ەلوردادا Qazaq راديوسىنىڭ التىن قورىنداعى ۇزدىك ەرتەگىلەر، باتىرلار جىرى، اندەر مەن كۇيلەر، ايتىس پەن ناقىل سوزدەر ەنگەن «دالا فولكلورىنىڭ انتولوگياسى» تانىستىرىلدى، دەپ حابارلايدى قازاقپارات ءتىلشىسى.

اتالعان جيناق قر تۇڭعىش پرەزيدەنتى - ەلباسى نۇرسۇلتان نازارباەۆتىڭ «ۇلى دالانىڭ جەتى قىرى» ماقالاسى اياسىندا قر اقپارات جانە قوعامدىق دامۋ مينيسترلىگىنىڭ باستاماسىمەن جۇزەگە اسىرىلدى.

«بۇل انتولوگيا ءبىز ءۇشىن دە، كەلەشەك ۇرپاق ءۇشىن دە وتە قۇندى جادىگەرگە اينالاتىنى بەلگىلى. 100 جىلعا جۋىق تاريحى بار قازاق راديوسىنىڭ التىن قورىندا ساقتالعان رۋحاني مۇرامىزدى جارىققا شىعارۋدى ماڭىزدى ءارى ەلەۋلى وقيعا دەپ ويلايمىن. ەڭ الدىمەن، بۇل جوبا ارقىلى بالالاردىڭ ساناسىنا بابالارىمىزدىڭ باي مۇراسىن سىڭىرەمىز. ۇلى ۇلتىمىزدىڭ فولكلورىن ءبىلىپ وسكەن ۇرپاق ەشقاشان ۇتىلمايدى. ويتكەنى، ءبىزدىڭ ەرتەگىلەرىمىز بەن باتىرلار جىرىندا ۇلتتىڭ مۇراتى، بابالار اماناتى، دالانىڭ كەڭدىگى، قازاقتىڭ دارحان دا جاۋىنگەر بولمىسى بەينەلەنگەن»، - دەدى قر اقپارات جانە قوعامدىق دامۋ ءمينيسترى داۋرەن اباەۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.

جيناقتىڭ تاعى ءبىر ەرەكشەلىگى - كىتاپ ىشىندەگى ارنايى ديسكىلەرگە جازىلعان اندەر العاشقى ورىنداۋشىلاردىڭ ۇنىمەن تۇپنۇسقا قالپىندا ەنىپ وتىر.

«جيناقتا ءحىح عاسىرداعى حالىق كومپوزيتورلارىنان ءان ۇيرەنىپ، ولاردىڭ ءبىزدىڭ زامانىمىزعا دەيىن ۇزىلمەي جەتۋىنە ۇلەس قوسقان بارلىق ونەرپاز قامتىلدى. اتاپ ايتقاندا، امىرە قاشاۋباەۆتىڭ «بالقاديشاسى»، «دۋدارايى»، «جالعىز ارشاسى» مەن «بەسقاراگەرى» بار. كەنەن ازىرباەۆتىڭ «كوك شولاعىن»، «بوزتورعايىن»، «بۇلبۇلعا» جانە «دومبىراسىن» تىڭداۋعا بولادى. ماناربەك ەرجانوۆ، قالي بايجانوۆ، بايعابىل جىلقىباەۆ سىندى انشىلەردىڭ ءانى دە وسى جيناقتا ساقتالدى. كۇيگە كەلسەك، دينا نۇرپەيىسوۆا، جاپپاس قالامباەۆ، ابىكەن حاسەنوۆ پەن ماعاۋيا ءحامزيننىڭ ورىنداۋىنداعى قۇندى شىعارمالار توپتاستىرىلعان»، - دەدى مينيستر.

«Qazaq radiolary» جشس ديرەكتورى قۇرمانبەك جۇماعاليدىڭ ايتۋىنشا، انتولوگيا «ەرتەگىلەر»، «باتىرلار جىرى»، «اندەر»، «كۇيلەر»، «ايتىس»، «سالت-ءداستۇر»، «اتادان قالعان اسىل ءسوز» سىندى 7 بولىمنەن تۇرادى.

«قازاق راديوسىندا 1959 جىلدان باستاپ، «ەردەن اتانىڭ ەرتەگىلەرى»، «زامزاگۇل اجەنىڭ ەرتەگىلەرى»، «ايدوس اتانىڭ ەرتەگىلەرى» جانە «ساۋىق اجەنىڭ ەرتەگىلەرى» اتاۋىمەن 350-دەن استام حابار دايىندالدى جانە ونىڭ 70-ءى جاڭا انتولوگياعا ەندى. باتىرلار جىرىنىڭ 50 نۇسقاسى 2015 جىلى قايتا ۇنتاسپاعا جازىلعان ەكەن، سونىڭ 19 جىرى انتولوگياعا ەندى. كۇيلەردى شەرتپە كۇي، توكپە كۇي، قوبىز كۇيلەرى، سىبىزعى كۇيلەرى اتاۋىمەن توپتاستىرىپ، 160 كۇي ەنگىزدىك. جانە ايتىستىڭ 10-عا تارتا ەڭ ۇزدىك تۇرلەرىن ىرىكتەپ الدىق»، - دەدى ق. جۇماعالي.

«دالا فولكلورىنىڭ انتولوگياسى» مىڭ دانامەن شىعارىلىپ، جوو، ونەر مەكتەپتەرىنە جانە كىتاپحانالارعا تاراتىلادى جانە ارنايى سايت پەن ءموبيلدى قوسىمشادا قازاقستاندىقتار مەن شەتەلدىكتەرگە قولجەتىمدى بولادى.

Abai.kz