قازاقستاننىڭ تۇڭعىش پرەزيدەنتى نۇرسۇلتان نازارباەۆ ماجارستاننىڭ پرەمەر-ءمينيسترى ۆيكتور وربانمەن كەزدەستى.

ەلباسى نۇرسۇلتان نازارباەۆ قازاقستان مەن ماجارستان اراسىنداعى ەكى جاقتى ىنتىماقتاستىقتى ودان ءارى نىعايتۋدىڭ ماڭىزدىلىعىن اتاپ ءوتتى.

– ءسىز ءبىزدىڭ ەلگە وتە ەرەكشە كەزەڭدە كەلىپ وتىرسىز. قازاقستاننىڭ ماجارستانعا جانە وزىڭىزگە دەگەن ءىلتيپاتى زور. ءسىز – وزىندىك ۇستانىمىڭىز بار ەۋروپا ساياساتكەرىسىز، – دەدى قازاقستاننىڭ تۇڭعىش پرەزيدەنتى.

ۆيكتور وربان تىنىشتىق پەن تۇراقتىلىق جاعدايىندا جۇزەگە اسىرىلعان قازاقستانداعى بيلىك ساباقتاستىعىنا جوعارى باعا بەردى.

– ءسىز وسىنداي كۇردەلى ۇدەرىستى تۇراقتىلىق جاعدايىندا ىسكە اسىردىڭىز. مۇنى جۇزەگە اسىرۋ وڭاي ەمەس. ادامدار ءۇشىن تۇراقتىلىقتىڭ ماڭىزى زور. سونىڭ ارقاسىندا حالىقتىڭ ءال-اۋقاتى ارتا تۇسەدى. سوندىقتان، مەن سىزگە شىنايى ريزاشىلىعىمدى بىلدىرەمىن. ءبىز ءسىزدى ماجارستاننىڭ ناعىز دوسى سانايمىز. سوندىقتان، ءبىزدىڭ ەلگە شاقىرۋىمدى قابىل الساڭىز، ءبىز ءۇشىن زور مارتەبە بولار ەدى، – دەدى ماجارستاننىڭ پرەمەر-ءمينيسترى.

قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ ءباسپاسوز قىزمەتى

Abai.kz