توتەنشە جاعداي جونىندەگى دەپارتامەنت وكىلدەرىنىڭ ايتۋىنشا، بايقوڭىر اۋدانىنداعى دوسمۇحامەدۇلى كوشەسىندە ورنالاسقان بەسقاباتتى جاتاقحانادان ءورت شىققانى تۋرالى اقپارات قۇتقارۋ قىزمەتىنە 2 مامىردا تاڭەرتەڭگى ساعات 10 جارىم شاماسىندا تۇسكەن.

"32 ادام قۇتقارىلدى، ولاردىڭ 28-ءى بالا. ءوز بەتىمەن 350 ادام جاتاقحانادان ەۆاكۋاتسيالاندى" دەلىنگەن دەپارتامەنت حابارلاماسىندا.

اقپارات بويىنشا، عيماراتتىڭ ەكىنشى قاباتىنداعى بولمە ورتەنگەن. جاتاقحانادا جىلۋ بەرۋ توقتاتىلعاندىقتان تۇرعىندار بولمەنى جىلىتاتىن قۇرىلعىلار قولدانعان. ماماندار ءورتتىڭ شىعۋىنا سول سەبەپ بولۋى مۇمكىن دەيدى.

جاتاقحانا تۇرعىندارىنىڭ ءبىرى، كوپ بالالى انا ازاتتىق تىلشىسىنە ءورت كەزىندە عيماراتتا بولعانىن، قويۋ تۇتىننەن اينالا كورىنبەي، ارەڭ دەگەندە بالالارىن سىرتقا شىعارعانىن ايتقان. تاڭەرتەڭگى ساعات وننان بەرى سىرتتا جۇرگەن تۇرعىندار توڭعاندارىن دا جەتكىزگەن.

جەرگىلىكتى اقپارات اگەنتتىكتەرىنىڭ حابارلاۋىنشا، وقيعا ورنىنا بارعان قالا اكىمى باقىت سۇلتانوۆ "تۇرعىندارعا كومەكتەسىپ", "عيماراتتىڭ جاعدايىن تەكسەرۋدى" تاپسىرعان.

Abai.kz