كەشە ەلباسى ن.نازارباەۆ الماتى وبلىسى شامالعان اۋىلىنداعى “اتامەكەن” تاريحي-مادەني ورتالىعىندا اۋىل تۇرعىندارىمەن كەزدەستى. پرەزيدەنت كەزدەسۋ بارىسىندا قازىرگى جۇرگىزىلىپ وتىرعان ساياساتتىڭ ارقاسىندا قازاقستاننىڭ حالىقارالىق ارەنادا مويىندالعانىن اتاپ ءوتتى.

سونىمەن قاتار، ەلباسى الداعى قىزمەتتىك جوسپارلارىمەن دە ءبولىستى. ايتۋىنشا، الداعى ۋاقىتتا ول ەلىمىزدەگى ستراتەگيالىق ماسەلەلەرگە دەن قوياتىن بولادى. جانە، جاستاردى قولداۋ مەن ولاردىڭ دامۋىنا باعىتتالعان بىرقاتار شارالاردىڭ قابىلدانىپ جاتقانىن ايتتى. سونداي-اق، پرەزيدەنت اۋىلداردى دامىتۋ ءۇشىن دە كوپتەگەن باعدارلامالار ىسكە اسىرىلىپ جاتقانىنا توقتالدى.

-مەن قازاقستاننىڭ بولاشاعى جارقىن بولاتىنىنا سەنەمىن. ول ءۇشىن بارلىق جاعداي جاسالعان. كىم بيزنەس اشقىسى كەلسە، وعان نەسيە بەرىلەدى. ماماندىعى جوق بولسا، مەملەكەت وعان جاڭا كاسىپتىك ءبىلىم بەرەدى. ماسەلە جۇمىستىڭ جوعىندا ەمەس، ماماندىقتىڭ بولماۋىندا,- دەدى.

نۇرسۇلتان نازارباەۆ تاۋەلسىزدىك كەزەڭىنەن بەرى ەلىمىزدىڭ وركەندەپ، ءوسىپ ءار سالادا حالىقارالىق جەتىستىكتەرگە جەتكەنىن دە اتاپ ءوتتى. بۇرىن ەشكىمگە بەلگىلى بولماعان قازاقستاننىڭ بۇكىل الەمگە تانىمال بولعانىن، قازاقستاندىقتاردىڭ الەمنىڭ ءتۇرلى ەلدەرىندە بارىپ، ال، جاستاردىڭ دۇنيە ءجۇزىنىڭ ەڭ ۇزدىك وقۋ ورىندارىندا ءبىلىم الۋعا مۇمكىندىگى بار ەكەنىن دە ايتتى.

سونداي-اق، پرەزيدەنت ءوزى ۇسىنعان “5 الەۋمەتتىك باستاما” بويىنشا ەل ازاماتتارىنىڭ تۇرمىس ساپاسىن ارتتىرۋ ءۇشىن ىرگەلى جۇمىستار اتقارىلىپ جاتقانىنا توقتالدى. جانە ول، پاتەرناليستىك تۇسىنىككە جول بەرمەۋدىڭ ماڭىزدىلىعىنا باسا نازار اۋداردى.

– كەز كەلگەن ەر ادامنىڭ ار-نامىسى بولۋعا ءتيىس. بالا تاربيەسى، ەڭ الدىمەن، اتا-انانىڭ جاۋاپكەرشىلىگى. ال مەملەكەت اتا-انالاردى جۇمىسپەن قامتىپ، بالالارىن اسىراۋىنا جاعداي جاساۋى كەرەك، – دەدى قازاقستاننىڭ تۇڭعىش پرەزيدەنتى.

ءوزى تۋعان اۋىلى مەن وسكەن ورتاسىنا ريزاشىلىق بىلدىرگەن ەلباسى تۋعان جەردىڭ قادىرىن تەرەڭ تۇسىنەتىنىن ايتتى. ەسكە سالا كەتسەك، تۇڭعىش پرەزيدەنتتىڭ باستاماسىمەن ەلىمىزدە “تۋعان جەر” باعدارلاماسى جۇزەگە اسىرىلعان بولاتىن. ناتيجەسىندە، ەلىمىزدە قالالاردى كوگالداندىرۋعا، مەكتەپتەردى كومپيۋتەرلەندىرۋگە، جەرگىلىكتى جوعارى وقۋ ورىندارىنا دەمەۋشىلىك جاساۋعا، مۋزەيلەر مەن گالەرەيالار قورىن بايىتا تۇسۋگە قادامدار جاسالدى.  ءسويتىپ، "تۋعان جەر" باعدارلاماسى جالپىۇلتتىق ءپاتريوتيزمنىڭ ناعىز وزەگىنە اينالعانىن اتاپ وتۋگە ءتيىسپىز.

– تۋعان اۋىلىما كەلگەن سايىن ارقاشان بالالىق شاعىمدى جىلى سەزىممەن ەسكە الامىن. مەنىڭ ءجۇرىپ وتكەن جولىم وڭاي بولعان جوق، مەملەكەتىمىزدىڭ ىلگەرىلەۋى مەن وركەندەۋى ءۇشىن كوپ ەڭبەك ەتتىم. شارشاعان كەزدەرىمدە اكەم ەكەۋىمىز ءجيى سەرۋەندەگەن شامالعاننىڭ كوشەلەرى مەن تاۋ بوكتەرلەرىن ەسىمە الاتىنمىن. سول ساتتە-اق شارشاعانىم باسىلادى، – دەدى ەلباسى.

كەزدەسۋدىڭ سوڭىندا پرەزيدەنت اۋىل حالقىنىڭ جاڭا بەلەستەردى باعىندىرۋىنا نيەتتەستىك ءبىلدىردى. جانە، كەزدەسۋگە قاتىسقاندارعا تابىس تىلەپ، وتانىمىزدىڭ يگىلىگى ءۇشىن بارلىعىن جۇمىلا ەەڭبەك ەتۋگە شاقىردى.

Abai.kz