"اق جول" پارتياسى "الاشقا تاعزىم" شەرۋىن وتكىزۋدى ۇسىندى

"اق جول" دەموكراتيالىق پارتياسى قازاقستان استاناسىندا "الاشقا تاعزىم" شەرۋىن ۇيىمداستىرۋدى ۇسىندى. بۇل تۋرالى "اباي-اقپارات" حابارلايدى.

اتالمىش شارانى 31 مامىر ساياسي قۋعىن-سۇرگىن قۇرباندارىن ەسكە الۋ كۇنىندە، قازاقستاننىڭ استاناسى نۇر-سۇلتان قالاسىندا وتكىزۋ ءۇشىن قالا اكىمىنە رەسمي ۇسىنىس حات تا جولدانعان ەكەن. حاتتى پارتيا توراعاسى، ءماجىلىس دەپۋتاتى ازات پەرۋاشەۆ جازعان.

وندا شارانىڭ ماقساتى مەن وتكىزۋ كەزەڭدەرى تاپتىشتەپ جازىلعان.

"31 مامىر قازاقستاندا ساياسي قۋعىن-سۇرگىن قۇرباندارىن ەسكە الۋ كۇنى. وزىڭىزگە بەلگىلى، ستاليندىك رەجيم كەزىندە رەپرەسسياعا ۇشىراعانداردىڭ باسىم كوپشىلىگى الاش-وردا قازاق ۇلتتىق اۆتونومياسىنىڭ جانە "الاش" قوزعالىسىنىڭ قاتىسۋشىلارى بولعانى بەلگىلى. ونىڭ ءجۇز جىلدىعىنا وراي 2017 جىلى شەتەلدە جانە ەلىمىزدە ءتۇرلى شارالار ۇيىمداستىرىلدى. سونداي-اق، الاشوردا كوشباسشىسى ءاليحان بوكەيحاننىڭ 150 جىلدىعى يۋنەسكو كولەمىندە اتالىپ ءوتىلدى.

ەلباسى ن.ءا.نازارباەۆ وسى قوزعالىستىڭ تاريحي ماڭىزدىلىعىن قازاقستان تاۋەلسىزدىگىنىڭ حابارشىسى رەتىندە بىرنەشە مارتە اتاپ ايتقان ەدى.

وسىعان بايلانىستى، "اق جول" دەموكراتيالىق پارتياسى جىل سايىن (اعىمداعى 2019 جىلدان باستاپ) تاۋەلسىز قازاقستاننىڭ ەلورداسى نۇر-سۇلتان قالاسىندا 31 مامىر كۇنى توتوليتاريزم جىلدارى رەپرەسسياعا ۇشىراعان جانە قۇربانى بولعان "الاش" قوزعالىسىنىڭ قايراتكەرلەرى مەن قاتىسۋشىلارىنىڭ پورترەتتەرىمەن ءجۇرىپ وتەتىن ازاماتتاردىڭ شەرۋىن وتكىزۋدى جوسپارلاۋدا", دەپ جازىلعان نۇر-سۇلتان قالاسى اكىمى باقىت سۇلتانوۆتىڭ اتىنا جولدانعان حاتتا.

شاراعا جالپى كولەمى 3-5 مىڭ ادامداي اتىسادى دەپ جوسپارلانۋدا. شەرۋدىڭ مارشرۋتى 3,5 كم. الاش ارىستارىن ەسكە الۋ شەرۋىن وتكىزۋ ءۇشىن نۇر-سۇلتان قالاسىنىڭ اكىمىنە ارنايى ءوتىنىش تە جازىلعان ەكەن.