الماتى وبلىسىنىڭ ورتالىعى تالدىقورعان قالاسىنىڭ ماڭىندا تەحنولوگيالىق اگروپارك اشىلعان «اگروپارك تالدىقورعان» وڭىرلىك زەرتتەۋ ورتالىعى رەسمي جۇمىس باستادى، دەپ حابارلايدى اباي-اقپارات.

اتالعان اگرو ورتالىقتىڭ اۋماعى – 54 گەكتار. ونىڭ 17 گەكتارىنا قانت قىزىلشاسى ەگىلدى. ەگىس القابىنا جينالعان ديحاندارعا ءتاتتى ءتۇبىردى ەگۋ، كۇتىپ-باپتاۋ جولدارى كورسەتىلدى. يننوۆاتسيالىق ادىستەردى ەنگىزىپ، ءونىم كولەمىن ەكى ەسەگە دەيىن ارتتىرۋ مۇمكىندىكتەرى ۇسىنىلدى. سونىڭ ناتيجەسىندە عىلىم مەن ءوندىرىستىڭ ءبىر ارناعا توعىستىرىلىپ، ەكەۋى ءبىر ورتالىقتا اۋىل شارۋاشىلىعىنىڭ ەڭ وزىق جەتىستىكتەرىن پاش ەتەتىن بولادى. ورتالىق قانت قىزىلشاسى، جۇگەرى، سويا سياقتى وبلىستاعى باسىمدىق بەرىلەتىن داقىلدارعا مامانداندىرىلاتىن بولادى.

«وسى جەرگە ءداندى داقىلداردىڭ 15 ءتۇرى ەگىلگەن. شارۋالار الىسقا بارماي-اق، وسىندا ۇيرەنسىن، كورسىن دەپ ۇيىمداستىرىپ وتىرمىز. وبلىس اكىمى اقشا ءبولدى»،– دەيدى وبلىس اكىمىنىڭ ورىنباسارى سەرىكجان بەسكەمپىروۆ.

اكىم ورىنباسارىنىڭ ايتۋىنشا، الماتى وبلىسىندا 2014 جىلى قانت قىزىلشاسىنىڭ القابى 1,2 مىڭ گا بولسا، 2018 جىلى بۇل كورسەتكىش 11,2 مىڭ گەكتارعا جەتكىزىلىپ، ون ەسە وسكەن. بيىلعى جىلى «جەتىسۋ» اكك ارقىلى قانت قىزىلشاسىنا ارنالعان 5 سەرۆيستىك-دايىنداۋ ورتالىعى قۇرىلىپ، ارنايى تەحنيكالار ساتىپ الىنۋدا. 1,2 ملرد. تەڭگەدەن استام سوماعا 77 بىرلىك زاماناۋي ارنايى تەحنيكالار ساتىپ الىنادى. جالپى، 2014 جىلدان باستاپ وبلىستا قانت قىزىلشاسىنا باعىتتالعان 24 سدو قۇرىلعان. سول سياقتى وسى داقىلدى وسىرۋگە ماماندانعان 623 شارۋاشىلىق ءۇشىن فرانتسيادا، المانيا مەن دانيادا وندىرىلگەن ساپالى تۇقىمنىڭ 18,4 مىڭ سەبۋ بىرلىگى ساتىپ الىنعان. بيىلعى جىلى ءتاتتى ءتۇبىردىڭ القابى 14 مىڭ گەكتارعا جەتكىزىلەدى. ورتاشا ونىمدىلىگى 400 تس/گا بولعاندا 550 مىڭ توننا قانت قىزىلشاسى الىنادى دەپ جوسپارلانىپ وتىر.

قاز نيزير جەتەكشىسى، PhD دوكتورى اندرەي اگەەنكونىڭ مالىمەتىنە سۇيەنسەك، بيىل جىل باسىندا اشىلعان «اگروپارك تالدىقورعان» وڭىرلىك زەرتتەۋ ورتالىعى قانت قىزىلشاسىنا، جۇگەرى مەن سويا وسىرۋگە باسىمدىلىق بەرەتىن كورىنەدى. ءارى ەگۋ جۇمىستارى ونىمدىلىكتى ارتتىرۋعا مۇمكىندىك بەرەتىن جاڭا تەحنولوگيالاردى ەسكەرە وتىرىپ جۇرگىزىلۋدە. ورتالىقتا ۇلگىلىك كورسەتۋ جانە وندىرىستىك كورسەتۋ الاڭدارى قالىپتاسىپ، وعان بارلىق زاماناۋي تەحنولوگيالار شوعىرلاندىرىلىپ، ولار وڭىردە ءتيىمدى قولدانىلاتىن بولادى. شارۋالار يننوۆاتسيالارعا جانە ولاردى اۋىل شارۋاشىلىعىندا قولدانۋعا قاتىستى ماسەلەلەرىمەن بۇل ورتالىققا تىكەلەي جۇگىنە الادى. تۇراقتى بايلانىس ءۇشىن ارنايى موبيلدىك قوسىمشا دايىندالۋدا. ا. اگەەنكونىڭ ايتۋىنشا، عىلىمعا شارۋالاردان تاپسىرىس بولادى، ياعني عالىمدار ولاردىڭ اۋىل شارۋاشىلىعىنداعى ىسكەرلىك بارىسىندا تۋىنداعان پروبلەمالارىن شەشەدى، بۇل ءوز كەزەگىندە جۇمىستىڭ ءاربىر كەزەڭىنىڭ تيىمدىلىگىن ارتتىرىپ، ونىمدىلىك پەن ءونىم ساپاسىن ۇلعايتۋعا مۇمكىندىك بەرەدى.

ايتا كەتەرلىگى، بۇل – وبلىستاعى العاشقى تەحنولوگيالىق اگروپارك ورتالىق ەمەس. بۇعان دەيىن، وسىنداي كەشەننىڭ العاشقىسى قاراساي اۋدانىندا اشىلدى. ول وڭتۇستىك وڭىردەگى شارۋالارعا كومەكتەسەدى. ال تالدىقورعانداعى كەشەن سولتۇستىكتەگى ديحانداردىڭ جەر جىرتىپ، ەگىن ەگۋىنە جاردەمدەسەدى.

Abai.kz