر-ەكەۋى: «بىزگە ەندى تۇراقتى جۇمىس بولسا ەكەن...» دەگەن تىلەگىن ايتىپ قالدى. ارباعا تاڭىلعان كەنجەسىن باعىپ-قاعاتىن انالارى «وتباسىمىزعا تامشىداي بولسا دا كىرىس بولسىن»، دەپ سوڭعى كەزدە تارى سالىپ ساتۋدى كاسىپكە اينالدىرعان. اۋلاداعى كەڭ قازان ۇيدە تارى قۋىرىپ، ءتۇيىپ، ەلەۋگە ۇيدەگى بالالاردىڭ بارلىعى كومەكتەسىپ جاتقانىنا ءبىز دە كۋا بولدىق.

- قايىرىمدىلىق جاساپ، ءبىر-ءبىرىمىزدى دەمەپ، جىعىلعانعا تايانىش بولۋ - اركىمنىڭ دە قولىنان كەلەتىن ءىس. ول ءۇشىن ادامعا الدىمەن پەيىلدىڭ كەڭدىگى، جۇرەكتىڭ جومارتتىعى قاجەت. بەكىشوۆتەر اۋلەتىنە الىپ بەرگەن بۇل ءۇيدىڭ قارجىسى ءوزىمنىڭ جىلدار بويعى حالىققا قايتا باسىلىپ، تاراتىپ كەلە جاتقان «تاۋقىمەت» رومانىنىڭ تازا قالاماقىسىنان قۇرالدى. قايىرىمدىلىقتىڭ قادىر-قاسيەتىن كورىپ، ساناما ءتۇيىپ وسكەن اداممىن. كۇنى بويى اربادا وتىرسام دا قول-اياعى بۇتىندەردەن قالماۋعا تىرىسىپ، ءماڭداي تىرەگەنگە شاما-شارقىمشا كومەكتەسۋدى پارىز سانايمىن. بىراق ىستەگەن جاقسىلىقتى جىپكە ءتىزىپ جارنامالايتىنداردىڭ سورتىنان ەمەسپىن. ولاي تىزە بەرسەم كوپ قوي... وسى كەزگە دەيىن ءوزىم تاعدىرلاس 580-دەي بالانىڭ جوعارعى وقۋ ورنىنا تۇسۋىنە سەپتەسكەن ەكەنمىن. بۇل - ءبىر عانا مىسال! ماعان حالىقتىڭ العىسىنان ارتىق باعا جوق. كىشىسى سىيلاپ،ۇلكەندەرى باتاسىن بەرىپ جاتادى،  قۇرمەتتىڭ وسى تۇرىنەن ءوزىم قۋات الامىن، - دەيدى بىزبەن تەلەفون ارقىلى تىلدەسكەن بيبىگۇل قابيقىزى.

«ءبيبى-انا» پرەزيدەنتىنىڭ ەلىمىزدىڭ ءار ايماعىندا تۇراتىن شىن مۇقتاجدارعا جاساپ جاتقان كومەگى كوپ. ەندى تۋعان جەرى شالقار قالاسىنىڭ ورتالىعىنان مۇگەدەك بالالاردى ساۋىقتىرۋ ورتالىعىن سالۋدى  كوزدەپ وتىر.

مۇحتار مىرزالين

اقتوبە وبلىسى،

شالقار اۋدانى

Abai.kz