قاسىم-جومارت توقاەۆ پەن كورەيا رەسپۋبليكاسىنىڭ پرەزيدەنتى مۋن چجە ين جەتەكشى كورەي كومپانيالارى جۇزەگە اسىرىپ جاتقان ينۆەستيتسيالىق جوبالاردىڭ كورمەسىن ارالاپ كوردى. بۇل تۋرالى اقوردانىڭ رەسمي سايتى حابارلادى.

مەملەكەت باسشىسى بيزنەس فورۋمدى ۇيىمداستىرۋعا بەلسەندى اتسالىسقان كورەيا حالىقارالىق ساۋدا قاۋىمداستىعىنا ريزاشىلىعىن ايتىپ، بۇل كەزدەسۋ ەكى ەل اراسىنداعى ساۋدا-ەكونوميكالىق ىنتىماقتاستىقتىڭ ودان ءارى كەڭەيە تۇسۋىنە تىڭ سەرپىن بەرەتىنىنە سەنىم ءبىلدىردى.

قازاقستان پرەزيدەنتى كورەيا رەسپۋبليكاسىنىڭ ازيا وڭىرىندەگى ءىرى ساۋدا سەرىكتەستەرىنىڭ ءبىرى ەكەنىن اتاپ ءوتىپ، وڭتۇستىك كورەيلىك بيزنەستىڭ 1996 جىلدان بەرى قازاقستان ەكونوميكاسىنا 7 ميلليارد دوللارعا جۋىق ينۆەستيتسيا سالعانىن ايتتى.

– ءبىزدىڭ ەلدەرىمىز قۇرىلىس ينفراقۇرىلىمىندا، اۋىل شارۋاشىلىعىندا، ماشينا جاساۋ ىسىندە، قارجى، دەنساۋلىق ساقتاۋ جانە ەكونوميكانىڭ باسقا دا سالالارى بويىنشا بىرلەسكەن جوبالاردى جۇزەگە اسىرۋدا. كورەيلىك ءىرى بيزنەستىڭ ىنتىماقتاستىققا قىزىعۋشىلىق تانىتۋى قۋانتادى. بيىل كورەيلىك كومپانيالاردىڭ قاتىسۋىمەن الماتىنىڭ ۇلكەن اينالما جولىنىڭ قۇرىلىسى باستالادى. بۇل جوبا تاعى ءبىر بىرلەسكەن «جەتىستىك تاريحى» بولاتىنى ءسوزسىز، – دەدى قازاقستان پرەزيدەنتى.

مەملەكەت باسشىسى شەتەل كاپيتالىن تارتۋ جانە قولايلى ينۆەستيتسيالىق احۋال قالىپتاستىرۋ ءۇشىن قازاقستاندا قولعا الىنعان شارالارعا جان-جاقتى توقتالدى.

– بۇگىندە قازاقستاندا ىسكەرلىك باستامالار مەن ينۆەستيتسيالاردى جۇزەگە اسىرۋ ءۇشىن قولايلى جاعداي جاسالۋدا. ەلىمىز حالىقارالىق ارەنادا قارقىندى دامىپ كەلە جاتقان مەملەكەتتەردىڭ ءبىرى رەتىندە تانىلدى. قازاقستان بيزنەس جۇرگىزۋ جەڭىلدىگى جونىنەن دۇنيەجۇزىلىك بانكتىڭ «Doing Business 2019» رەيتينگىندە 28-ورىندا. شەتەلدىك ينۆەستورلار كەڭەسى مەن «استانا» حالىقارالىق قارجى ورتالىعى تابىستى جۇمىس ىستەۋدە. جالپى، تاۋەلسىزدىك جىلدارىندا قازاقستانعا 320 ميلليارد دوللاردان استام شەتەلدىك تىكەلەي ينۆەستيتسيا تارتىلعان، – دەدى قاسىم-جومارت توقاەۆ.

قازاقستان پرەزيدەنتى وڭتۇستىك كورەيا باسشىسىنىڭ مەملەكەتتىك ساپارى جانە بيزنەس فورۋم اياسىندا قول جەتكىزىلگەن ۋاعدالاستىقتار ەلدەرىمىز اراسىنداعى ساۋدا-ەكونوميكالىق، ينۆەستيتسيالىق جانە مادەني بايلانىستاردى ودان ءارى نىعايتۋدىڭ نەگىزى بولاتىنىنا سەنىم ءبىلدىردى.

***

قازاقستان-وڭتۇستىك كورەيا بيزنەس فورۋمىنا ەكى ەلدىڭ ىسكەر توپتارىنان 500-دەن استام وكىل قاتىستى. شارا قورىتىندىسى بويىنشا ماشينا جاساۋ، مەديتسينا، ينفراقۇرىلىم جانە تاماق ونەركاسىبى سالالارىنا قاتىستى جالپى قۇنى 3,2 ميلليارد دوللار بولاتىن 30-عا جۋىق قۇجاتقا قول قويىلدى. سونىڭ ىشىندە، شىمكەنت قالاسىندا جانە تۇركىستان وبلىسىندا تۇرعىن ءۇي قۇرىلىسىنا، «check-up» كوپسالالى ورتالىعىن قۇرۋعا، جەڭىل اۆتوموبيلدەر، ليفتتەر، كونديتەرلىك ونىمدەر، تەلەديدارلار، مەديتسينالىق يمپلانتتار وندىرىسىنە، مەديتسينالىق مەكەمەلەر اشۋعا جانە باسقا دا سالالارعا قاتىستى ۋاعدالاستىققا قول جەتكىزىلدى.

Abai.kz